Cənub qonşumuzun Azərbaycana qarşı hələ də məkrli siyasət yürütməsi, ölkəmizə təsir etmək üçün daxildə iğtişaşlar, qarşıdurma, terror aktları törətməyi hədəfləməsi artıq hamya bəlli həqiqətlərdir. Elə son bir neçə gün ərzində Azərbaycanın hüquq-mühafizə orqanları tərəfindən ölkə ərazisində ifşa edilən İranın casus şəbəkələri bunun növbəti sübutudur.
Faktdır ki, Azərbaycanda “din pərdəsi” altında təxribat və pozuculuq əməllərini həyata keçirən dəstələr bilavasitə İran rejimindən, onun müxtəliq dövlət qurumlarından təlimatlar alırlar. Belə görünür ki, Azərbaycanın 44 günlük Vətən müharibəsində əldə etdiyi qələbə Ermənistanın acı məğlubiyyəti ilə yanaşı, onun İran kimi havadarlarını da ciddi şəkildə narahat edib. Bu da İranın Azərbaycana qarşı çirkin fəaliyyətini miqyasını daha da genişləndirməsi ilə nəticələnib. Bura terror fəaliyyəti də daxildir. İran illərdir ki, Azərbaycana qarşı dövlət səviyyəsində terror siyasəti aparır. Elə Milli Məclisin deputatı Fazil Mustafaya qarşı terror da bu siyasətin növbəti çirkin təzahürüdür. Bəlli olduğu kimi, Fazil Mustafaya qarşı terror İranın Azərbaycanda yaratdığı şəbəkə vasitəsilə reallaşdırılıb. Baş vermiş cinayətin xarakteri, iştirakçıların kimliyi, istifadə olunan metodlar bu terror aktının arxasında İran xüsusi xidmət orqanlarının, xüsusilə də SEPAH-ın dayandığını aydın şəkildə göstərir. İranın Azərbaycanda casus şəbəkələri yaratması, onların vasitəsilə terror aktları həyata keçirmək, iğtişaşlar yaratmaq niyyəti birinci dəfə deyil. İranın məlum terror fəaliyyətinin, casus şəbəkələrinin qarşısının alınması, vaxtında aşkarlanması dövlətimizin və xalqımızın təhlükəsizliyi üçün mühüm əhəmiyyət kəsb edir. İranın əməlləri, ölkəmizdə qarışıqlıq yaratmaq üçün qurduğu planlar, casus şəbəkələri yaratması bu dövlətin Azərbaycan üçün nə dərəcədə təhlükəli olduğunu bir daha ortaya qoyur. Bu da o deməkdir ki, İran Azərbaycana yanaşmada heç vaxt müsəlman həmrəyliyindən çıxış etməyib. Hazırkı dövrə kimi Azərbaycana qarşı Ermənistan terror siyasəti həyata keçirib, vətəndaşlarımız bu qatı cinayətlərin qurbanına çevriliblər. İndi İran da Azərbaycana qarşı eyni metodlardan yararlanır və bu hal Azərbaycan ictimaiyyətində İranı Ermənistanla eyniləşdirir. Belə vəziyyətdə gülməli məqamlardan biri də odur ki, İran Xarici İşlər Nazirliyi ölkəmizin kütləvi informasiya vasitələrində bu ölkə əleyhinə təhqiredici hərəkətlərə görə Azərbaycan Xarici İşlər Nazirliyinə etiraz notası təqdim edib. Təbii ki, bunlar tamamilə əsassız və ikrah doğuran iddialardır. Bu fonda Azərbaycan Xarici İşlər Nazirliyi İranın ölkəmizdəki səfiri Seyid Abbas Musəvidən İran rəsmilərinin həqiqətdən uzaq bəyanat və çıxışlarına son qoymasını tələb edib. Azərbaycan XİN-in mətbuat katibi Ayxan Hacızadə İranın Azərbaycana notasına dair aşağıdakıları bildirib: “İran tərəfinin notasında Azərbaycan mediası ilə bağlı qeyd olunanların obyektivliyi əks etdirmədiyi vurğulanaraq, İran tərəfinə cavab notası, eləcə də İran mediasında Azərbaycan əleyhinə yayılmış bir sıra məqalələrin siyahısı təqdim olunub.
İranın ölkəmizdəki səfirinə bildirilib ki, İran mediasında mütəmadi olaraq Azərbaycan Respublikası, onun dövlət və hökumət rəsmiləri haqqında yayılan təhqir dolu, yalan, böhtan və qərəzli məlumatlar, eləcə də İranın tanınmış ictimai-siyasi xadimlərinin həqiqətdən uzaq bəyanat və çıxışları ölkələrimiz arasındakı münasibətlərə xələl gətirir və anlaşılmazlıqları daha da dərinləşdirir. Bununla yanaşı, ölkələrimiz arasında münasibətlər dövründə yaranan anlaşılmazlıqların daim İran tərəfinin birtərəfli davranış və addımlarından qaynaqlandığı, Azərbaycan tərəfinin ardıcıl və xoş niyyətli addımlarına İran tərəfindən lazımi qarşılıq verilmədiyi qeyd olunub. Görüş zamanı, İran mediasında Azərbaycan əleyhinə yalan və qərəzli məlumatların yayılmasının qarşısının alınması məqsədilə təxirəsalınmaz tədbirlər görülməsinin zəruriliyi vurğulanıb”. Azərbaycan mediasında İranla bağlı dərc edilən, təqdim olunan yazı və materiallar yalnız həmin media orqanlarının fikirlərini deyil, bütövlükdə cəmiyyətimizin ümumi rəyini ifadə edir. Molla rejimi ictimai rəydə İranla bağlı formalaşmış neqativ rəyə təəccüblənməməli, ilk növbədə, ölkəmizə qarşı həyata keçirdiyi qərəzli, ədalətsiz, milli maraqlarımıza qarşı yönəlmiş siyasətinə nəzər salmalıdır. Faktdır ki, İranın öz məqsədlərini reallaşdırması üçün dindən istifadə etməsi, dini terror siyasətinin alətinə çevirməsi İslama xəyanətdir. Rusiyalı siyasi şərhçi Sergey Markov da qeyd edir ki, əslində, Tehranın Bakı ilə münasibətlərindəki gərginlliklər İranın özündən qaynaqlanır: “İran və Ermənistanın dostluq münasibətləri Bakı və Tehran arasındakı mövcud gərginliyin yaranma səbəblərindən biri ola bilər. İran İrəvanı öz tabeliyindəki müttəfiqi kimi görür. Azərbaycanla Ermənistan arasında bir balaca gərginlik yaranan kimi Tehran öz balaca müttəfiqini, yəni Ermənistanı dəstəkləyir. İran həm də ehtiyat edir ki, Zəngəzur Azərbaycanın nəzarətinə keçər”. Markov bildirib ki, Güney azərbaycanlıların hüquq və azadlıqları məsələsi də iki ölkə arasındakı gərginliyə təsir edən amillərdən ola bilər: “İranda yaşayan azərbaycanlıların milli kimliklərinə və insan haqlarına hörmət olunmur. Onların müstəqil Azərbaycanla birgə yaşayış forması tapmaq və ya birləşmək kimi böyük istəkləri var. Bu isə İranda daxili böhrana və ərazi bütövlüyünün pozulmasına gətirib çıxara bilər”.
Nahid SALAYEV
