Arzuxan Əlizadə: “Köçəryan-Sarkisyan cütlüyü və separatçılar bu yardımları dədə malı kimi mənimsədilər”
“Qarabağda yolverilməz vəziyyət yaranıb. Yüksək rütbəli vəzifəli məmurlarla əlaqəsi olan bir dəstə adam sülhməramlılarla razılaşaraq mal gətirir və böyük pullar qazanır”.
Bu sözləri Xankəndidə qanunsuz yaşayan milyarder, sabiq “dövlət naziri” kimi qələmə verilən separatçı Ruben Vardanyan bildirib.
Onun sözlərinə görə, həmin adamlar pul qazanmaq üçün Xankəndiyə və Qarabağa qarpız və ya digər bu kimi ikinci dərəcəli mallar gətirirlər. Vardanyan deyib ki, bu bir dəstə işbaz üçün daha bir neçə yüz adam maaş müqabilində işləyir. Bir neçə min adam isə bu malları alır: “Əgər dekabrda gündə 3 belə maşın keçirdisə, indi onların sayı 16-ya çatıb. Bu məhsullar hamı üçün əlçatan deyil. Eyni mallar hamı üçün mövcud deyil, baxmayaraq ki, kuponlar məhz bunun üçün təqdim edilib. Bundan əlavə, kuponlar işləmir, insanlar kupona görə dəyərindən baha mal almalı olurlar. Üstəlik, kuponların qüvvədə olma müddətini uzadıblar, ona görə də elə vəziyyət yaranır ki, limitdən istifadə etmiş şəxs vaxtında yeni kupon ala bilmir”.
Zaman-zaman erməni diasporasının Qarabağa yönəltdiyi milyonların separatçılar tərəfindən mənimsənilməsi müzakirə mövzusu olub. Hətta Ermənistanda hakimiyyətdə olan qüvvələr belə, bu məqsədlə ayrılan vəsaitlərin mənimsənilməsində iştirak edirlər. Vardanyanın məlum fikirləri onu göstərir ki, artıq separatçıların özləri bunu etiraf edir. Edilən yardımlar bir qrup tərəfindən talan edilir. Demək o xaricdən gələn yardımların Xankəndidəki ermənilər tərəfindən mənimsənilməsi, orada çirkli pulların yuyulması və s. bütün bunların hamısı həqiqət imiş.
- “Vardanyanın bu pozuntular barədə danışması separatçılar arasında yaşanan parçalanmadan irəli gəlir”
Məsələyə münasibət bildirən AMİP sədri Arzuxan Əlizadənin fikrincə, erməni diasporası tərəfindən yığılan vəsaitlərin mənimsənilməsi 90-cı illərdən mövcuddur: “Xüsusən də 1994-cü ilin mayında imzalanan atəşkəsdən sonra bu, daha geniş miqyas aldı. Həmin dövrdən başlayaraq separatçı quruma daha çox yardımlar edildi. Bununla yanaşı, 1998-ci ildən başlayaraq ABŞ Konqresi hər il separatçılara vəsait ayırmağa başladı. Ancaq 20 il Ermənidstanda hakimiyyətdə olan Köçəryan-Sarkisyan cütlüyü və Qarabağdakı separatçılar bu yardımları dədə malı kimi mənimsədilər. 2018-ci ildə Paşinyan hakimiyyətə gələndən sonra da bu proses davam etdi. Əgər yardımlar mənimsənilməsəydi, Şuşa və digər yaşayış məntəqələri xaraba gündə olmazdı. Vardanyanın bu pozuntular barədə danışması separatçılar arasında yaşanan parçalanmadan irəli gəlir. Məsələ ondadır ki, o, Qarabağa gələndən yerli ermənilər onu qəbul etmək istəmir. Baxmayaraq ki, həm Qarabağ separatçılarının, həm də Vardanyanın arxasında Rusiya dayanır. Ancaq Kremlin bu layihəsi alınmadı. Üstəlik, separatçıların yardımları mənimsəməsi işində rus sülhməramlıları da iştirak edir. Bir məqamı da nəzərə almaq lazımdır ki, erməni disporu, 15 il əvvəl olduğu kimi, Qarabağa yardım toplamır. Çünki xaricdəki ermənilər də bilirlər ki, toplanan vəsait təyinatı üzrə xərclənmir. Ona görə də əvvəlki illərdəki kimi çox vəsait yığılmır”.
Vidadi ORDAHALLI
