Tural İsmayılov: “BMT-nin Qaçqınlar üzrə Ali Komissarlığının üzərində böyük işlər var…”
BMT-nin Qaçqınlar üzrə Ali Komissarının (BMT QAK) Azərbaycandakı nümayəndəsi dəyişib. Xanım Bik Lum qurumun Azərbaycandakı nümayəndəliyinin yeni rəhbəri təyin olunub.
Qeyd edək ki, BMT-nin Qaçqınlar üzrə Ali Komissarlığı Vətən müharibəsinə qədər məcburi köçkünlərlə bağlı çoxlu sayda layihələr həyata keçirib. BMT-nin Qaçqınlar üzrə Ali Komissarlığı bu kateqoriyadan olan insanlara dəstək və yardım göstərib.
Onu da bildirək ki, Azərbaycan məcburi köçkünlər üçün çox geniş şərait yaradıb, onlara evlər tikilib verildi. Bakının bir neçə yerində məcburi köçkünlər üçün yaşayış kompleksi salındı, çadırlar tamamilə ləğv olundu. Məcburi köçkünlərin hər biri rahat mənzilə köçdü. Hazırda isə işğaldan azad edilmiş ərazilərin yenidən qurumıması üçün lazımi işlər görülür. Məcburi köçkünlərin öz yurdlarına qayıtması üçün tədbirlər görülməkdə davam edir.
Maraqlıdır, bundan sonrakı mərhələrə BMT-nin Qaçqınlar üzrə Ali Komissarlığının Bakıdakı nümayəndəliyinin fəaliyyətinin əsas məqsədi və fəaliyyəti nədən ibarətdir? Bu nümayəndəlik Vətən müharibəsindən sonra ölkəmizdə hansı işləri görməlidir? Ümumiyyətlə, adıçəkilən qurumun fəaliyyəti nədən ibarət olmalıdır?
“Soydaşlarımızın taleyi ilə bağlı məsələdə və gələcəkdə Qarabağa Böyük Qayıdış prosesində bu qurumun üzərinə böyük işlər düşür”
Siyasi şərhçi Tural İsmayılov “Bakı-Xəbər”ə açıqlamasında qeyd etdi ki, soydaşlarımızın taleyi ilə bağlı məsələdə və gələcəkdə Qarabağa Böyük Qayıdış prosesində BMT-nin Qaçqınlar üzrə Ali Komissarlığının üzərinə böyük işlər düşür: “İndiyə qədər BMT-nin Qaçqınlar üzrə Ali Komissarlığı azərbaycanlıların məsələsi ilə bağlı müəyyən qədər işlər görməyə çalışıb. Ancaq hesab edirəm ki, bundan sonra daha ciddi cəhdlərlə işlər görülməlidir. Bugünə qədər “Ağalı”, “Talış” və digər işğaldan azad olunmuş ərazilərə məcburi köçkünlərin qayıdışı baş tutub. Cənab prezidentin dediyi kimi bu il ərzində məcburi köçkünlərin Laçın şəhərinə geri qayıtması mümkün olacaq. Bu prosesdə BMT-nin Qaçqınlar üzrə Ali Komissarının üzərinə böyük yük düşür. Hesab edirəm ki, qurumun Azərbaycandakı ofisinin rəhbərinin dəyişməsi Azərbaycan üçün xüsusi əhəmiyyətə malikdir”.
Həmsöhbətimiz onu da əlavə etdi ki, bir çox humanitar məsələlərdə Azərbaycan dövləti heç kimə müraciət etməsə də, bəzi beynəlxalq qurumların üzərinə böyük yük düşür. Dövlətimiz güclüdür və özü təkbaşına problemləri həll edir: “Hesab edirəm ki, Azərbaycanın müraciətinə baxmayaraq beynəlxalq təşkilatlar, humanitar məsələlərdə üzərinə düşən öhdəlikləri mütləq şəkildə yerinə yetirməlidir. Böyük Qayıdış prosesinin təhlükəsiz şəkildə baş verməsi üçün minalanmış ərazi problemi də aradan qaldırılmalıdır. Digər sahələrdə də BMT-nin məsul qurumları təhlükəsiz qayıdışı prosesinin baş verməsi üçün Azərbaycanın digər dövlət qurumları ilə kordinasiyalı şəkildə fəaliyyət göstərməlidir. Yalnız o zaman BMT-nin Qaçqınlar üzrə Ali Komissarlığının işini qənaətbəxş hesab etmək olar”.
Günel CƏLİLOVA
