İranın "Azərbaycanda sionist hərbi qüvvələr" uydurmasının əsl hədəfləri...

Azərbaycan ərazisində hər hansı xarici qüvvələrin olması haqqında İran tərəfinin ittihamı əsassızdır və tamamilə qəbuledilməzdir. Ümumiyyətlə, Azərbaycan ərazisində kənar elementlər mövcud deyildir.

Bu barədə Azərbaycan Müdafiə Nazirliyinin (MN) açıqlamasında deyilir.

“İran İslam Respublikası ordusunun Quru Qoşunlarının Komandanı Kiyumərs Heydəri tərəfindən Azərbaycana münasibətdə çirkin iftira və böhtan xarakterli fikirlər səsləndirilmişdir”- açıqlamada bildirilir.

K.Heydəri öz cəfəng fikirlərində Azərbaycanda guya “sionist” qüvvələrin olması və 44 günlük Vətən müharibəsində Azərbaycanın Suriyadan gətirilən İŞİD terrorçularından istifadə etdiyini və onların hələ də ölkə ərazisində olduğunu iddia edir. O, eyni zamanda, İran tərəfindən Ermənistanla sərhəddə dəyişikliklərə icazə verilməyəcəyini deyir.

İranın "Azərbaycanda sionist hərbi qüvvələr" uydurmasının əsl hədəfləri nədir?

• “Heydərinin sözügedən fikirləri yalnız digər dövlətin daxili işlərinə müdaxilə deyil, bu həm də siyasi həyasızlığın və hədd aşmağın aşkar nümunəsidir”

Siyasi ekspert Rövşən Rəsulov bizimlə söhbətində bildirdi ki, “İranın quru qoşunlarının komandanı Kiyumərs Heydərinin sözügedən fikirləri yalnız digər dövlətin daxili işlərinə müdaxilə deyil, bu həm də siyasi həyasızlığın və hədd aşmağın aşkar nümunəsidir: “Bu baxımdan, teokratik, yəni dini dövlət idarəçiliyi adı altında terror siyasəti ilə məşğul olan bir ölkə generalının bu qədər irəliyə getməsi, təhdid dili ilə danışması nəinki yolverilməzdir, ümumiyyətlə  bütün çərçivələri aşır. Belə olan halda rəsmi Tehran bilməlidir ki, Azərbaycan Respublikası müstəqil dövlət olaraq hansı ölkə ilə münasibət qurduğuna görə kimsəyə hesabat vermir və bundan sonra da verməyəcək. Yəni Tehran rejimi İsraili özünə düşmən, yaxud “sionist qüvvə” hesab edirsə, bu onun öz işidir. Amma Azərbaycanla diqtə dilində danışmaq cəhdi nə zamansa onun özünə baha başa gələ bilər. Bu gün Azərbaycan yalnız İsraillə deyil, həmçinin digər dövlətlərlə münasibətlərini inkişaf etdirir və digər heç bir ölkənin buna etiraz xarakterli münasibət bildirməsinə nə ixtiyarı, nə də hüququ var. Əslində, Müdafiə Nazirliyimiz öz rəsmi bəyanatında hər şeyi yerli-yerində vurğulayıb və necə deyərlər, bir güllə ilə iki hədəfi vurub. Bəli, bu gün Ermənistanı dəstəkləyən İran paralel olaraq terroru dəstəkləyir və bununla özünün də terror dövləti olduğunu dolayısı ilə isbatlayır. Yəni hansı ölkə olmasına baxmayaraq, Azərbaycanın maraqlarına, regional siyasətinə qarşı aşkar düşmənçilik mövqeyi nümayiş etdirilərsə onun cavabı veriləcək”.

R.Rəsulkovun fikrincə, fakt budur ki, İran açıq-aşkar bölgədə qeyri-sabitliyin yaranmasına xidmət edən Ermənistana qahmar çıxır “Yalnız Ermənistanamı? Bu gün SEPAH-ın, ETTELAAT-ın terrorçuları Yəməndə, Suriyada, Livanda və s. ölkələrdə terror düşərgələri açır, dünyaya təhdidlər yağdırırlar. O cümlədən, indi də Azəbaycanı hədəfə almağa cəhdlər göstərirlər. Bunun üçün isə Ermənistan bəhanəsi onlar üçün növbəti “vasitədir”.  Təbii ki, rəsmi Bakı bu kimi oyunbazlıqlara göz yummaq fikrində deyil və Tehran rejimi bilməlidir ki, Azərbaycan bölgədə tək də deyil.

Boğazdan yuxarı bəyanatlar verib ara-sıra SEPAH-ın təhdid xarakterli kliplərini hazırlatmaqdansa, yaxşı olardı ki, iranlı general əvvəlcə öz ölkəsi daxilində baş qaldırmış kütləvi etirazların səbəblərini araşdırsın və təmsil etdiyi hakimiyyətin dirəklərinin necə laxladığından təlaşlansın.

Bu gün Azərbaycanda İsrailin səfirliyi fəaliyyət göstərir və artıq İsraildə də Azərbaycan səfirliyi fəaliyyət göstərir. Bunun İrana nə dəxli var? Onda biz də sual edə bilərik ki, İran hansı məqsədlərlə Qafanda tələm-tələsik konsulluq açdı? Səbəbi nədir? Yaxud, sual edə bilərik ki, 44 günlük müharibə dövründə Azərbaycan ordusunun Zəngilanda uğradığı xəyanətə və verdiyi şəhidlərinə görə Tehran rejimi cavab verməyə hazırdırmı?! Bunlar hansı “qırmızı xətlərdən” danışırlar? Və ya İran “tarixi sərhədlərinin pozulmasına yol verməyəcəyini” deyirsə Azərbaycan özünün tarixi sərhədlərini bərpa etməməlidirmi?

Nədir ki, uzun illər işğal altındakı ərazilərimiz İranın narkoticarət məkanına çevrilmişdi, indi isə bu ticarəti edə bilmir, bundan məhrum olub”. R.Rəsulov əlavə etdi ki, ümumiyyətlə, molla rejiminin zaman-zaman həddini aşması nəticə etibarı ilə onların özlərinə ciddi zərərlər vuracaq və buna şübhə də olmamalıdır.

Əli TURABOV