44 günlük müharibədə ölən hərbçilərin valideynləri, “Birgə” hərəkatının üzvləri və Baş nazir Nikol Paşinyanın istefasını tələb edən vətəndaşlar aprelin 11-də saat 18:00-da növbəti etiraz aksiyası keçirəcəklər.
Bunu Ermənistan Demokratik Partiyasının lideri Aram Sərkisyan deyib:
“Biz Qarabağa getməyə də borcluyuq. Cümə axşamı saat 11:00-da Qaregin Njdenin abidəsinin yanından Xankəndiyə gedəcəyik. Öz maşını ilə gələ bilən hər kəsi bizə qoşulmağa dəvət edirik. Əgər indiki hakimiyyət xalqımızı qoruya bilmirsə, biz bunu özümüz edəcəyik. Paşinyan deyir ki, aprelin 1-dən alternativ yol açıqdır. Gedək görək belədirmi?”
Bu doğrudan etirazdır, yoxsa Ermənistan hakimiyyətinin özü təşkil edir?
Siyasi şərhçi Elşad Həsənov “Bakı-Xəbər”ə açıqlamasında bildirdi ki, 44 günlük müharibə yeni reallıq yaratdı: “Bu müharibədə Ermənistan tərəfindən 4000-dən çox əsgər həlak oldu. 11 min nəfərdən artıq fərari oldu. Təsəvvür edin, 4000 nəfərin, 11min fərarinin qohumları etiraz mitinqləri keçirsələr nə qədər adam yığılar? Ermənistanda, İrəvanda keçən ilki mitinqləri yada salsaq, dörd mini, beş mini keçmirdi. Cəmi 6000 minlik mitinqin də qarşısı tezliklə alınmışdı. Ancaq, indi havaların nisbətən istilənməsi, siyasi proseslərin güclənməsi, Ermənistan hakimiyyətinin öz dövlətini idarə edə bilməməsi, düzgün siyasi yol tuta bilməməsi siyasi aponentlərin onlara qarşı mitinqlər, etiraz aksiyaları keçirmək istəmələrinə səbəb ola bilər. Qarabağa, Xankəndinə gəlməyə çalışacaqları da boş söhbətdir. Mən güman etmirəm ki, bunu Ermənistan hakimiyyəti təşkil etsin. Bunu da edən Ermənistanın müxalif qüvvələri, 5 - ci kalonun üzvləri və Rusiyaya bağlı siyasi partiyaların üzvləri olacaqlar. Ancaq, burda görünən odur ki, Paşinyanın gah sağa, gah sola baxması, gah Qərbdən kömək istəməsi, Rusiyaya qucaq açması Ermənistanın özündə olan müxalif qüvvələri də çaşdırıb. Onlar buna etiraz edirlər. Ermənistan nə sülh bağlayır, nə müharibə edir. Bütün bu yarımçıq işlərdən artıq siyasi hakimiyyətdə olanlar da beziblər. Onların düzgün yolu odur ki, Azərbaycanla sülh müqaviləsi bağlasın, ondan sonra daxildə öz iqtisadi, siyasi işlərini həyata keçirsi. Belə olmasa, Ermənistan hakimiyyətinin sonu gəlib çıxacaq. Buna artıq Rusiya tərəfindən də komanda verilib”.
Bugünlərdə ermənilər həmin yolda daha bir təxribata əl atdılar. Rusiya sülhməramlı kontingenti tərəfindən erməni millətindən olan vətəndaşların Xankəndiyə çatdırılması üçün Laçın-Xankəndi yolu ilə razılaşdırılmamış keçidin həyata keçirilməsinə cəhd vətəndaşın səhhətinin pisləşməsinə səbəb olub. Erməni millətindən olan vətəndaşları Xankəndiyə aparan Rusiya sülhməramlı kontingentinin yük maşınları əvvəlcədən razılaşdırılmadan aksiyanın keçirildiyi əraziyə gəlib.
Yük maşınlarında Ermənistandan gələn 27 vətəndaş olub. Onların arasında təkcə qadınlar, qocalar və uşaqlar deyil, həm də çağırış yaşına çatmış kişilər də olub. Vəziyyətin aydınlaşdırılmasının gecikməsi nəticəsində bəzi sərnişinlər özlərini pis hiss ediblər. Onlara dərhal tibbi yardım göstərilib. Daha sonra onlar Azərbaycanın təcili tibbi yardım avtomobilləri ilə Xankəndidəki xəstəxanaya aparılıb.
Amma əvvəlcədən yazılmış ssenariyə əsasən, iki qadın avtomobildən düşüb və rusiyalı hərbçilərin əhatəsində onlarla “təsadüfən” səyahət edən jurnalistə müsahibələr verməyə başlayıblar.
Lakin bunun hansı məqsədlə həyata keçirildiyi məlumdur: bədbəxt qadın və uşaqları öz evlərinə getməyə və ya qohumlarını ziyarət etməyə buraxmadıqlarına görə Azərbaycan tərəfini hansısa addımlar atmağa təhrik etmək. Bütün bunlara baxmayaraq, onların istəyi baş tutmayıb, Azərbaycan tərəfi təmkinli davranıb və təxribata uymayıb. Lakin bu da erməni tərəfini saxta məlumatlar yaymaqdan çəkindirmir. Məsələn, onlar belə bir xəbər yayıblar ki, guya azərbaycanlıların avtomobillərdən birinə daxil olması ilə bağlı məlumatları var.
Özünü pis hiss edən erməni qadını Xankəndinə çatdıran Azərbaycanın təcili yardım avtomobilləri ilə bağlı görüntülər tamamilə əks-effekt verib.
Məhəmmədəli QƏRİBLİ
