Tehran rejiminin Azərbaycana və digər müsəlman ölkərinə qarşı münasibətini bu ölkə daxilində mənfi qiymətləndirənlər də var.
Azad İran Teleqram Kanalı məlumat verir ki, İran parlamentinin Ərdəbilin Germi şəhərindən seçilmiş deputatı Naser Nəsiri İran hökumətini Azərbaycana düşmənçilik, Ermənistana isə sevgi bəslədiyinə görə kəskin tənqid edib: “Konstitusiyanın 3-cü və 11-ci maddələrinin bütün müsəlmanlara münasibətdə qardaşlıq, İslam xalqları ilə birlik, ittifaq və dünyanın məzlumlarına tam dəstəyə çağırışını əsas tutarsaq, şiə ölkəsi olan Azərbaycanla qarşıdurma, onu hədələmə və işğalçı Ermənistanla müttəfiqlik nəyə əsaslanır?
İki kafir müttəfiqimiz olan Rusiya və Çindən başqa hansı müsəlman ölkəsi ilə birliyimiz var?!".
Göründüyü kimi, İranın müsəlman ölkələrinə düşmən münasibət bəslədiyini deputat etiraf edib və buna görə rejimi tənqid edib.
“İran yalnız Azərbaycanla deyil, digər müsəlman ölkələrinə qarşı da düşmənçilik toxumları səpir”
Siyasi ekspert Rövşən Rəsulov bizimlə söhbətində bildirdi ki, İran özünü “islam dövləti” adlandırsa da, islam həmrəyliyinə heç bir töhfə verməyib, əksinə, müsəlman dövlətlərinə düşmən münasibəti bəsləyib.
“İranın özünü “İslam Respublikası” adı altında təqdim etməsi ilə regional siyasi baxışları arasında dərin tərs-mütənasibliklər mövcuddur və biz son vaxtlar bu reallığı daha çox görməyə başlamışıq. Fakt budur ki, Tehran rejimi heç də islamçılığı təmsil etmir, əksinə, özünün istilaçılıq, digər xalqlara, millətlərə qarşı irqçi, şovinist münasibəti ilə seçilir və bu reallıq həqiqətən də çox təhlükəli amillərdəndir. Necə ola bilər ki, İran özünün tarixən ən yaxın qonşusu, dini və məzhəbi eyni olan bir ölkənin maraqlarını müdafiə etməsi yerinə tamamilə fərqli mövqedən çıxış edir, əsasən də Rusiya, Çin kimi ölkələrin istilaçılıq mövqelərini müdafiə edir? Mən hələ 30 il boyunca torpaqlarımızın Ermənistan tərəfindən işğala məruz qaldığı dövrlərdə İranın cinayətkar davranışları, Qarabağın talanmasında iştirakı, bu əraziləri narkotrafikə çevirməsi, eləcə də 44 günlük müharibədən sonra regionda sülhün, inkişafın bərqərar olmasına qarşı xain fəaliyyəti barədə demirəm”.
R.Rəsulovun sözlərinə görə, bütün faktlar göz önündədir və bu gün Ərdəbildən olan deputatın parlamentdəki çıxışı zamanı Tehran rejiminə qarşı haqlı iradlarla, ittihamlarla çıxış etməsini ədalətli yanaşma kimi qəbul edir. “Bu fakt həm də digər məsələləri önə çıxarır, məhz İranın siyasi kuluarlarında narazılıqların artmasına. Məlumdur ki, ötən ilin 17 sentyabrından başlayan kütləvi xalq etirazları səngimir və bütün bunların arxasında Tehran rejiminin yalnız daxili uğursuz sosial və s. siyasəti dayanmır. Etirazların qaynaqlandığı daha bir səbəb İranın xarici siyasət konturlarını əyri cızması faktları da dayanır. Məhz yanlış regional siyasəti nəticəsində İran dünyanın bir sıra aparıcı, inkişaf etmiş dövlətləri tərəfindən çoxsaylı sanksiyaları ilə üz-üzə qalıb. Bu sanksiyalar isə yalnız ölkənin iqtisadiyyatna deyil, həm də xalqının ağır vəziyyətə düşməsinə səbəb olmaqdadır. Əlbəttə, əgər xalq ayağa qalxırsa, hakimiyyətdə qarşı bir sıra tələblər irəli sürürsə, demək vəziyyət həqiqətən də çox pisdir və Tehran rejimi bütün bunlardan nəticə çıxarması yerinə xalqı əzir, repressiyalara məruz qoyur, edam edir və oğurlayaraq həbsxanalara atır. Halbuki, İran hakimiyyəti yürütdüyü yanlış siyasətinə yenidən baxa və vəziyyəti düzəldə bilərdi. Amma bunu etmir, əksinə, həm daxilində, həm də xaricində sırf istilaçılıq siyasətini yürüdür və bu da ölkənin dayaqlarının zəifləməsinə qədər gətirib çıxarır.
Baxın, İran yalnız Azərbaycanla deyil, digər müsəlman ölkələrinə qarşı da düşmənçilik toxumları səpir. Türkiyə ilə münasibətlər göz önündədir, Pakistanla həmsərhəd bölgələrdə də zaman-zaman silahlı qarşıdurmalar yaşanır, Əfqanıstanla, İraqla da münasibətlər kifayət qədər təhlükəli xəttə qədər inkişaf edir. Məhz qonşuları ilə münasibətlərini normallaşdırması yerinə Tehranın ona aid olmayan məsələlərə müdaxilə etməsi, hətta Rusiyaya hərbi təchizat yardımları göstərməsi, dolayı yollarla Ukrayna müharibəsinə qoşulması – bütün bunlar İranın dayaqlarını zəiflədir və əlbəttə ki, ortada əziyyət çəkən sadə xalq olur. O cümlədən. Azərbaycanla münasibətində də açıq-aşkar düşmənçilik münasibətlərinin mövcudluğu, əlbəttə, regional vəziyyətə öz mənfi təsirlərini göstərir. Bu baxımdan, ölkə daxilindəki siyasi dairələrdə də narazılıqların yaranması gözləniləndir və bu proses artıq başlayıb. Çünki düşüncəli olan adamlar da görür, dərk edirlər ki, molla rejimi bütövlükdə ölkənin mövcudluğu məsələsini böyük sual altında qoymaqdadır. Tehran rejimi onu da unutmamalıdır ki, sosial narazılıq, kütləvi etirazlar çox güclü daxili partlayışa səbəb ola bilər. Nəzərə alınmalıdır ki, orada yaşayan xalqlar – azərbaycanlılar, bəluclar, kürdlər, türkmanlar, ərəblər və s. xalqlar əvvəl-axır öz xilaslarını müstəqilliklərində görməyə başlayacaqlar. Deyim ki, bu prosesə də start verilib. Təbii ki, Tehran rejimi özünə çəki-düzən verməzsə həmin prosesər daha da sürətlənəcək və ölkənin dayaqları məhv olacaq. Onu da nəzərə alsaq ki, bu gün İranın güc strukturlarında belə ciddi narazılıqlar yaşanır, xüsusilə SEPAH-da, o cümlədən, polis strukturlarında da xalqın haqlı etirazlarına bu və ya digər şəkillərdə dəstəklər göstərilir, onda vəziyyətin rejim üçün nə qədər acınacaqlı olduğunu bəri başdan demək olar.
Lakin İranın hələ də vaxtı var və bu vaxtını itirmədən yürütdüyü siyasət konturlarını dəyişə bilər. Əks halda, gözlənilənlər baş verəcək. Hadisələr də birbaşa buna doğru inkişaf edir”-deyə R.Rəsulov qeyd etdi.
İradə SARIYEVA
