Azərbaycan dövləti həm başqa dövlətlərlə, həm də beynəlxalq təşkilatlarla münasibətləri sağlam təməllər üzərində qurmaqda maraqlıdır. Hansı qurumla, təşkilatla əməkdaşlıq edirsə mütləq dürüstlük və şəffaflıq, sağlam yanaşma sərgiləyir. Amma təəssüf ki, Qərbin bir çox beynəlxalq təşkilatlarının Azərbaycana münasibəti qeyri-sağlamdır.
Uzağa getməyək, götürək, ABŞ və Avropanın bir çox siyasi institutları, maliyyə fondları, hüquq müdafiə təşkilatlarını. Bu qurumlar Azərbaycanda uzun müddət fəaliyyət göstəriblər və onların bəziləri fəaliyyətini hazırda da davam etdirir. Azərbaycan dövləti sağlam əməkdaşlıq prinsiplərinə və vətəndaş cəmiyyəti ənənələrinə sadiq qalaraq onların fəaliyyətinə daim imkan yaradıb. Lakin təcrübə göstərir ki, başda USAİD olmaqla, ABŞ hökumətinə bağlı olan, eləcə də guya müstəqil olan bu cür təşkilatlar vətəndaş cəmiyyətlərinin inkişafına töhfə verməkdən daha çox, siyasi proseslərə müdaxilə etmək, cəmiyyəti çaşdırmaq, ictimai-siyasi prosesləri manipulyasiya etmək, dövlətçilik prinsiplərini zəiflətmək məqsədi güdürlər. Bir qayda olaraq, bu cür təşkilatlar Azərbaycan dövləti ilə müəyyən istiqamətlərdə əməkdaşlıq etsələr də, onların əsas fəaliyyət istiqaməti, özlərinə sadiq qeyri-hökumət təşkilatları, media qurumları yaratmaq, özünəməxsus şəbəkə formalaşdırmaq, radikal siyasi qüvvələrin anti-dövlət fəaliyyətinə dəstək vermək olub.
Qərbin sözdə humanitar təşkilatları şübhəli əməkdaşlıq üçün niyə əsasən QHT, media qurumları və radikal qrupları seçirlər?
“O QHT-lər guya vətəndaş cəmiyyətinin inkişafı, insan hüquq və azadlıqlarının qorunması istiqamətində fəaliyyət göstərirlər, əslində isə anti-Azərbaycan təşkilatlarının maraqlarını təmin etməyə çalışırlar”
İSBAM sədri Samir Adıgözəlli baki-xeber.com-a bildirdi ki, bunun səbəbi həmin qurumların bəzi QHT-lər, media quruluşları və radikal qruplaşmaların əli ilə ölkə daxilində qarışıqlıq yaratmaq məqsədi güdmələridir. S.Adıgözəlli qeyd etdi ki, USAİD kimi təşkilatların Azərbaycanla bağlı niyyətləri heç zaman təmiz olmayıb, ona görə də bütün gücləri ilə ölkəmizdəki sabitliyi pozmağa çalışıblar. “Təəssüflər olsun ki, zaman-zaman ABŞ institutları, müxtəlif Qərb təşkilatları vasitəsilə maliyyələşən QHT-lər, radikal qruplar olub. Guya ki, o QHT-lər vətəndaş cəmiyyətinin inkişafı, insan hüquq və azadlıqlarının qorunması istiqamətində fəaliyyət göstərirlər, əslində isə anti-Azərbaycan təşkilatlarının maraqlarını təmin etməyə çalışırlar. Yəni öz təxribatlarını “müsbət fəaliyyət” kimi qələmə verməyə çalışırlar, reallıqda isə, USAİD də daxil olmaqla, digər ABŞ və Avropa təşkilatlarının Azərbaycanla bağlı çirkin kampaniyalarını irəli aparmağa cəhd ediblər. USAİD və digər təşkilatlar ona görə media, QHT və radikal qrupları seçirlər ki, onlar vasitəsilə öz təsir imkanlarını və kirli niyyətlərini Azərbaycanda gerçəkləşdirsinlər. Onlar həmişə burada özlərinə resurslar, baza yaratmağa çalışırlar. İstəyirlər ki, QHT-lər vasitəsilə bizim ölkəmizdə siyasi proseslərin gedişatına müdaxilə etsinlər. Bizdə təşkilatlar olub ki, uzun illər Qərb təşkilatlarından maddi cəhətdən qidalanıblar. USAİD-in və başqa qurumların QHT-ləri, media və radikal qrupları seçməsi təsadüfi deyil, çünki onlardan alət kimi Azərbaycan dövlətçiliyinin əleyhinə istifadə etmək məqsədi güdürlər
S.Adıgözəlli qeyd etdi ki, o təşkilatların heç birinin humanitar məqsədinin şahidi olmamışıq, adlarını “humanitar missiya” qoyub radikal əməllərlə məşğul olublar. Azərbaycana qarşı bəd niyyətli olan bu qurumların həmişə Azərbaycanın əleyhinə işlədiyini deyən S.Adıgözəlli “USAİD kimi təşkilatlar adlarını “humanitar missiya” qoyub öz çirkin davranışları ilə həm beynəlxalq ictimaiyyəti, həm də Azərbaycan ictimaiyyətini çaşdırmaqla, aldatmaqla məşğul olurlar. Azərbaycan terrordan əziyyət çəkir, mina terroru nə qədər insanımızın canına qəsd edib və sair. Amma biz o qurumların və onların buradakı əlaltılarının səsini eşitmirik”-deyə bildirdi.
S.Adıgözəlli vurğuladı ki, bu gün Qərb təşkilatlarının QHT, siyasət, media, radikal qruplar arasındakı nökərləri onların anti-Azərbaycan siyasətini həyata keçirir: “O təşkilatlardan maliyyələşənlərin hamısı ölkəmizdə onların maraqlarını təmin etmək üçün dəridən-qabıqdan çıxır. Qərb təşkilatları əsasən QHT, media, siyasət və sair sahələrə sızmağa çalışıblar ki, onlar vasitəsilə öz mövqelərini gücləndirsinlər. Amma zaman-zaman onların bəd niyyəti ifşa olunub. Bu gün də ifşa olunmaqdadır”.
Leyla QARAXANLI
