“Aprel döyüşləri”nin növbəti ildönümünə yaxınlaşırıq. Azərbaycan tarixinə elə bu adla da düşəcək: “Aprel döyüşləri”. Bunun heç ili də yazılmayacaq, yaxud ona ehtiyac olmayacaq. Çünki bu tarixi gün torpaqlarının azad edilməsi uğrunda Azərbaycan Ordusunun gücünün, xalqın öz yurdunu işğalçıdan təmizləməsi istəyinin, əzminin göstəricisidir.
Aprelin 1-dən 2-nə keçən gecədən başlayaraq bütün cəbhə boyu Azərbaycan Ordusunun mövqeləri və yaşayış məntəqələri düşmən tərəfindən intensiv atəşə məruz qalır. Təxribatlar zamanı dinc əhaliyə hücumlar olur. Silahlı Qüvvələrimizin həyata keçirdiyi əks-həmlə əməliyyatının məqsədi Ermənistan silahlı qüvvələrinin təmas xəttindəki yaşayış məntəqələrinə törətdiyi təhlükəni aradan qaldırmaq idi.
Ordumuzun zərbələri nəticəsində düşmənin 30-dək tankı, 25-dən çox artilleriya qurğusu və digər zirehli texnikası məhv edilib, 320 hərbçisi öldürülüb, 500-dən artıq döyüşçüsü yaralanıb. Ağdərə-Madagiz istiqamətində yolların nəzarətdə saxlanılması təmin edildi.
Bu, atəşkəsdən sonra Azərbaycanın torpaqlarını azad etmək gücünün olduğunu dünyaya sübut etməsi idi. Aprel döyüşü “Biz torpaqlarımızın danışıqlar yolu ilə işğaldan azad edilməsinə razıyıq. Bu baş verməzsə, onu güc yolu ilə də təmizləməyə qadirik” mesajını verdi.
Döyüşlər bir daha təsdiqlədi ki, Azərbaycan xalqı torpaqlarının azad edilməsi məsələsində bir mövqedədir. Bu hadisə torpaqların işğal altında qalmayacağının, azad ediləcəyinin göstəricisi oldu.
Aprel döyüşlərindən sonra Ermənistan ordusu, cəmiyyətində yaranan ruh düşkünlüyünü yeni hökumət aradan qaldıra bilmədi. Bu səbəbdən də həmin döyüşlərdəki məğlubiyyəti gizlətmək, bizim qələbəmizi etiraf etməmək kimi mövqe seçdilər. Nəhayət, Aprel döyüşləri Ermənistanda hakimiyyətin devrilməsinə səbəb oldu.
Ermənistanın bu məğlubiyyəti etiraf etməməsinin başqa hansı səbəbləri olub?
Hərbi-siyasi ekspert, ehtiyatda olan polkovnik-leytenant İbrahim Rüstəmli “Bakı-Xəbər”ə açıqlamasında bildirdi ki, aprel döyüşləri Azərbaycanı 44 günlük Vətən müharibəsinə aparan və eyni zamanda bu müharibəni stimullaşdıran ilk əməliyyat kimi yadımızda qaldı: “Bu əməliyyat zamanı Azərbaycan ordusunun şəxsi heyəti, xüsusilə xüsusi təyinatlılarımız böyük bir qəhrəmanlıq nümunəsi göstərdilər. Həmçinin erməni işğalçılarının özləri haqqında yaratdıqları mifi darmadağın etdilər. Bilirsiz ki, onlar bir zamanlar Fransada İkinci Dünya müharibəsi zamanı özlərində bir Ohanyan səddi deyilən mif yaratmışdılar. Əlbəttə, bu sədd çox möhkəm idi. Ancaq Azərbaycan ordusu bu səddi yarmaq üçün heç də böyük əziyyət çəkmədi. Yüksək peşəkarlıq, qəhrəmanlıq nümunəsi göstərərək, ermənilərin bütün döyüş mövqelərini sıradan çıxartdılar. Yəni aprel döyüşləri Azərbaycanı 44 günlük savaşında qələbəyə aparan mühüm bir addım idi. Bu addımın atılmasında Azərbaycan Prezidenti, silahlı qüvvələrimizin Ali Baş Komandanının şəxsi fədəkarlığı, xarakteri, harizması çox mühüm rol oynayırdı. 44 günlük savaşda da biz Ali Baş Komandanımızın necə yüksək döyüş qabiliyyətinə malik olduğunu gördük. Məhz onun sayəsində Azərbaycan ordusu özünün şanlı qələbəsini qazandı. Eyni zamanda, Naxçıvanda baş verən Günnüt əməliyyatı barədə də danışmadılar. Təbii ki, bütün bunların gizlədilməsi, etiraf olunmaması ermənilərin Azərbaycana qarşı həyata keçirdiyi informasiya təhlükəsizliyi müharibəsinin bir parçasıdır. Onlar bizim 44 günlük savaşda qazandığımız möhtəşəm qələbəni belə etiraf etməyə çətinlik çəkirlər, bəzən etiraf etmirlər də. Yəni bütün bunlar daxili auditoriya üçün hesablanmış bir primyeradı. Əlbəttə, əgər bu gün reallıqları Ermənistanın siyasi, hərbi rəhbərliyi ortaya qoyarsa, bu Ermənistan cameəsində çox ciddi bir təlaşa səbəb ola bilər. Bu cür hərəkətlər Azərbaycan ordusunun, Azərbaycan dövlətinin uğurlarının kölgə altına salınması üçün hesablanıb. Amma, bunlara baxmayaraq, fakt faktlığında qalır. İnanıram ki, nə vaxtsa Ermənistan ictimaiyyəti bunu tam dolğun şəkildə görəcək və başa düşəcək. Bu gün baş verən hadisələri sadəcə siyasi keçid kimi dəyərləndirirəm. Ermənistanda yaşayan insanların psixoloji, mənəvi sarsıntı içərisində olduğunu nəzərə alsaq, deməliyəm ki, onların belə addım atmasını müəyyən mənada təbii qarşılayıram. Ancaq, bizim bu gün qazandığımız qələbə hələ də davam edəcək. Azərbaycanın süverenliyi, ərazi bütövlüyü ilə bağlı problemlərinin müəyyən hissəsi hələ həll olunmayıb. Cənab Prezidentin dediyi kimi, biz bunları yavaş - yavaş, qismən həll edəyik. O hər şeyi hamıdan yaxşı bilir. Birbaşa bu işin içində olduğuna görə, addımların strateji, taktiki baxımdan hazırlanmasına şəxsən rəhbərlik edir. Ermənistanın bizim qələbələrimizə münasibətindən asılı olmayaraq, biz bu qələbələri davam etdirəcəyik. Azərbaycan Beynəlxalq hüquq çərçivəsində öz ərazi bütövlüyünü son addımına qədər davam edəcək, sərhədlərin dəqiqləşməsinə nail olacaq”.
Məhəmmədəli QƏRİBLİ
