İki yüz ildən artıqdır ki, erməni-daşnak quldur birləşmələri və onların havadarları Azərbaycan türklərinə qarşı qətliamlar həyata keçirir, torpaq iddiaları irəli sürür, böyük fəlakətlər törədirlər.
Demək olar ki, iyirminci yüzillik başdan-başa azərbaycanlıların kütləvi qırğınları, yerini-yurdunu tərk etmələri, sürgünlük taleyi yaşamaları ilə müşayiət olunub.
1905-1907, 1914-1916, 1918- 1920, 1948-1953 və 1988-ci ildən bəri baş verən hadisələr erməni faşizminin, vəhşiliyinin bariz nümunəsidir. 1992-ci il fevral ayının 26-na keçən gecə Xocalı şəhəri erməni silahlıları tərəfindən yerlə-yeksan edildi, böyük sayda uşaq, qadın,qoca, dinc əhali məhv edildi. Öldürülən insanların sayını 613 nəfər göstərdilər. Həqiqət budur ki, həmin gecə 2300 nəfərdən artıq adam erməni soyqırımının qurbanı olub. Xocalıda törədilən soyqırımı bizim üçün ilk olay deyildi. Ermənilər müxtəlif illərdə minlərlə Azərbaycan kəndini dağıdıb, yüzlərlə kəndi yer üzündən siliblər.
44 günlük müharibə zamanı təcavüzkar Ermənistan beynəlxalq hüququn norma və prinsiplərini, o cümlədən “Silahlı münaqişələr zamanı mülki şəxslərin müdafiəsinə dair” 1949-cu il tarixli Cenevrə Konvensiyasının tələblərini kobud şəkildə pozaraq dinc əhaliyə qarşı terror əməllərini davam etdirib.
27 sentyabr - 10 noyabr 2020-ci il tarixləri ərzində Ermənistan Silahlı Qüvvələri tərəfindən vurulan zərbələr nəticəsində azərbaycanlı dinc əhalinin sıx yaşadığı rayon və şəhərlərin ərazisinə 30 minə yaxın mərmi və 227 raket atılıb. Döyüş meydanında məğlub duruma düşən Ermənistan davamlı şəkildə Gəncəyə, Mingəçevirə, Tərtərə, Bərdəyə, Qəbələyə və digər yaşayış məntəqələrimizə raket hücumları edərək müharibə və insanlıq əleyhinə cinayətlər törətmişdir. Ermənistanın silahlı birləşmələri tərəfindən mülki şəxslərin çoxsaylı əmlakına ciddi ziyan vurulub, yaşayış evləri, çoxmənzilli yaşayış binaları, qeyri-yaşayış sahələri dağıdılıb.
Bütün bunlar deməyə əsas verir ki, dünya siyasətində ikili standartlar mövcuddur və hələ də bəzi dövlətlər Ermənistanın işğalçılıq siyasətinə göz yumur. İnsan hüquqlarının qorunmasına cavabdeh olan beynəlxalq təşkilatlar, BMT, ATƏT kimi mötəbər qurumlar işğalçı dövlət barəsində qətnamə və qərarlar qəbul etsə də, təəssüf ki, onlar icra edilmir.
Ermənilərin soyqırımı düz 100 il cəzasız davam etdirə bilmələrinin başqa hansı səbəbləri var?
Milli QHT Forumunun prezidenti Rauf Zeyni “Bakı-Xəbər”ə açıqlamasında bildirdi ki, Ermənistan öz siyasətini daşnak mahiyyətinə uyğun şəkildə davam etdirir: “Onların siyasətində terror, başqa xalqları deportasiya etmək əsas təşkil edir. Başa düşürlər ki, belə fəaliyyətləri yerə qoysalar, onların erməni mahiyyəti itər. Onlar bu cür fəaliyyəti dünya erməniləri və dövlət səviyyəsində aparırlar. Dəfələrlə çağırış etmişik ki, bugünkü Ermənistan rəhərliyi bu siyasətdən əlini çəksin. Ancaq görünən budur ki, bunu etmək istəmirlər. Biz erməni QHT rəhbərləri ilə görüşəndə dəfələrlə onlara deyirik ki, niyə bir dəfə də olsun işğalı pisləməyiblər? Bəziləri deyir ki, bu addımı atsalar Ermənistan hakimiyyəti onları məhv edər. Bir erməni ziyalısı belə bu faktlara öz etirazını bildirməyib. Təkcə bu fakt kifayət edir ki, ermənilərin əsl mahiyyətini anlayasan. Paşinyan Qərbi azərbaycanlıların qayıdışını dəstəkləyə bilsə, onda ciddi dönüş yaranar. Onlarım daşnaq düşüncəsindən əl çəkməməsinə stimul verən amillər də az deyil. Ən başlıcası dünyadan aldıqları dəstəkdi. Dünya saxta erməni soyqırımı iddialarını dəstəkləyir, ancaq ermənilər öz törətdiyi qətliyamlara göz yumur. Tarix boyu erməni daşnaklarının türklərə - azərbaycanlılara qarşı törətdiyi soyqırımlarının və terror aktlarının sayı-hesabı yoxdur. Ermənilərin içində türklərə qarşı qaynayıb daşan kin, nifrət əsrlər boyu zərrə qədər də azalmayıb, əksinə, daha da artıb. Ötüb keçən illər onları ağlasığmaz vəhşiliklər törədəcək səviyyəyə yüksəldib. Ermənilər "dənizdən dənizə böyük Ermənistan" arzusunun gerçəkləşməsi uğrunda uzun illərdən bəri əllərindən gələni etsələr də, bu arzu xəyal olaraq qalmaqdadı. Zaman çox şeyi dəyişə-dəyişə geriyə baxmadan irəli gedir. Xam xəyallarla yaşayan ermənilər daim saxta tarixlər uyduraraq zamanı dayandırmaq, onu geri döndərmək istəyirlər. Kor tutduğunu buraxmadığı kimi, ermənilər də yapışdıqları bu saxtakarlıqdan əl götürmək istəmirlər”.
Məhəmmədəli QƏRİBLİ
