İran parlamenti İsraildə səfirlik açdığı üçün 210 səslə Azərbaycana qarşı bəyanat qəbul edib. Bununla bağlı İran mətbuatı məlumat yayıb.
Bəyanatda səfirliyin açılmasının mənfi siyasi nəticələrinin olacağı bildirilib, eyni zamanda XİN-ə bununla bağlı addımlar atmaq tövsiyə edilib.
Onlar eyni zamanda İsraildə səfirlik açılmasını “məzlum Fələstinin fundamental hüquqlarının” pozulması kimi qələmə verib və bütün müsəlman ölkələrini, eyni zamanda İslam Əməkdaşlıq Təşkilatını bu addımı qınamağa çağırıblar. İran parlamentinin bu addımına necə cavab verməliyik?
Müstəqil siyasətçi Bünyamin Qəmbərli “Bakı-Xəbər”ə açıqlamasında bildirdi ki, İran yarandığı gündən, yəni 1925-ildən bölgədə sabitliyi pozan bir dövlət imici qazanıb: “1979-cu ildən, İranda indiki rejim qurulduğu gündən, İslam dövləti adı aldığı gündən isə İran ətraf, qonşu ölkələrdə separatizmi, terrorizmi dəstəkləyən, İslama zərər verən bir rol oynayıb. Azərbaycan torpağının işğalı dövründə İran bir dəfə də reaksiya verməyib. Əksinə, ermənilərlə daha sıx, daha geniş əməkdaşlıq edib. Azərbaycanda separatizmi, dini radikalizmi, bölücülüyü gücləndirmək üçün islam amilindən var gücü ilə istifadə edib. Belə bir halda, İranın Azərbaycan dövlətinin İsraildə səfirlik açması ilə bağlı hər hansı fikir bildirməsi məntiqsizlikdi. İranın İslam amilindən istifadə edərək bütün qonşu bölgələrdə separatizmi, dini radikalizmi, terrorizmi dəstəkləməsini də nəzərə alaraq deyə bilərəm ki, İran Azərbaycanda maksimum dərəcədə pozuculuqla məşğul olub. Mən dəfələrlə çəxışlarımda demişəm ki, İran Azərbaycan adında bir dövlətin varlığını həzm edə bilmir. Ona görə də hər şeyə əl atır, hər şeydən bəhanə kimi istifadə edir. Azərbaycan dövlətinin İsraildə səfirlik açmasına qarışmaq İranın haqqı, hüququ deyil. İranın bu hərəkəti Azərbaycan dövlətinin süveren hüquqlarına müdaxilə, Azərbaycan dövlətinin xarici siyasətini şəkilləndirmək istəyidir. Bu isə İrana heç vaxt nəsib olmayacaq. O ki qaldı bu məsələlərə adekvat cavab verməyinə, Azərbaycan dövlətinin bu məsələlərə ən yaxşı cavabı bunlardır. İran panfarsizminin işğalı altında olan Azərbaycanın Güneyində yaşayan soydaşlarımızın milli hüquqlarını dəstəkləmək, müstəqillik uğrundakı mübarizələrinə həm mənəvi, psixoloji, təşkilati, siyasi, maddi və ideoloji dəstəyin verməsi. Ən gözəl cavab bunlardır. Azərbaycanın Güneyindəki soydaşlarımızın apardığı mübarizəyə bizim dəstək verməyimiz İranın Azərbaycana qarşı gələcək təhdidlərinin qarşısını almağa xidmət edir. Əks halda, ordakı mübarizə uğurlu alınmasa, Azərbaycan dövlətinin Quzeydəki taleyi hər zaman sual altında olacaq, İranın basqısı və təhdidi altında yaşayacağıq”.
Bu gün, İran-Ermənistan qardaşlığı bütövlükdə region üçün təhlükə olmaqda qalmaqdadır. Son 30 il ərzində İran faktiki olaraq, səssiz razılığı ilə, Ermənistanın Azərbaycan ərazilərinin işğalına göz yumub. Qarabağ və Şərqi Zəngəzurun işğalı və bu ərazilərin talan edilməsinə, bu ərazilərdəki evlərdən sökülmüş daşların İran bazarlarında satılmasına, mövcud olmuş 67 məsciddən 65-in dağıdılması və təhqir edilməsinə İran tərəfindən əhəmiyyət verilməməsi yaxşı məlumdur.
Bu açıqlama Azərbaycan-İran münasibətlərinin böhran vəziyyətinə salınmasında növbəti addımdır.
İran tərəfinin bu təhdidləri Azərbaycanı heç zaman qorxuda bilməz. İran ərazisindən Ermənistana göndərilən hərbi dəstəyə baxmayaraq, Azərbaycan ordusu 2020-ci ildə işğalçı Ermənistan ordusunu darmadağın etdi. Bundan sonra da, Azərbaycana qarşı hər hansı bir təcavüzün və təxribatın qarşısı qətiyyətlə alınacaqdır.
Məhəmmədəli QƏRİBLİ
