Ermənistan xarici işlər naziri Ararat Mirzoyan parlamentin xarici əlaqələr daimi komissiyasının növbədənkənar iclasında Çinlə əlaqələrin genişləndirilməsindən bəhs edib. Mirzoyan Çinlə münasibətlərin dərinləşməsinin Ermənistan üçün son dərəcə vacib olduğunu bildirib.
O qeyd edib ki, Ermənistan logistik marşrutların inkişafında maraqlıdır: “Ermənistan və Çin arasında münasibətlərin dərinləşməsi bizim üçün son dərəcə vacibdir. Bildiyiniz kimi, Çin də dünyanın müxtəlif yerlərində və xüsusilə bizim regionda, o cümlədən “Orta dəhliz”də logistik marşrutların və infrastrukturun inkişafında maraqlıdır. Biz də logistika baxımından belə layihələrin bir hissəsi olmaqda maraqlıyıq”.
O da məlumdur ki, “Orta dəhliz”in Ermənistandan keçməsi üçün yeganə yol coğrafi baxımdan Zəngəzur dəhlizidir. Çünki Çindən başlanan bu dəhliz Qazaxıstandan keçməklə Xəzər dənizi vasitəsilə Azərbaycan üzərindən Avropaya daşımaları nəzərdə tutur. Nəzərə alsaq ki, Ermənistan Zəngəzur dəhlizinə qarşıdır, o zaman İrəvanın timsalında hansı logistik marşrutun inkişafından söhbət gedə bilər?
“Mirzoyan yaxşı olardı ki, “Orta dəhliz”dən danışanda bir xəritəyə baxsın”
Məsələyə münasibət bildirən iqtisadçı-ekspert Fuad İbrahimovun fikrincə, Zəngəzur dəhlizi olmadan Ermənistanın Çinlə logistik sahədə əməkdaşlıq etməsi mümkünsüzdür: “Zəngəzur dəhlizi Ermənistanın yeganə çıxış yoludur. Ermənilərin coğrafiyadan az da olsa anlayışları varsa, onların iqtisadi dirçəliş proqramı yalnız o vaxt reallaşa bilər ki, Azərbaycan və Türkiyə ilə münasibətlər düzəlsin. Bunun ikinci variantı yoxdur. Ermənistanın ən “hörmətli müttəfiqi” Rusiyadırsa, bu gün onların bu ölkəyə ən uyğun çıxışı Azərbaycan vasitəsilə mümkündür. Ermənistan Rusiya ilə əlaqəni Gürcüstanın Yuxarı Lars keçidi ilə qurur. Bu keçid də payız-qış mövsümündə çox vaxt bağlı olur. Üstəlik, yay mövsümündə Gürcüstana gələn turistlərin sayı artdığı üçün həmin yolda yük maşınlarının hərəkəti məhdudlaşır. Ona görə də bütün mövsümlərdə həmin yolda problemlər olur. Deməyim odur ki, Yuxarı Lars yolu Ermənistan üçün əlverişli deyil və ola da bilməz. Yeganə yol Zəngəzur dəhlizidir. Ermənistanın Çinlə logistik sahədə əməkdaşlığı Zəngəzur dəhlizi olmadan mümkün deyil. İran üzərindən Ermənistanla nəqliyyat baxımından əlaqə qurmaq Çinə sərfəli deyil. Bu baxımdan Mirzoyan yaxşı olardı ki, “Orta dəhliz”dən danışanda bir xəritəyə baxsın. Ondan sonra hansısa təşəbbüslə çıxış etsin. Ermənistanda müəyyən sayda ciddi iqtisadçılar var. Maraqlıdır ki, orada özünə hörmət edən iqtisadçılar bu barədə danışmır. Niyə? Ona görə ki, bu gün onlar siyasətçilərin girovuna çevriliblər. Əgər onlar reallığı açıq bəyan etsələr, dərhal ciddi təzyiqlərlə üzləşəcəklər. Bu baxımdan hesab edirəm ki, Azərbaycansız Ermənistanın iqtisadi inkişafı mümkünsüzdür”.
Vidadi ORDAHALLI
