2023-cü il martın 28-i saat 21:51-də Azərbaycan Respublikası Milli Məclisinin deputatı Mustafa Fazil Qəzənfər oğluna yaşadığı evin qarşısında - Bakı şəhəri, Sabunçu rayonu, Zabrat-1 qəsəbəsi, Babək küçəsi ev 2 “Z” ünvanında “Kalaşnikov” konstruksiyalı avtomat silahından atəş açılaraq terror aktı törədilib.
Terror aktı nəticəsində Fazil Mustafa bədənin sağ çiyin qurşağını və sağ budun aşağı üçdə birini dəlib keçən güllə yarası alıb. Ona zəruri tibbi xidmətlər göstərilir və vəziyyəti stabil olaraq qiymətləndirilir. Həyati təhlükəsi yoxdur. Faktla bağlı Azərbaycan Respublikası Dövlət Təhlükəsizliyi Xidmətinin İstintaq Baş İdarəsində Cinayət Məcəlləsinin 277 (dövlət xadiminin və ya ictimai xadimin xidməti və ya siyasi fəaliyyətinə son qoymaq və ya bu fəaliyyətə görə qisas almaq məqsədilə onun həyatına sui-qəsd etmə) və 228.2.1-ci (qabaqcadan əlbir olan bir qrup şəxs tərəfindən qanunsuz olaraq odlu silah, onun komplekt hissələrini, döyüş sursatı əldə etmə, saxlama, daşıma və gəzdirmə) maddələri ilə cinayət işi başlanıb. Terror aktını törətmiş şəxsin və cinayət hadisəsi ilə əlaqəsi olan digər şəxslərin müəyyən olunaraq cinayət məsuliyyətinə cəlb edilməsi istiqamətində kompleks təxirəsalınmaz əməliyyat-istintaq tədbirləri həyata keçirilir.
Terror hücumuna məruz qalan millət vəkili Fazil Mustafa hadisə ilə bağlı ilk açıqlama verib.
F.Mustafa açıqlamasında bunları deyib:
“Evə qədər sürdüm. Maşını qaraja daxil etmək istəyəndə birdən nə olduğunu başa düşmədim. Pultun düyməsini sıxıb qaraja daxil olmağa hazırlaşırdım. Birdən maşının “podpres”i silkələndi. Çiynimdə dəhşətli ağrı hiss eləyirdim. Ağrılardan sonra bunun atəş zərbəsi olduğunu anladım, çünki atəş səslərini eşitdim. Qapını açıb düşdüm. Darvazaya tərəf bir neçə addım atanda artıq ikinci güllə mənə dəydi. Ayağımdan yaralandım. Evə gedərək tez qapını bağladım".
Millət vəkilinin sözlərinə görə, sonra qapını bağlayaraq Təcili Yardım və hüquq-mühafizə orqanlarına məlumat veriblər: "Təcili yardım maşınında özümü təhlükəsiz hiss edəcəyim xəstəxanaya aparılmağı xahiş etdim. Amma çox qan itirmişdim. Bədənim əsirdi. Daha heç nə xatırlamıram".
Danışıq zamanı F.Mustafanın həyat yoldaşı və oğlu da yanında imiş. Həyat yoldaşı əlavə edib ki, qorxulu anlar yaşayıblar. Fazil Mustafa isə möcüzə baş verdiyini əlavə edir: “Özüm də başa düşmədim ki, necə sağ qaldım. Allah saxladı. Möcüzə oldu”.
Deputatın dostunun sözlərinə görə, hadisə Fazil Mustafanın kiçik qızının gözü önündə baş verib.
Fazil Mustafanın da mütəmadi olaraq Tehrandakı teokratik rejimi sərt tənqid etməsi, Güney Azərabycandakı soydaşlarımızın hüquqlarının kütləvi və total şəkildə pozulmasından bəhs etməsi, təbii ki, onun İrandakı hakimiyyət daxilində olan "mühafizəkar"larla radikalların rəğbət bəslədiyi, yaxud soyuqqanlı yanaşdığı siyasətçilər sırasına şamil olunmasına rəvac verə bilməz.
Araşdırmanın və təhqiqatın gedişini, dövlət qurumlarının rəsmi açıqlamalarını gözləyək. Lakin bəlli olan budur ki, hər birimiz dövlətimizin təhlkəsizliyi üçün sayıq olmalı, Azərbaycana qarşı düşmən mövqe tutanları seçməyi bacarmalıyıq.
Fazil Mustafaya hücum üçün 28 mart tarixinin seçilməsinin də təsadüf olmadığı iddia edilir. Belə ki, həmin gün Dövlət Təhlükəsizliyi Xidmətinin yaranmasının 104-cü ildönümüdür. Məhz bu ildönüm zamanı edilən hücum da mesaj xarakteri daşıya bilərmi?
Daha bir iddia isə İsraildə səfirliyimizin binasının açılması ilə bağlıdır. Belə ki, XİN başçısı Ceyhun Bayramov həmin gün səfirliyimizin açılışında iştirak etmək üçün İsrailə və Fələstinə səfərə yola düşüb. Eyni zamanda bu terror İslamda müqəddəs sayılan Ramazan ayına təsadüf edir.
Hüquqşunas Şəmsəddin Əliyev “Bakı-Xəbər”ə açıqlamasında bildirdi ki, bu hadisə ilə bir sıra məqamlar arasında bir paralellik hiss edilir: “Bir müddət əvvəl İranda Azərbaycan səfirliyinə edilən hücumla, burada Fazil bəyə edilən terror aktında sinxronluq nəzərə çarpır. Hər iki cinayətdə avtomat silahdan istifadə olunub. Fazil bəy sıravi vətəndaş deyil, onun deputat toxunulmazlığı var. O, sıradan olan bir deputat da deyil. Onun toxunulmazlığı var, Milli Məclisin deputatıdır, müxtəlif hadisələrə diplomatik, siyasi, hüquqi baxımdan onun tövsiyələri həmişə diqqət çəkib, bəzən də qıcıq yaradıb. Düşünürəm ki, bu cinayətin törədilməsində mütəşəkkil dəstənin iştirakı var. Kimlərin olması barədə ehtimala söykənmək olmaz, amma mənim qənaətimə görə, burada mütəşəkkil dəstənin izləri, qisasçılıq, Fazil bəyi aradan götürmək qəsdi var. Tapşırıqlar hardan gəlsə də, çox ciddi tapşırıq olduğu bəllidir. Qəsdin subyekti üzərinə götürdüyü öhdəliyi özündən asılı olmayan səbəblərə görə icra edilməyib. Müxtəlif fərziyələr irəli sürmək mümkündür. Mənim qənaətim isə belədir ki, İranda Azərbaycan səfirliyinə olan hücumla bu hücum arasında paralellik və oxşarlıq var. Amma tələsməyək. Təbii ki, istintaq prosesi davam edir, prosessual hərəkətlər zərgər incəliyi ilə araşdırılacaq. Yaxın günlərdə, bəlkə daha tez bu dəstə yaxalanacaq və çox şey bəlli olacaq. Mən Fazil bəyə şəfa, anasına isə səbr diləyirəm”.
Məhəmmədəli QƏRİBLİ
