Ermənistan Baş naziri Nikol Paşinyanın həyat yoldaşı Anna Akopyan bir sıra diqqəti çəkən açıqlamalarla çıxış edib. O qeyd edib ki, 44 günlük müharibədə qadınlardan ibarət dəstə yaradılsa da, bu, Ermənistanda fərariliyin qarşısını ala bilmədi.
Akopyan etiraf edib ki, 2020-ci ildə 44 günlük müharibədə Ermənistan Ordusunun təxminən 25 faizi fərari idi: “Biz reallığı gizlədərək yüksək pafoslu sözlər deməyi sevirik, amma reallıq budur ki, 44 günlük müharibədə 11 min nəfər fərarimiz vardı. Biz müharibədə Davidi (Ermənistan ordusunun əsgəri -red) və onun kimi daha 4 000 əsgəri itirdik, çünki çoxları cəbhəyə getmədi, müharibə zamanı Ali baş komandan Vətəni müdafiə etmək üçün könüllüləri çağıranda onlar çağırışa gəlmədilər. Mən bir qadın olaraq özüm dəstə yaratmaq qərarına gəldim ki, kişilər buna böyük ehtiyac olduğunu görsünlər. Görsünlər ki, silahlı dəstə yaradıb öz vəzifələrini yerinə yetirməyə, dəstələr formalaşdırmağa gedənlər qadınlardır. Kişilərin buna reaksiyası yaxşı olmadı, kişilərimiz buna qoşulmadı”.
O da məlum olub ki, Ermənistan müxalifəti müharibədəki məğlubiyyəti səbəbindən Paşinyanı və onun komandasını satqın, vətən xaini adlandırır. Anna Akopyan qeyd edib ki, tədbirlərdən birində iştirak edənlərdən bəziləri "satqınlara ölüm” qışqırırdı: "Amma "ətrafımızda 11 min (fərari) kişi vardı. Biz düşünməliyik, yenidən danışmalı və reallığı gizlətməməliyik. Ümid edirəm ki, satqın deyəndə, bu şişirdilməməlidir, çünki bizdə mühakimə olunanlar, xüsusən zabitlər çoxdur”.
Azərbaycan Silahlı Qüvvələrinin Ali Baş Komandanı İlham Əliyev həm 44 günlük İkinci Qarabağ müharibəsinin davam etdiyi günlərdə, həm də Şanlı Qələbəmizdən sonrakı çıxış, nitq, müsahibə və müraciətlərində dəfələrlə deyib ki, bizim əsgərlərimiz aslanlar kimi vuruşurlar. Çünki onlar öz torpaqları, Vətənləri naminə döyüşdüklərini bilirlər. Ermənistan ordusunun on min hərbçisinin fərarilik etməsinin səbəbi də məlumdur. Onlar bilirdilər ki, özgə torpaqlarında, işğalçılıq müharibəsində iştirak edirlər. Məhz buna görə idi ki, Azərbaycanda müharibə vaxtı 1 nəfər belə fərari yox idi. Ermənistanda isə fərarilik kütləvi hal aldı. Gör fərariliyin miqyası necə böyük olub ki, Ermənistanda hakimiyyətin birinci şəxsinin arvadı özü də bunu etiraf etdi.
“Azərbaycanda könüllü olaraq hərbi komissarlıqların qarşısında növbələrə düzülürdülər ki, onları döyüşə göndərsinlər”
Məsələyə münasibət bildirən hərbi ekspert Ramil Məmmədlinin fikrincə, Akopyanın məlum etirafları ciddi məqamlardan xəbər verir: “Bütün bunlar erməni ordusundakı biabırçı vəziyyətin rəsmi səviyyədə etiraf olunması anlamına gəlir. Çünki A.Akopyan sıradan bir şəxs deyil. Bu, illlərdir süni şəkildə formalaşdırılan erməni birliyi mifinin darmadağın edilməsi anlamına gəlir. Bir daha bəlli oldu ki, bütün bunlar boş sözlərdən ibarət imiş. Ancaq Ermənistandan fərqli olaraq, Vətən müharibəsi dövründə bir nəfər də olsun əsgərimiz fərarilik etmədi. Hətta yaralı əsgərlərimiz hospitallarda sağalmağını gözləmədən cəbhəyə gedirdilər. Bununla bağlı çoxsaylı faktlar mövcuddur. Prezident İlham Əliyev müharibə dövründə xalqa etdiyi müraciətlərində dəfələrlə qeyd etdi ki, Azərbaycan əsgəri sonadək döyüşür və fərariliklə bağlı heç bir fakt qeydə alınmayıb. Niyə? Ona görə ki, bizim əsgərlər Vətən uğrunda vuruşurdular. Hansısa ölkənin ərazisini işğal etməmişdilər. Bunun nəticəsi idi ki, müharibədə erməni əsgəri döyüşdən ya qaçırdı, ya da təslim olurdu. Ermənistanda əsgərlər müxtəlif vasitələrlə fərarilik edirdilər. Xüsusən də həkimlərə rüşvət verməklə ordudan yayınırdılar. Bununla bağlı Ermənistan mətbuatında çoxsaylı faktlar öz əksini tapıb. Azərbaycanda isə bunun tam əksi müşahidə olunurdu. Azərbaycanda könüllü olaraq hərbi komissarlıqların qarşısında növbələrə düzülürdülər ki, onları döyüşə göndərsinlər. Hətta sırası gec çatanlar buna etiraz edirdilər. O dərəcədə ölkəmizdə döyüş əhval-ruhiyəsi yüksək idi. Ancaq Ermənistan ordusunda döyüş motivasiyası yox idi. Onlar çox gözəl dərk edirdilər ki, özlərinə aid olmayan torpaqda mənasız ölmə gedirlər. Mənasız yerə ölmək istəmədikləri üçün də döyüşdən qaçırdılar”.
Vidadi ORDAHALLI
