Rusiyanın Ermənistandakı fövqəladə və səlahiyyətli səfiri Sergey Kopırkinin iştirakı ilə “Yaddaş bağı” aksiyası keçirilib. Ermənistan paytaxtında keçirilən aksiyada Böyük Vətən müharibəsində həlak olanların xatirəsinə 100 qovaq əkilib. Tədbirdə bir sıra rəsmi şəxslər, müxtəlif ölkələrin səfirləri iştirak ediblər.
Tədbirdı şıxış edən səfir S.Kopırkin deyib ki, Rusiya, Ermənistan və digər qardaş ölkələr nasizmin tərənnümünə qarşı mübarizəyə böyük önəm verir: “Ermənistan və Rusiya bu gün öz dövlətçiliyi qarşısında çox ciddi sınaqlarla üz-üzədirlər və onların əcdadlarının qoyduğu şanlı döyüş ənənələri bu çağırışların öhdəsindən gəlməyə kömək etməlidir”.
O da məlumdur ki, 2016-cı ilin mayında İrəvanda nasist Qaragin Njdenin nəhəng heykəli ucaldılıb və indiyəcən orada qalmaqdadır. O cümlədən, faşistlərə xidmət etmiş digər erməni əsilli şəxslərin xatirəsi əbədiləşdirilir. Budurmu ermənilərin “nasizmin tərənnümünə qarşı mübarizəsi”? Rusiya səfiri nədən bunları görməzdən gəlir?
“Belə bir toplum heç vaxt nasizmin tərənnümünə qarşı mübarizə aparmaz, əksinə, onun təbliğ olunması ilə bağlı çalışacaq”
Məsələyə münasibət bildirən Aydınlar Partiyasının sədri Qulamhüseyn Əlibəyli hesab edir ki, Ermənistanın nasizmin tərənnümünə qarşı mübarizəyə töhvə verdiyini düşünmək tamamilə məntiqsiz yanaşmadır: “Ən azından Rusiyanın Ermənistandakı səfirinin bu haqda danışması gülüncdür. Çünki İkinci Dünya müharibəsi dönəmində ermənilərin faşistlərlə necə yaxından əməkdaşlıq etməsi barədə çoxsaylı faktlar, sənədlər var. Bunu Rusiyada çox yaxşı bilirlər. Sadəcə, Ermənistanı özlərinə yenidən bağlamaq üçün belə yalanlar uydururlar. S.Koprkin yaxşı bilir ki, Ermənistanda faşizm ideyalarına necə böyük rəğbət var. O, yaxşı bilir ki, Paşinyan Rusiyadan uzaqlaşmaq yolunu tutub. Əvvəllər Ermənistan SSRİ-nin tərkibində olduğu üçün nasizmi təbliğ edə bilmirdilər. Ancaq Ermənistan müstəqillik əldə etdikdən sonra yavaş-yavaş nasizm ideyalarını təbliğ etməyə başladılar. Bir vaxtlar faşistlərlə əməkdaşlıq edən Njdeyə abidələr qoydular. Özü də təkcə Ermənistanda yox. Rusiyada ermənilərin kompakt yaşadığı ərazilərdə belə abidələr ucaldıldı. Ən maraqlısı odur ki, Rusiyanın bir nömrəli satileti olan Serj Sarkisyanın prezidentliyi dövründə faşist Njdeyə böyük heykəl qoydular. Əslində faşist ideologiyası ermənilərə yad deyil. Tam əksinə doğmadır. Elə buna görədir ki, Ermənistan monoetnik ölkədir. Əhalinin 99 faizindən çoxu ermənidir. Onlar faşist ideologiyasından bəslənərək Azərbaycan ərazilərini işğal edəndə dinc insanları kütləvi şəkildə qırırdılar. Əsir götürdükləri şəxslərə olmazın işgəncələr verirdilər. Ona görə ki, nasist ideologiyası ermənilərə doğmadır. Bu baxımdan belə bir toplum heç vaxt nasizmin tərənnümünə qarşı mübarizə aparmaz, əksinə, onun təbliğ olunması ilə bağlı çalışacaq. Necə ki, çalışır. Ona görə də Rusiya səfirinin məlum fikirləri əsla reallığa uyğun deyil. Bu, müəyyən siyasi məqsədlərə hesablanmış bir fikirdir və gerçəkliklə əlaqəsi yoxdur”.
Vidadi ORDAHALLI
