Məlum olduğu kimi, martın 25-də Brüsseldə Güney Azərbaycan türklərinin “Azadlıq və Ədalət Yürüşü” adlı mitinqi keçirildi. Molla rejiminə qarşı keçirilən aksiyaya dünyanın müxtəlif ölkələrindən soydaşlarımız qatılıb.
Tehran rejiminə qarşı soydaşlarımızın keçirdiyi “Azadlıq və Ədalət Yürüşü”nün nəticələri ciddi şəkildə müzakirə edilməkdədir.
“Biz gözlədiyimiz nəticəni əldə etdik”
Azərbaycan Milli Dirəniş Təşkilatının sözçüsü, əslən Güney Azərbaycandan olan və hazırda Türkiyədə yaşayan Məcid Cavadi Araz “Bakı-Xəbər”ə şərhində bildirdi ki, sözügedən yürüşün əhəmiyyəti çox böyükdür.
- Məcid bəy, siz özünüz aksiyaya qatıla bildinizmi?
- Mən özüm bu aksiyada iştirak etmirdim. Türkiyədə yaşadığım üçün, təəssüf ki, aksiyaya qatılmağım mümkün olmadı. Amma prosesi dərindən izləyə bildim. Bildiyiniz kimi, mitinqin koordinasiya mərkəzində, eləcə də media qruplarında var idim. Koordinasiya və təşkilatçılıq işlərində aktiv iştirak etdim.
- Aksiyanının nəticələrini necə qiymətləndirmək olar?
- Mitinqə yüzlərcə insan qatıldı. Avropada yaşayan soydaşlarımızın, demək olar ki, əksəriyyəti bu mitinqə iştirak edirdi. Avropada yaşayan soydaşlarımızın bir çoxu Almaniyadan, Hollandiyadan, İsveçdən və başqa ölkələrdən toplanıb Brüsselə getdilər. Aksiyada xeyli sayda insan iştirak edirdi. Biz gözlədiyimiz nəticəni əldə etdik. Güney Azərbaycan milli hərəkatının səsini Avropanın böyük bir hissəsinə hayqıra bildik. İstər batı dövlətləri, istər Azərbaycan, istər Türkiyə Güney Azərbaycan türklərinin molla rejiminə qarşı etiraz səsini eşitdilər, mübarizələrini gördülər. Hərəkatın səviyyəsini, məqsədini, amalını gördülər, gördülər ki, bu hərəkat Avropanın mərkəzində öz ətrafına yüzlərcə insan toplaya bilirsə demək, yurd içində də bunun ciddi gücü vardı.
- Avropa mediası aksiyanı lazımi səviyyədə işıqlandıra bildimi?
- Bu mitinq bir sıra Qatı mediasında əksini tapdı, bu barədə xəbərlər yayıldı. Amma təbii ki, Qərb mediasında bunun çox geniş əks-səda tapdığını desək doğru olmazdı. Şübhəsiz, bir sıra media orqanları yaydılar. Əlbəttə, xəbər yayanlar da önəmli, nüfuzlu medialar idi. Amma bu mitinq barədə məlumatın mediaya az, yaxud çox çıxması o demək deyil ki, böyük güc mərkəzləri, xarici dövlətlər, bu məsələ ilə ilgilənənlər bu aksiyanı görmədilər. Biz bilirik ki, İran Qərb dövlətlərinin diqqət mərkəzindədir. Güney Azərbaycan və türk faktoru ki, İranda çox ciddi bir məsələdir, bunlar hamısı diqqət mərkəzindədir.
- Aksiyanın qətnaməsi də diqqəti çəkdi...
- Bəli, mitinqin sonunda 12 maddəlik qətnamə qəbul edildi. Bu qətnamədə Güney Azərbaycan türklərinin, eləcə də digər türklərin (orada qaşqay türkləri də, qeyri-fars millətlər də iştirak edib) tələbləri əksini tapdı. İran dövlətinin faşist, repressiv, basqıcı siyasəti pislənildi. Dünyadan istənildi ki, İran adlı dövlətin legitimliyini rədd etsin, SEPAH-ı terrorçu təşkilatlar siyahısına salsın. Burada Güney Azərbaycanla bağlı özəl tələblər səsləndirildi. Dünyadan istənildi ki, Güney Azərbaycanın azadlıq, ədalət və milli hökumət tələbi qəbul edilsin, dəstəklənsin. Çünki bu insani və qanuni bir tələbdir. Eləcə də, bu aksiyanın qətnaməsində Quzey Azərbaycana bir dəstək vardı. Açıq şəkildə cənab Prezidentə təşəkkür edildi ki, bir ödvlət rəhbəri olaraq Güney Azərbaycanın səsini beynəlxalq arenalarda qaldırır. Azərbaycanın Tehrandakı səfirliyinə qarşı edilən terror hücumu pislənildi, bu məsələdə də Azərbaycan dövlətinə qəti bir dəstək verildi. Düşünürəm ki, bu qətnamə bütövlükdə Güney Azərbaycan türklərinin, eləcə də İranın digər türk əhalisinin, qaşqayların, türkmənlərin hamısının tələblərini tam şəkildə ortaya qoya və dünyaya çatdıra bildi.
- Növbəti bir müqavimət tədbiri keçirilə bilərmi ki, bu molla rejiminə daha agir zərbə vursun?
- Təbii ki, bu bizim bu istiqamətdə ilk mitinqimiz idi. Mütləq bunun davamı digər ölkələrdə də olacaq. Koordinasiya mərkəzi düşünüb-daşınacaq, bəlkə Almaniyada, bəlkə İsveçdə, bəlkə başqa ölkələrdə, bəlkə də yurd içində bu mitinqin davamı gələcək. Bu bir başlanğıc idi, son deyil, bunun mütləq davamı olacaq. Əlbəttə, fars-faşist molla rejimi bu məsələdən çox narahatdır, qıcıqdır. Çünki həqiqətən də həm İran İslam rejimi, həm ondan daha qəddar, faşist olan fars müxalif qüvvələr bu aksiyadan şok olublar, qorxuya düşüblər. İstər daxildə, istərsə də xaricdə hərəkatımıza, fəallarımıza qarşı basqıların artmasını tam təbii qarşılayıram. Amma parfarsistlərin bu davranışlarının bizim mübarizəmizə, mücadiləmizə heç bir xələl gətirə bilməz və biz tam gücümüzlə mübarizəmizə davam edəcəyik.
- Brüssel aksiyasından sonra molla rejimi soydaşlarımıza qarşı daha da qəddarlaşıb, eyni zamanda da Şimali Azərbaycana qarşı əsası olmayan iddiaları genişləndirib. Rejimin müqavimətini zədələmək ucun daha hansı işlər görülməlidir?
- Son həftələrdə özəlliklə Quzey Azərbaycana İran dövlətinin şantajları, basqıları daha da artıb, açıq şəkildə hərbi təhdidlər. Bilirik ki, bunun əsas səbəbi Tehran rejiminin ölkə daxilindəki nüfusunun 100-də 40-ı olan 10 milyonlarca türk vətəndaşının milli oyanış və milli mücadilə, milli müqavimət hərəkatından olan qorxusudur. Fars rejimi bilir ki, bu hərəkat qarşıda digər qeyri-fars millətlərin hərəkatı ilə birləşdiyi zaman müqavimət şansı olmayacaq. Bilir ki, bunun ilham qaynağı da Quzey Azərbaycan Cumhuriyyətidir. Ona görə də bu basqıları artırır. Bu səbəbdən də, bizim mübarzə və mücadiləmiz daha da atacaq, kəskinləşəcək və biz təbii, İran dövlətinin Quzey Azərbaycana uyğuladığı basqıları qarşılıqsız qoymayacağıq. Ümumilikdə düşünürəm ki, çox başarılı bir mitinq oldu. Qoyduğumuz hədəflərin hamısına çatdıq. Deyərdim ki, daha artığına nail olduq. Amma təbii olaraq bu bir başlanğıc idi və mütləq davamı olacaq. Əminəm ki, daha böyük başarılar əldə edəcəyik.
İradə SARIYEVA
