Prezident İlham Əliyev Şərqi Zəngəzur iqtisadi rayonuna daxil olan Laçın rayonunda Prezidentin xüsusi nümayəndəsi təyin olunan Məsim Məmmədovu qəbul edərkən bir sıra məsələlərə toxunub. O cümlədən qeyd edib ki, Göygöl rayonundan da Şərqi Zəngəzura yol açırıq.
Maraqlıdır, bu yol açılıb, istifadəyə veriləndən sonra Azərbaycan üçün iqtisadi, strateji və müdafiə xarekterli nə kimi əhəmiyyəti olacaq?
Xəyal Bəşirov: “Bu yol vasitəsilə Azərbaycanın ən ucqar bölgəsindən qısa müddət ərzində Şərqi Zəngəzur ərazisinə getmək üçün əla fürsət yaradılacaq”
Siyasi və Hüquqi Strateji Araşdırmalar Mərkəzinin rəhbəri Xəyal Bəşirov “Bakı-Xəbər”ə açıqlamasında qeyd etdi ki, ölkə başçısı qəbullar keçirərkən, tədbirlərdə çıxış edərkən Azərbaycan üçün bu gündə aktual olan işğaldan azad olunan ərazilər və sülh prosesi ilə bağlı məqamları dilə gətirir. İkinci Qarabağ müharibəsi reallaşana qədər, Ermənistanın işğalı və təcavüzü nəticəsində Azərbaycanın 20 faiz ərazisi işğal edilmişdi: “Həmin ərazilərin yeraltı və yerüstü sərvətləri də daxil olmaqla hər bir şeyi dağıdıldı. O cümlədən yollar və infrastrukturda məhv edilib. Təbii ki, bu hal nəqliyyat və iqtisadi kommunikasiyaların da dondurulmasına səbəb oldu. Torpaqlarımız azad edildikdən sonra əsas istəklərdən biri nəqliyyat və kommunikasiya layihələrinin bərpa edilməsidir. Hesab edirəm ki, bu istiqamətdə ölkə rəhbərliyi tərəfindən çox ciddi addımlar atılır. Nəzərə almaq lazımdır ki, bu ərazilər Azərbaycanın suveren torpaqlarıdır. Azərbaycan öz sərhədləri çərçivəsində istənilən yolun bərpa edilməsi, yeni yolun çəkilməsi, infrastrukturun genişləndirilməsi istiqamətində addım atmaqda müstəqildir”.
Həmsöhbətimiz onu da əlavə etdi ki, işğaldan azad edilmiş ərazilərdə yenidən qurma işləri sürətlə və böyük həvəslə həyata keçirilir. Bütün bu proseslərin tərkib hissələrindən biri də yolların və infrastrukturun bərpa edilməsidir. Bu layihələrdən biri də Göygöl rayonundan da Şərqi Zəngəzura yol çəkilməsidir. Bu yol vasitəsilə Azərbaycanın ən ucqar bölgəsindən qısa müddət ərzində Şərqi Zəngəzur ərazisinə getmək üçün əla fürsət yaradılacaq.
Azər Həsrət: “Göygöldən Şərqi Zəngəzura yol çəkilməsi alternativ yolların artırılması məqsədilə edilir”
Siyasi şərhçi Azər Həsrət bizimlə söhbətində bildirdi ki, işğaldan azad edilmiş ərazilərin bərpa edilməsi, yenidən qurulması, müasir tələblərə cavab verən infrastrukturun yaradılması bütün bunlar Prezident İlham Əliyev uzaq görənliyindən xəbər verir. Ölkə başçısı qısa müddət ərzində elə böyük uğurlara imza atmağa çalışır ki, həmin uğurlar torpaqların, ərazilərin güvənliliyini daha da artırsın: “Məlumdur ki, qısa müddət ərzində Şuşaya Zəfər yolu çəkildi. Ardınca Füzulidə beynəlxalq hava limanı açıldı, daha sonra Zəngilanda da beynəlxalq hava limanı istifadəyə verildi. Başqa sahələrdə də tikinti quruculuq işləri aparılır. Zəngəzur dəhlizinin Azərbaycan hissəsi çox sürətlə qurulur. Əlavə olaraq Laçın rayonunu özündə tikintisi quruculuq işləri sürətlə aparılır. Əhalinin məskunlaşması üçün çox ciddi işlər görülür".
Siyası şərhçi hesab edir ki, Göygöldən Şərqi Zəngəzura yol çəkilməsi alternativ yolların artırılması məqsədilə edilir: “Bəllidir ki, Kəlbəcər və Laçın yolları dağlıq ərazi olduğu üçün keçilməzdir. Bu səbəbdən də digər rayonlarda olduğu kimi rahat gediş-gəlişin təmin olunması üçün əlavə alternativə ehtiyac var idi. Həm hava limanının inşa edilməsi, həm də alternativ quru yolların çəkilməsi çəkilməsi ona xidmət edir. Biz elə bir infrastruktur quracağıq ki, sabah hər hansı bir təbiət hadisəsi baş verərsə belə əlavə yol axtarmağımıza ehtiyac olmasın”.
Günel CƏLİLOVA
