Rusiyanın Ermənistandakı Cənub Hərbi Dairəsinin hərbi bazasının şəxsi heyəti daimi dislokasiya məntəqələrində və yüksək dağlıq poliqonları olan Kamxudla Alagözdə nəzarət yoxlamasından keçməyə başlayıb.
Bu barədə Cənub Hərbi Dairəsinin mətbuat xidməti məlumat yayıb.
Bildirilir ki, birinci mərhələdə döyüş növbətçiliyində olan bölmənin döyüşə hazırlıq səviyyəsi, şəxsi heyətin, silah-sursatın və döyüş texnikasının əməliyyat hazırlığı yoxlanılacaq. Hərbi qulluqçuların nəzəri bilikləri də yoxlanılacaq. Nəzarət yoxlamasının növbəti mərhələsində şəxsi heyətin yüksək hündürlük şəraitində yerinə yetirəcəyi döyüş hazırlığı tapşırıqları isə bunlardır - təkərli və zirehli texnikanın idarə olunması, bütün növ silahlardan atəş açmaq, həmçinin xüsusi, texniki, taktiki, döyüş normativləri, hərbi topoqrafiya və radiasiya, kimyəvi və bioloji müdafiə, bədən təyrbiyəsi üzrə yoxlamalar.
Bundan başqa, Cənub Hərbi Dairəsinin aviasiyası Ermənistan səmasında hava hədəflərinin məhv edilməsi üzrə məşqlər də keçirəcək. MiQ-29 qırıcılarının pilotları hava döyüşü, aerodrom müdafiəsi və hava hədəflərinin tutulması üzrə məşq edəcək. Müxtəlif hündürlüklərdə, o cümlədən yüksək dağlıq rayonlarda ultra aşağı hündürlüklərdə kompleks və akrobatika elementlərini yerinə yetirəcəklər. Mi-8MTV-5 və Ka-52 helikopterlərinin ekipajları saxta düşmənin canlı qüvvə və texnikasını imitasiya edən yer hədəflərini vuracaq.
Maraqlıdır, Rusiyanın Ermənistan səmasında hava hədəflərini tutmaqla bağlı təlimləri keçirməkdə məqsədi nədir?
“Rusiya hərbi hava qüvvələrinin təlimləri həm də Avroittifaqa bir mesajdır”
Məsələyə münasibət bildirən Böyük Azərbaycan Partiyasının sədri Elşad Musayevin fikrincə, indiki şəraitdə Rusiyanın genişmiqyaslı hava təlimləri keçirməsi öz mövcudluğunu göstərməyə hesablanıb: “Əvvəla, Rusiya ilə Ermənistan strateji müttəfiqdir. Bu ölkənin Ermənistanda hərbi bazaları var. Ona görə də bu ölkələrin hərbi təlim keçirməsi təəccüblü deyil. Ancaq indiki vaxtda, yəni Rusiya-Ermənistan münasibətlərinin gərgin olduğu dönəmdə belə təlimlərin keçirilməsi maraq doğurur. Ona görə də, bu, bir çoxları üçün gözlənilməz bir addım oldu. Hesab edirəm ki, Rusiya bununla öz mövcudluğunu göstərmək istəyir. Nəzərə almaq lazımdır ki, Ermənistan uğrunda geosiyasi mübarizə gedir. Moskva İrəvanla münasibətlərin tamamilə pisləşərək kəsilməsini istəmir. O üzdən, sözügedən təlimllər həm də buna hesablanıb. O da məlumdur ki, başda Fransa olmaqla, Avropa İttifaqı Ermənistanda möhkəmlənmək istəyir. Aİ-nin monitorinq qrupu 2 il Ermənistan sərhədində fəaliyyət göstərəcək. Aydın məsələdir ki, onların fəaliyyəti təkcə sərhədlə bağlı olan məsələ deyil. Onların içində bir sıra kəşfiyyatçılar da var. Məqsəd Rusiyanın Ermənistanda mövcudluğunu zəiflətmək və daha sonra oradan çıxarmaqdır. Ona görə də Rusiya hərbi hava qüvvələrinin təlimləri həm də Avroittifaqa bir mesajdır. Yəni bura Rusiyanın təsir dairəsində olan ölkədir və onlar regionu tərk etmək fikrində deyil. O baxımdan hesab edirəm ki, bu mesaj, həm də Qərbə ünvanlanan mesajdır”.
Vidadi ORDAHALLI
