Millət vəkili Fazil Mustafaya qarşı törədilmiş silahlı hücumla bağlı saxlanılanlar var.
Bildirilir ki, DTX tərəfindən saxlanılanlar arasında İranda gizlənərək deputat Fazil Mustafaya onu terrorla öldürəcəyi barədə təhdid ünvanlamış Hüseynov Hüseyn Ramiz oğlunun qardaşı Hüseynov Həsən Ramiz oğlu da var. Belə ki, Həsən Hüseynov Tural Məmmədova İran xüsusi xidmət orqanlarının tapşırıqlarının icrası müqabilində pul vəsaitlərinin göndərilməsini təşkil edib.
Tural Məmmədov xarici xüsusi xidmət orqanlarının tapşırığı ilə Azərbaycanda güdmə, tapşırılan ünvanların gizlin videoçəkilişlərini apardığına görə bir müddət əvvəl həbs edilib. Onun yaşadığı ünvandan hava məkanında obyektlərin hərəkət trayektoriyasını müşahidə edən, İrandan göndərilmiş xüsusi qurğu aşkar edilib.
Fazil Mustafaya qarşı təşkil edilən terrorla bağlı ortada İrana dəlalət edən bu qədər fakt varsa, rəsmi Tehranın sükutunun səbəbini nə ilə izah etmək olar?
Təhlükəsizlik məsələləri üzrə ekspert Elşən Həsənov “Bakı-Xəbər”ə bildirdi ki, əslində siyasi motivli sifarişli qətllər İran siyasətinin elə tərkib hissəsidir: “Yəni Fazil Mustafaya sui-qəsd cəhdi bu hadisələr sırasında nə birincidir, nə də təəssüf ki, axırıncı olacaq. İran rejiminin mahiyyəti budur.
Yaxın dövrlərə qədər terror və digər pozuculuq fəaliyyətlərini regionun müxtəlif bölgələrində daha aktiv şəkildə həyata keçirən İran Rusiya-Ukrayna savaşından sonra hədəf olaraq Azərbaycanı seçib və ölkəmizin daxilində terror-təxribat fəaliyyətini gücləndirməyə qərar verib. Əlbəttə ki, bunun öz səbəbləri var.
Dəfələrlə qeyd etdiyim kimi, İranın Azərbaycanla bağlı iki hədəfi var:
1. Ən yaxşı halda, Azərbaycanı Rusiyanın qucağına itələyərək onun təsir dairəsi altında saxlamaq
2.Ən pis halda, Azərbaycanı işğal etmək.
Yəni İran Azərbaycanı müstəqil dövlət olaraq görmək istəmir və bunu özünün varlığı baxımından təhlükə olaraq qəbul edir. Azərbaycan-Ermənistan qarşıdurması zamanı və ondan sonrakı dövrlər ərzində İranın atdığı addımlar dediklərimə birbaşa sübutdur.
Bu, məsələnin bir tərəfi.
İkinci tərəfdən, İranın uzun illər ərzində Azərbaycana qarşı din pərdəsi altında apardığı siyasi ekspansiya cəhdləri tam fiaskoya uğrayıb ki, bu da qarşı tərəfin kəskin reaksiyasına səbəb olub. Faktiki olaraq, ideoloji zəmin əsasında Azərbaycanda daxili sabitliyi pozmaq, Azərbaycan daxilində ona sadiq rejim qurmaq cəhdləri üzərindən illər uzunu yürütdüyü təbliğat-təşviqat işləri sıfırlanıb və bu da artıq ağlın deyil, gücün ortaya qoyulmasına gətirib çıxarıb. Bunu da Azərbaycan dövlətinin səfirliyinə olan hücumdan sonra Fazil Mustafaya edilmiş sui-qəsd cəhdində görə bilərik.
Bu sui-qəsd cəhdindən sonra aparılmış əməliyyat tədbirləri nəticəsində həbs edilmiş çoxsaylı şəxsləri birləşdirən bir dayaq nöqtəsinin olduğu üzə çıxır ki, bu da, əlbəttə, İran rejimidir. Bəs bütün bunların fonunda İran hakimiyyəti ona qarşı yürüdülən ittihamları niyə cavablandırmır? - deyə verilən suala eyni ilə mən də qarşılıqlı sualla cavab verə bilərəm. Hər hansı bir cinayətkarın öz cinayətlərini səmimi olaraq etiraf etdiyinin nə vaxtsa şahidi olubsunuzmu?
Düşünürəm ki, istintaq tədbirlərinin gedişatının nəticəsi olaraq bütün suallara cavab tapılacaq, ortaya daha ciddi faktlar qoyulacaq və bu iş üzrə İran tərəfinin birbaşa iştirakını təkzibolunmaz faktlarla son nəticə kimi sübuta yetirə biləcəyik”.
Məhəmmədəli QƏRİBLİ
