“Azərbaycanlılar Ermənistanın basdırdığı minalar nəticəsində ölməkdə və şikəst olmaqda davam edir”. Bu barədə Azərbaycan XİN-in Tvitter hesabında bildirilib.
Qeyd edilib ki, aprelin 2-də bir hərbi qulluqçu minanın partlaması nəticəsində həlak olub.
Bildirək ki, Tərtərin Talış kəndi istiqamətində Azərbaycan Ordusunun hərbçisi - 2004-cü il təvəllüdlü Niftəliyev Novruz Eldəniz oğlu minaya düşərək həlak olub.
Nazirliyin Tvitter hesabında “2020-ci il müharibəsinin sonundan bəri 288 azərbaycanlı minaya düşüb, onlardan 50-si həyatınıı itirib. Beynəlxalq ictimaiyyət Ermənistanın yaratdığı mina təhlükəsindən narahatlığını ifadə etməlidir”-deyə bildirilib.
Vətən müharibəsindən keçən bu müddət ərzində hərbi və mülki şəxslərimiz ermənilərin mina terrorunun qurbanı olsa da, təəssüflər olsun ki, hələ də beynəlxalq aləmdən buna hər hansı bir ciddi reaksiya verilməyib, Ermənistana təpki göstərilməyib. Əksinə, biz müşahidə edirik ki, beynəlxalq qurumlar hər addımda Ermənistanı dəstəkləyir, qondarma “blokada”dan danışırlar, amma Ermənistanın Azərbaycana qarşı davam etdirdiyi mina terrorunu görməzdən gəlirlər. Nəticədə də 300-ə yaxın şəxs bu terrorun bu və digər şəkildə qurbanı olub.
“Beynəlxalq qurumların bu terrora susması təəssüf doğurmaqla yanaşı, həm də onların ədalətsiz və ermənipərəst olduqlarını təsdiqləyir”
Müasir İnkişaf Mərkəzinin sədri, siyasi şərhçi Mübariz Göyüşlü “Bakı-Xəbər”ə şərhində bildirdi ki, bu, beynəlxalq aləmin, xüsusən də aparıcı Qərb dövlətlərinin Ermənistan və Azərbyacana münasibətdə ikili standarlara yol verdiyinin bir daha sübutudur. “Bizim torpağımızda Ermənistanın basdırdığı milyonlarla mina var ki, müharibə bitəndən indiyə qədər 288 nəfər minaya düşüb və erməni terrorunun qurbanı olub. Təsəvvür edin ki, əgər biz ermənilərin ərazisinə 100 demirəm, 10-15 mina basdırmış olsaydıq və bir-iki erməni o minaya düşsəydi, indi o beynəlxalq qurumların səsindən, hay-küyündən qulağımız tutulardı. Amma görürsüz ki, Ermənistanın ölkəmizdə davam etdirdiyi mina terroruna ikiüzlü siyasət yürüdən qurumlar etiraz bildirmir. Mina terrorunun qurbanları azərbaycanlılar olduğu üçün beynəlxalq qurumlar susur. Bir-iki vicdanlı dövlət var ki, onlar da standart bəyanatlar verib bu işin üstündən keçirlər. Ermənistanın mina terrorundan 300-ə yaxın azərbaycanlının ziyan çəkməsinə baxmayaraq, təəssüflər olsun ki, Ermənistanla bağlı ciddi ölçü götürülmür, o cəzasız qalır. Müharibədən sonra 50 azərbaycanlı minaya düşərək həlak olub, 230-dan artığı şikəst olub. Bu ciddi faktlara beynəlxalq reaksiyanın yarıtmaz olması bizi ciddi narahat edir.
Paşinyan hökumətinin Azərbaycan tərəfinə təqdim etdiyi mina xəritələrinin faydasız olduğu üzə çıxdı. Ermənistan həqiqi xəritəni ortaya çıxarmır. Dünya birliyi Ermənistandan gerçək mina xəritələrinin Azərbaycana verilməsini tələb edib ona nail olmayana qədər bu terror davam edəcək. Ermənistanın mina terroruna qarşı bütün dünya birgə mübarizə aparmalıdır”.
M.Göyüşlü qeyd etdi ki, bu xəritələr verilməyənə qədər vətəndaşlarımız minaya düşəcəklər, həlak olacaqlar, sağlamlıqlarını itirəcəklər. O vurğuladı ki, üçtərəfli bəyanatdan sonra da ermənilər müxtəlif yollarla Azərbaycan ərazilərində minabasdırma təxribatını davam etdiriblər. Bunlar arasında Ermənistanda istehsal edilən minaların da aşkar edildiyini bildirən M.Göyüşlü deyir ki, bütün bunlar Ermənistanın təcəvüzkar və separatçı mahiyyətini ortaya qoyur: “Mina terroru Ermənistanın təcavüzkar və aqressiv siyasətini davam etdirməsinin göstəricisidir. Beynəlxalq qurumların da bu terrora susması təəssüf doğurmaqla yanaşı, həm də onların ədalətsiz və ermənipərəst olduqlarını təsdiqləyir. İnanıram ki, Vətən müharibəsi ilə BMT-nin dörd qətnaməsini icra edən Azərbaycan Ermənistanın mina terrorunun zərərsizləşdirilməsi işinin də öhdəsindən uğurla gələcək”.
İradə SARIYEVA
