İran yenə Azərbaycanı təhdid etməyə çalışır. İrana qarşı vahid cəbhənin yaradılması ilə bağlı İsrailin xarici işlər nazirinin azərbaycanlı həmkarına ünvanladığı fikirlərə reaksiya verən İran Xarici İşlər Nazirliyinin nümayəndəsi Nasser Kanani Tvitter hesabında ölkəmiz barədə əsassız ittihamlarla çıxış edib:
“Biz Azərbaycan hökumətindən sionist rejimin xarici işlər nazirinin İrana qarşı vahid cəbhənin formalaşdırılması haqda Azərbaycanla sazişinə dair bəyanatına açıqlama verməsini xahiş etdik. Azərbaycan Xarici İşlər Nazirliyinin nümayəndəsi cavab verməməyə çalışdı və bunun əvəzinə İrana qarşı yeni ittihamlar irəli sürdü. Məgər sükutun davam etdirilməsi Bakının strateji tərəfdaşının (Təl-Əviv rejiminin) bəyanatlarının gizli təsdiqi deyilmi? Müsəlman ölkələrinə yaxınlaşaraq, cinayətkar sionist rejim öz ekspansionist məqsədlərinə çatmaq üçün islam ümmətində mübahisələr və parçalanma toxumu səpməyə çalışır. Biz Azərbaycandakı müsəlman qardaş və bacılara sionist düşmənin əsl niyyətlərindən xəbərdar olmağı məsləhət görürük”.
Görünən odur ki, İran Azərbaycana qarşı süni ittihamlarla çıxış edərək qarşıdurmanın miqyasını genişləndirmək istəyir.
“Ora müharibə meydanına çevrilsə, bunun ən çox zərəri ölkəmizə və orada yaşayan soydaşlarımıza dəyəcək”
Məsələyə münasibət bildirən AMİP funksioneri Əli Orucovun fikrincə, İran rəsmiləri məqsədyönlü şəkildə belə yalan açıqlamalarla çıxış edirlər: “Əvvəla, Azərbaycan 44 günlük Vətən müharibəsində qalib gələndən sonra Tehran rejimi hər vasitə ilə ölkəmizə qarşı konfrontasiya yolunu tutub. Gah Araz çayı boyunca hərbi təlimlər keçirir, gah da Zəngəzur dəhlizi ilə bağlı təhdidlərlə çıxış edir. Azərbaycan İrana görə 30 il İsraildə səfirlik açmadı. Ancaq İran işğalçı Ermənistanın müstəqilliyini tanıyan ilk ölkələrdən biri oldu, İrəvanın göbəyində səfirlik açdılar. Belə olan halda hansı əsasla Azərbaycanı Təl-Əvivdə səfirlik açmaqda ittiham edirlər? Bu azmış kimi, molla rejimi Azərbaycanı İsraillə birlikdə İrana qarşı cəbhə açmaqda ittiham edir. Azərbaycan heç vaxt İrana qarşı platsdarm rolunda çıxış etməyib. İstər 90-cı illərdə olsun, istərsə də indiki vaxtda. Azərbaycan maraqlı olub ki, bütün qonşularla mehriban əlaqələr qursun. Ancaq nə edəsən ki, molla rejimi bunda maraqlı deyil. İran rəsmiləri həm də ona görə belə yalan məlumatlarla çıxış edirlər ki, orada yaşayan soydaşlarımızın ölkəmizə münasibətdə rəyi mənfi yöndə olsun. Bu, illərdir İran media resurslarının apardığı informasiya siyasətinin tərkib hissəsidir. Halbuki, İran müharibə meydanına çevrilsə, bunun ən çox zərəri ölkəmizə və orada yaşayan soydaşlarımıza dəyəcək. Müharibənin nə olduğunu biz yaxşı bilirik. Bütün bu iftira xarakterli açıqlamalara baxmayaraq, Tehran rejimi öz məqsədlərinə çata bilməyəcək. Ona görə ki, bütün proseslər molla rejiminin əleyhinə işləyir. İstibdad üzərində qurulan bu rejim dağılmağa məhkumdur”.
Vidadi ORDAHALLI
