NATO-nun keçmiş baş katibi və Danimarkanın keçmiş baş naziri Anders Foq Rasmussen Ermənistana səfər edəndən və Baş nazir Nikol Paşinyanla görüşdən sonra Azərbaycan əleyhinə kəskin ittihamlarla dolu məqalə ilə çıxış edib.
“Proyekt Sindikat” (Project Syndicate) nəşrində yayımlanan məqalədə o, Azərbaycanı 2020-ci il atəşkəs razılaşmasını açıq şəkildə pozaraq, “Dağlıq Qarabağda humanitar böhranı” qızışdırmaqda və növbəti dəfə qonşu Ermənistanı hərbi təcavüzlə hədələməkdə ittiham edib.
Anders Foq Rasmussen bu addımını necə dəyərləndirmək olar?
Hərbi-siyasi ekspert, ehtiyatda olan polkovnik-leytenant İbrahim Rüstəmli “Bakı-Xəbər”ə açıqlamasında bildirdi ki, əslində “Dağlıq Qarabağ” adlı rayon yoxdur, Qarabağ adlı ərazimiz var: “Ərazi dünya ictimaiyyəti tərəfindən Azərbaycanın ərazisi kimi tanınıb. Yəni Qarabağ Azərbaycanın ərazi bütövlüyü üçün əsas simvollardan birinə çevrilib. Qərb mediasında bu barədə müxtəlif baxış bucaqları altında müzakirələr aparılır və bu müzakirələrin böyük bir hissəsi Azərbaycanın ərazi bütövlüyü prinsipinə ziddir. Burada söhbət nədən gedir? Bilirsiz ki, Azərbaycan 44 günlük savaş nəticəsində Qarabağın, demək olar ki, 30 il ərzində işğal altında qalan ərazilərini düşməndən təmizlədi. Təbii ki, bu əraziyə Xankəndi də, Ağdərə də, Xocalı da, Xocəvənd də daxildir. Təəssüf ki, 2020 - ci ilin 3 tərəfli razılaşmasında bu barədə kifayət qədər məlumatlar var. Ancaq buna baxmayaraq, Azərbaycanın təbii sərvətlərinin Xankəndi istiqamətində qanunsuz istismar olunması, Azərbaycanın faydalı qazıntılarının ermənilər tərəfindən qanunsuz şəkildə mənimsədilməsi həm beynəlxalq hüquqa, həm Azərbaycanın Konstitusiyasına, həm də Azərbaycanın ərazi bütövlüyünə ziddir. Biz artıq uzun müddətdir ki, ekoloji terrora qarşı mitinqlər keçiririk və gənclər bu istiqamətdə öz sözlərini deyirlər. Əgər əsas stimul olaraq Azərbaycanın ərazi bütövlüyündən danışırıqsa, burda heç bir humanitar fəlakətdən söhbət gedə bilməz. Azərbaycan heç bir halda humanitar fəlakətlə bağlı nəsə bir addım, nəsə bir təxribat törətməyib. Azərbaycan prezidentinin də bu xüsusda çıxışlarında yer alan əsas fikir ondan ibarətdir ki, Qarabağ ərazisində yaşamaq istəyən ermənilər Azərbaycan vətəndaşlığını qəbul etməlidir, Azərbaycan pasportu almalı və Azərbaycanın qanunları çərçivəsində yaşamalıdırlar. Yəni onlar üçün heç bir istisna olmayacaq. Təəssüf ki, son dövrlərdə alternativ, gizli yollar vasitəsilə rus sülhməramlılarının müşayiəti ilə həmin ərazilərə qanunsuz silahdaşımalar, eyni zamanda canlı qüvvənin sızması prosesi baş verib. Xüsusilə də İran tərəfindən İran İslam İnqilabı keşikçiləri korpusunun 30 dan çox nümayəndəsinin hələ keçən il ərzində Laçın dəhlizindən Qarabağa keçirilməsi daxil olmaqla, bütün bunların hər biri ayrı-ayrılıqda Azərbaycana qarşı təxribat hadisəsidir. Azərbaycan bu təxribatların qarşısını almaq üçün alternativ planlardan istifadə etməlidir və edir də”.
Ekspertin sözlərinə görə, təəssüf ki, NATO Qərb və Avropa studiyalarında Azərbaycana qarşı çox sərt, həqiqətə uyğun olmayan, qanundan kənar reaksiyalar verir: “Amma bununla bağlı Azərbaycan Prezidentinin fikri hamımıza aydındır. Cənab Prezidentimiz öz çıxışında bildirdi ki, heç bir güzəştə getməyəcək, kim nə deyir-desin, Azərbaycanın ərazi bütövlüyü bərpa olunmalıdır. Sərhədlərin delimitasiyası həm üçtərəfli razılaşma əsasında, 2020-ci ildə kapitulyasiya aktına uyğun olaraq, həm də Beynəlxalq hüququn tələbləri çərçivəsində öz həllini tapmalıdır. Ona görə də, bu gün Avropa və Qərb mediasının, NATO-nun nə demələrindən asılı olmayaraq, Azərbaycan heç bir beynəlxalq hüquq normasını pozmur, öz ərazi bütövlüyünün bərpası, təbii sərvətlərinin, meşə təsərrufatlarının qorunması uğrunda mübarizə aparır. Bundan sonra da biz bu istiqamətlərdə addımlar atacağıq. Bu elə bir məsələdir ki, Azərbaycan bir addım belə geri çəkilməməlidir. Azərbaycan bir addım geri çəkilərsə, yüz addım geri düşə bilər. Ona görə də, biz bu gün dövlət başçısının bu istiqamətdə həyata keçirdiyi siyasəti dəstəkləyirik, bunu Azərbaycan dövləti və milli maraqlarına xidmət edən böyük bir proses kimi dəyərləndiririk”.
Məhəmmədəli QƏRİBLİ
