Azərbaycanın Təbrizdəki Baş Konsulluğunun önündə "Hüseyniyyun" terror qruplaşmasının bayraqları asılıb.
Azad İran Teleqram Kanalının verdiyi məlumata görə, İran rejiminin Təbrizdəki bir neçə tərəfdarı Azərbaycanın Təbrizdəki Baş Konsulluğunun qarşısında qondarma "Azərbaycan Müqavimət Cəbhəsi" olan “Hüseyniyyun” terror qruplaşmasının bayraqlarını özlərinin Əliyevə xəbərdarlıq adlandırdıqları adla asıblar.
Qeyd edilir ki, Qumda məskunlaşan “Hüseyniyyun” terror qruplaşması və onun rəhbərləri əsasən "Talış Muğan Respublikası" kimi tanınan kütlənin qalıqlarındandır və İranda hökmranlıq edən orta əsr irticasını və faşizmini Azərbaycana da yaymaq istəyirlər.
Qeyd edək ki, bir neçə gun əvvəl molla rejiminin göstərişi ilə bir qrup fars-şovinst Azərbaycanın Təbrizdəki Baş Konsulluğunun bağlanması tələbi ilə onun qarşısında aksiya təşkil etmişdi. İndi isə terror təşkilatının əski parçasını konsulluğumuzun qarşısına düzüblər.
“Hüseyniyyun” terror təşkilatının bayraqları hansı səbəbə konsulluğumuzun qarşısına gətirilməlidir? Bunda molla rejiminin məqsədi nə olub?
“Baş verənlər birbaşa onu göstərir ki...”
Siyasi şərhçi Azər Həsrət bizimlə söhbətində bildirdi ki, İran dövlətinin davranışları, əlbəttə, heç bir diplomatik etikaya, konsulluq xidmətləri və sairlə bağlı normalara sığmır: “Bu baş verənlər birbaşa onu göstərir ki, İranı idarə edən fars-molla rejimi həqiqətən də orta əsr təfəkküründə ilişib qalıb, çağdaş dünya ilə ayaqlaşa bilmir. Çağdaş dünya ilə ayaqlaşa bilməyən bir dövlətin isə dağılması qaçılmazdır. Yəni İran faktiki olaraq son dönəmlərini yaşayır, bu dövlət dağılacaq, param-parça olacaq. Əlbəttə ki, Güney Azərbaycan cumhuriyyəti qurulacaq, ora öz müstəqilliyini əldə edəcək. İndi İranın etdiyi bu hərəkətlər əslinə qalanda onun son çırpıntılarıdır. Bunlar son dəfə çırpınırlar ki, bəlkə xilas oldular. Amma xilas ola bilməyəcəklər. Nə Azərbaycan üç-beş nəfər “Hüseyniyyun” adı altında hərəkət edən terror uzantısından çəkinəndir, nə Azərbaycan dövləti bu cür təhdidlərdən qorxub geriyə addım atandır, nə də bütövlükdə Azərbaycan cəmiyyəti bundan narahatdır. Bunlar mümkün deyil. Hələ İranı idarə edənlərin azacıq da olsa təhlil qabiliyyəti olsaydı onlar başa düşərdilər ki, Azərbaycan Respublikası ilə ümumiyyətlə çiling ağac oynamaq onların sonunu gətirir. Onlar əslində bizim əlimizə oynayırlar. Bu hərəkətləri ilə təkcə Azərbaycan Respublikasında deyil, elə Güney Azərbaycanda və bütövlükdə İrandakı türklərdə özlərinə qarşı nifrət yaradırlar. Bu nifrətin dərinləşməsi bizim xeyrimizədir”.
A.Həsrətin sözlərinə görə, çünki İranın parçalanıb yerində yeni dövlətlərin yaranması ilə bağlı beynəlxalq səviyyədə düyməyə basılıb. A.Həsrət qeyd etdi ki, o ölkə dağılmalıdır, ona görə ki, Tehran rejimi idarəolunmazdır və dünya sülhünə təhdiddir, heç kimi dinləmir, bu dövlətin heç kimlə normal münasibətləri yoxdur. “Təbiidir ki, bu təhdidin aradan qaldırılması üçün oranın dağıdılıb yenidən yığılmasına ehtiyac var. Bu dağıdılıb yığılma da nəticə etibarı ilə ona gətirib çıxaracaq ki, İran adlanan dövlətin ərazisində yeni dövlətlər yaranacaq. O dövlətlərdən biri də Güney Azərbaycan Cumhuriyyəti olacaq. Yəni sözümün canı odur ki, İran bu cür “Hüseyniyyun” adı qoyduğu terrorla məşğul olan təşkilat yaradıb. Əslində İmam Hüseyn hara, terror hara? Görün, bunlar nə qədər bədbəxtdirlər ki, din, islam, şiələrin müqəddəs saydığı İmam Hüseynin adına terror təşkilatı qurublar”.
A.Həsrət qeyd etdi ki, əslində İranın bu addımları bizim xeyrimizədir, bu mənadakı proses sürətlənsin və Güney Azərbaycan cümhuriyyəti qurulsun. “İndi biz nə etməliyik” deyən A.Həsrətin sözlərinə görə, dövlət öz işindədir, lazımı addımları atır, biz də vətəndaş olaraq sözsüz ki, proslərdə bu və digər şəkildə yeri gələndə müşahidəçi, yeri gələndə iştirakçıyıq. O, vurğuladı ki, Güney Azərbaycandakı soydaşlarımız da hər keçən gün molla rejiminin bu cür əməlləri gördükcə daha da qəzəblənirlər, oradakı azadlıq hərəkatı daha da genişlənir. “Hətta dünənə qədər müşahidəçi mövqeyində olan adamlar bu cür əməllərdən sonra hərəkətə keçirlər. Molla rejimi istədiyi təxribatı etsin. Onlardan qorxan elə onlar kimi olsun. Nə Azərbaycan Respublikası, nə bütövlükdə güney azərbaycanlılar İmam Hüseynin adı altında terror əməli ilə məşğul olanlardan və onları idarə edən fars-molla rejimindən heç çəkinməyib, qorxmayıb, bundan sonra da çəkinməyəcəklər, qorxmayacaqlar” - deyə A.Həsrət qeyd etdi.
Əli TURABOV
