Paşinyan “Demokratiya naminə” adlı sammitdə özünün 3.5 dəqiqəlik çıxışının böyük bir hissəsini Laçın yolunun “blokadasına”, Qarabağ və Ermənistanın təhlükəsizliyinə həsr edərək həyasızcasına hadisələri təhrif edib.
Paşinyan iddia edib ki, guya 2022-ci ilin sentyabrında baş verən döyüşlərdə Azərbaycanın “təcavüzünün” dayandırılmasında ABŞ mühüm rol oynayıb: “Ermənistanda demokratik təsisatların güclənməsi ilə paralel olaraq, 2022-ci ilin sentyabrında biz Ermənistan Respublikasının beynəlxalq səviyyədə tanınmış ərazisinə qarşı təcavüzlə üzləşməyə məcbur olduq və bu, suveren ərazimizin bir hissəsinin Azərbaycan tərəfindən işğalına səbəb oldu. Biz sentyabrda demokratiyaların həmrəyliyini və Ermənistana qarşı “təcavüzün” aydın pislənməsini hiss etdik. ABŞ və müdaxilənin genişlənməsinin önlənməsinə kömək etmiş başqa partnyorlara təşəkkür edirəm. Bu gün Dağlıq Qarabağda ermənilərlə bağlı baş verənlər, Laçın dəhlizinin Azərbaycan tərəfindən blokadası və bunun nəticəsində yaranmış humanitar böhran, sözsüz ki, Dağlıq Qarabağın ermənilərdən etnik təmizlənməsi cəhdidir. Və biz buna göz yuma bilmərik. Eyni zamanda təkrar edirəm ki, Ermənistan Azərbaycanla sülh prosesinə sadiq qalır”.
Bununla Paşinyan məsuliyyəti ABŞ-ın boynuna qoymağa cəhd edir. Məgər 2022-ci ildə Azərbaycanın Ermənistana təcavüzü olub?
“Nikolun Azərbaycan əleyhinə bu cür yalan fikirlər səsləndirməsi və tədbirdə buna heç bir etiraz edilməməsi təəssüf doğurur”
Məsələyə münasibət bildirən politoloq Tural İsmayılovun fikrincə, Paşinyanin bu gün ikili oyun oynadığı bütün qüvvələrə bəllidir: “Ümumiyyətlə, Paşinyanı “Demokratiya naminə” sammitə dəvət edib, Türkiyəni bu tədbirə dəvət etməyən ABŞ rəhbərliyi özünün ədalətsizliyini növbəti dəfə ortauya qoydu. Bu həmin Paşinyandır ki, bu gün bütün dünyanı təhdid edən uranın zənginləşdirilməsi ilə bölgəyə xaos vəd edən İranın Qafanda konsulluq açmasına razılıq verib. O cümlədən, İranla saxta qardaşlıq nümayiş etdirir. Belə bir ölkənin o cür tədbirə dəvət edilməsinin özü bir riyakarlıqdır. Paşinyanın “Demokratiya naminə” sammitdə Azərbaycan əleyhinə bu cür yalan fikirlər səsləndirməsi və tədbirdə buna heç bir etiraz edilməməsi təəssüf doğurur. Paşinyan həyasızcasına Birləşmiş Ştatları öz yalanlarına şərik etmək cəhdi heç bir çərçivəyə sığmır. Qarşı tərəfin cavab haqqı tanınmalıdır. Ancaq tədbirə bir sıra Afrika ölkələri dəvət olunduğu halda, Azərbaycan və Türkiyə dəvət olunmayıb. Ən azından Türkiyə o tədbirdə olsaydı, qarşı tərəfə cavab vermək imkanı olardı. Bütün bunlar ABŞ-ın “Demokratiya naminə” sammit adı altında növbəti şou təşkil etdiyini ortaya qoymuş olur. 2022-ci ildə Azərbaycanın Ermənistana hansısa təcavüzü olmayıb. Bugünə qədər Ermənistan sərhədlərin delimitasiya və demarkasiya prosesindən yayınır. Eyni zamanda Ermənistan hələ də Qazaxın kəndlərini və Naxçıvanın Kərki kəndini işğal altında saxlayır. Bundan başqa, Laçın-Xankəndi yolunun hansısa blokadasından söhbət gedə bilməz. Həmçinin, Ermənistan və onları himayə edən rus sülhməramlıları bu yaxınlara qədər Xəlfəli-Turşusu yolundan qanunsuz daşımalar həyata keçirməyə çalışırdılar. O baxımdan hesab edirəm ki, Paşinyanın məlum çıxışı da yalanlara söykənən bir çıxış idi və ciddi siyasi kuluarlarda real nəticə kimi qəbul oluna bilməz”. Vidadi ORDAHALLI
