29 mart 2023-cü il tarixində İsrailə rəsmi səfəri çərçivəsində Azərbaycan Respublikasının xarici işlər naziri Ceyhun Bayramov İsrail Dövlətinin xarici işlər naziri Eli Kohen ilə görüşüb.
Görüşdə Ceyhun Bayramov həmkarını bölgədə post-münaqişə dövründə ölkəmizin sülh, təhlükəsizlik və əməkdaşlığın qurulması istiqamətində təşəbbüsləri barədə məlumatlandırıb. Bu səylərə baxmayaraq, Ermənistanın davamlı təxribatlar törətdiyi və prosesə xələl gətirdiyini qeyd edib. Həmçinin, nazir işğaldan azad olunmuş ərazilərin minalardan təmizlənməsi, genişmiqyaslı bərpa və quruculuq işləri barədə məlumat verib, İsrail şirkətlərinin bu prosesdə iştirakını məmnunluqla qeyd edib.
İsrail Dövlətinin xarici işlər naziri Eli Kohen ölkəsinin Azərbaycanla hərtərəfli əməkdaşlıqda maraqlı olduğunu qeyd edib.
Tərəflər strateji xarakter daşıyan ikitərəfli münasibətlərin bütün spektrləri, habelə beynəlxalq və regional məsələlər üzrə müxtəlif səviyyələrdə siyasi dialoqun bundan sonra da fəal surətdə inkişaf etdirilməsinə hazır olduqlarını ifadə ediblər.
Görüş zamanı, həmçinin qarşılıqlı maraq doğuran digər məsələlərə dair fikir mübadiləsi aparılıb.
Daha sonra nazirlər mətbuat konfransında bəyanatla çıxış ediblər. Birgə bəyanatla çıxışı zamanı Eli Kohen Azərbaycan Prezidenti İlham Əliyevə İsraildə səfirlik açılması qərarına görə təşəkkürünü bildirib. Qeyd edib ki, İsraildə Azərbaycan səfirliyinin açılması qərarı iki ölkə arasında strateji münasibətlərin dərinliyini göstərir.
İsrail xarici işlər naziri, həmçinin, yaxın günlərdə Azərbaycana səfər edəcəyini bildirib.
Eli Kohen deyib ki, səfər apreldə Azərbaycan Hökuməti ilə İsrail Hökuməti arasında Birgə Komissiyanın iclası çərçivəsində baş tutacaq. "Ölkələrimiz arasında ticarət əlaqələrini yaxşılaşdırmaq üçün nümayəndə heyətimizlə birgə Azərbaycana səfərimizi gözləyirəm", - E.Kohen vurğulayıb.
"İsrail və Azərbaycan İranın təhdidini bölüşür" – deyən Eli Kohen "İran regionumuzu təhdid edir, terrora dəstək verib maliyyələşdirməklə Yaxın Şərqdə qeyri-stabillik yaradır. Biz İrana qarşı birgə hərəkət etməliyik. İranın nüvə imkanlarını genişləndirməsinə imkan verməməliyik", - deyə əlavə edib.
İsrailə Azərbaycanın mövqeyini dəstəklədiyi üçün minnətdarıq – bunu isə Nazir Ceyhun Bayramov deyib.
İsrailin İkinci Qarabağ müharibəsində Azərbaycanın mövqeyini dəstəklədiyini xatırladan nazir qeyd edib ki, Azərbaycan torpaqlarının Ermənistanın işğalı altında olduğu 30 il ərzində İsrail Azərbaycanın ərazi bütövlüyünə və suverenliyinə dəstək verib.
“İsrailə Azərbaycanın mövqeyini dəstəklədiyi üçün minnətdarıq. Müharibədə Azərbaycanın müdafiəsi üçün qəhrəmanlıq göstərərək həlak olanlar arasında yəhudi əsilli azərbaycanlılar da vardı”, - deyə C.Bayramov əlavə edib.
Ceyhun Bayramov diqqətə çatdırıb ki, son 30 ildə İsrail və Azərbaycan arasında müxtəlif sahələrdə əlaqələr inkişaf edib. Azərbaycan və İsrail xüsusilə də təhlükəsizlik, iqtisadiyyat və enerji sahələrində fəal əməkdaşlıq edir.
"Azərbaycanın İsraildə səfirliyinin açılması barədə qərar ikitərəfli əməkdaşlığın möhkəmləndirilməsi istiqamətində önəmli addım oldu", - deyə C.Bayramov əlavə edib.
C.Bayramov qeyd edib ki, Azərbaycan azad olunmuş ərazilərinin bərpası prosesində İsrail şirkətlərinin marağını yüksək qiymətləndirir.
Eyni gündə Azərbaycan Respublikasının xarici işlər naziri İsrail Dövlətinin müdafiə naziri Yoav Qallant ilə görüşüb.
Xarici İşlər Nazirliyindən verilən məlumata görə, görüşdə iki ölkə arasında müdafiə, hərbi-texniki və digər aidiyyəti sahələr üzrə əməkdaşlıq, o cümlədən regional və beynəlxalq təhlükəsizlik məsələləri müzakirə olunub.
Daha sonra İsrailin Baş naziri Benyamin Netanyahu və Azərbaycanın xarici işlər naziri Ceyhun Bayramov arasında görüş keçirilib. Bu barədə İsrailin Azərbaycandakı səfiri Corc Dik tvitter hesabında qeyd edib.
Bildirilib ki, görüş zamanı regional məsələlər müzakirə edilib, ikitərəfli əməkdaşlığımızın gücləndirilməsinə dair razılıq əldə olunub.
Görüşlərin ardından İsrailin Tel-Əviv şəhərində Azərbaycan səfirliyinin təntənəli açılış mərasimi keçirilib.
