Millət vəkili Fazil Mustafaya qarşı törədilən sui-qəsdlə bağlı 6 nəfərin saxlandığı və digər şəxslərlə bağlı araşdırmaların aparıldığı məlum olub.
Qeyd edək ki, martın 28-də saat 21:51-də Azərbaycan Respublikası Milli Məclisinin deputatı Mustafa Fazil Qəzənfər oğluna yaşadığı evin qarşısında - Bakı şəhəri, Sabunçu rayonu, Zabrat-1 qəsəbəsi, Babək küçəsi ev 2 “Z” ünvanında “Kalaşnikov” konstruksiyalı avtomat silahından atəş açılaraq terror aktı törədilib. Terror aktı nəticəsində Fazil Mustafa bədənin sağ çiyin qurşağını və sağ budun aşağı üçdə birini dəlib keçən güllə yarası alıb. Faktla bağlı Azərbaycan Respublikası Dövlət Təhlükəsizliyi Xidmətinin İstintaq baş idarəsində Cinayət Məcəlləsinin 277 (dövlət xadiminin və ya ictimai xadimin xidməti və ya siyasi fəaliyyətinə son qoymaq və ya bu fəaliyyətə görə qisas almaq məqsədilə onun həyatına sui-qəsd etmə) və 228.2.1-ci (qabaqcadan əlbir olan bir qrup şəxs tərəfindən qanunsuz olaraq odlu silah, onun komplekt hissələrini, döyüş sursatı əldə etmə, saxlama, daşıma və gəzdirmə) maddələri ilə cinayət işi başlanıb.
Fazil Mustafanın köməkçisi Əjdər Əliyev deyib ki, deputatı şübhəli şəxs qismində tutulanlar barədə məlumatlandırıblar:
"Bəli, bu barədə Fazil Mustafanın məlumatı var. Rəsmi xəbərləri izləyib, onu xəbərdar edirik".
Qeyd edək ki, artıq bəzi teleqram kanallar və media qurumları Fazil Mustafaya qarşı sui-qəsd cəhdinin təşkilatçı və iştirakçılarından 3 nəfərlə bağlı məlumatları paylaşıblar.
Qeyd edilib ki, sui-qəsdin təşkilatçısı Azər Kamran oğlu Səricanovdur. O, 1976-cı ildə Salyan rayonunda anadan olub, 2010-2019-cu illərdə 11 dəfə İrana səfər edib.
Onun köməkçisi Elşad Tofiq oğlu Əsgərovdur. 1983-cü ildə Bakıda anadan olan E.Əsgərov 2013-18-ci illərdə 9 dəfə İranda olub.
Millət vəkilinə atəş açan isə Səbuhi Vəliyəddin oğlu Şirinovdur. 1986-cı il təvəllüdlü S.Şirinov 2017-22-ci illərdə 15 dəfə İranda səfərdə olub.
Bütün bunlar cinayətin mütəşəkkil dəstə tərəfindən törədilməsinə dair faktları təsdiqləmiş olurmu?
İstefada olan polis polkovniki Şəmsəddin Əliyev “Bakı-Xəbər”ə açıqlamasında bildirdi ki, təxmin etdiyi versiya özünü tam doğruldub: “Mən elə sizə verdiyim müsahibədə bu versiyanın üzərində durdum. Hadisənin mütəşəkkil dəstə tərəfindən öncədən hazırlandığını bəyan etdim. İstintaq getdiyi üçün bəzi versiyalarımızı tam çılpaqlığı ilə şərh edə bilmirik. Amma hadisənin terror olduğu öz təsdiiqini tapır. Həmin güllələr yalnız Fazil Mustafaya atılmayıb, Azərbaycan dövlətinə tuşlanıb. Cinayətkarla bağlı məlumat əldə ediləndən sonra onların yaxalanması da uzun çəkmədi. Bu, bir da sübut etdi ki, cinayət əvvəlcədən planlaşdırılıb və sifariş əsasında həyata keçirilib. Yaxın günlərdə onların havadarları da ortaya çıxacaq. Bir qədər tələsməyək. İz bizim ehtimal etdiyimiz yerə gedib çıxacaq. Mənim qənaətim isə belədir ki, İranda Azərbaycan səfirliyinə olan hücumla bu hücum arasında paralellik və oxşarlıq var. Amma tələsməyək. Təbii ki, istintaq prosesi davam edir, prosessual hərəkətlər zərgər incəliyi ilə araşdırılacaq. Yaxın günlərdə çox şey bəlli olacaq. Çünki İran rejimi 44 illik hakimiyyəti dövründə bu tipli hadisələrlə zəngindir. İran rejimi hər zaman daxili və xarici müxaliflərini məhz terror silahı ilə susdurmağa çalışıb və bununla bağlı kifayət qədər faktlar mövcuddur, dünya dövlətləri də buna şahiddir. İranın özəlliklə son zamanlarda Azərbaycana qarşı hər platformada açıq-aşkar düşmənçiliyini ifadə etməkdən çəkinməməsi, yerli-yersiz güc nümayişi ilə Azərbaycan hədə-qorxu gəlməsi, terrorçuluq sahəsində ən yaxşı bilici olması Fazil Mustafaya qarşı edilən terrorun da onun gerçəkləşdirdiyi ehtimalını verir. Beləliklə, dolayısı ilə Fazil Mustafaya qarşı gerçəkləşdirilən terror aktının birbaşa Azərbaycan dövlətini təhdid etmək məqsədi daşıdığını demək mümkündür”.
Məhəmmədəli QƏRİBLİ
