Milli Məclisin deputatı, Milli Cəbhə Partiyasının sədri Razi Nurullayev Ağ şəhər bulvarında ona müsahibə üçün imkan verilmədiyini bildirib. Bununla bağlı o, öz "Facebook" səhifəsində yazıb.
Həmin paylaşımı olduğu kimi təqdim edirik:
“Bu gün Ağ şəhər bulvarında video müsahibə verirdim. Jurnalist zəng elədi, mən də hotelin önündə idim. Dedim ki, bulvara gəl. Müsahibə zamanı bulvar işçiləri gəlib dayandırdı. Özümü təqdim elədim, tanıdıqlarını, hörmət etdiklərini dedilər. Bulvar İdarəsi rəhbərliyinə zəng etdilər, 10-15 dəqiqə gözlədim. Müsahibəni çəkilib bu bərbad görkəmli yerdə verməli oldum.
Bu qərarı kim verib? Bakı Bulvar İdarəsinin rəhbəri? Hansı haqla? Mənim müsahibə verməyim kimə məruzə edildi və kim bunu qadağan etdi? Milli Məclisin İnsan Hüquqları Komitəsinin üzvü bulvarda müsahibə verə bilməz?
Sonra da deyirsiniz ki, bizi tənqid edirlər. Bu cür yarıtmaz qaydaları qoyanlar ölkəmizin adını batırırlar. Mili Məclisdə təmsil olunan deputat xalqın, ölkənin, dövlətin düşməni ola bilərmi? Bunun üçün əsas veribmi? Məgər biz hər gün dövlətçilik, ölkəmiz və xalqımız üçün canımızı sipər etmirikmi? Bu nə münasibətdir? Mən İranın, Ermənistanın düşmənçiliyi, ölkəmizin dirənişi haqqında danışırdım. Mən Bakı Bulvar İdarəsinin rəhbərindən üzrxahlıq zəngi gözləyirəm…”.
Dənizkənarı Bulvar İdarəsinin mətbuat rəhbəri Könül İmanverdiyevanın sözlərinə görə, Razi Nurullayevin Ağ şəhər bulvarında Novruz bayramı tətilində müsahibəsinə heç bir qadağa qoyulmayıb: “Bulvar əməkdaşları tərəfindən müsahibə üçün lazımı şərait yaradılıb”.
Bulvar İdarəsi faktı təkzib etsə də, analoji vəziyyətlə “Xəzər Xəbər”in əməkdaşları da üzləşiblər. Bulvar ərazisində çəkiliş aparmaq istəyərkən Dənizkənari Bulvar İdarəsinin mühafizə xidməti onlardan çəkilişi dayandırmağı tələb edib. Əməkdaşlara bildirilib ki, ərazidə icazəsiz çəkiliş aparmaq qadağandir.
21-ci əsrdə paytaxtın mərkəzində deputatlara, media nümayəndələrinə və ümumiyyətlə istənilən şəxsə belə mənasız qadağanın qoyulması absurddur, gülüncdür.
Maraqlıdır, görəsən dünyanın hansı inkişaf etmiş ölkəsində belə bir qayda və ya qadağa var və baş verən hadisəyə görə Bulvar İdarəsi deputatdan üzrxahlıq edibmi? Bunu aydınlaşdırmaq üçün Razi Nurullayevlə əlaqə saxladıq. Millət vəkili qəzetimizə açıqlamasında bildirdi ki, həmin hadisədən sonra onunla həmin idarədən heç kim əlaqə saxlamayıb: “Əksinə, çox absurd olan iddia ortaya qoyurlar. Görürsünüzmü, məni yalan danışmaqda ittiham edirlər. İddia edirlər ki, güta mənə şərait yaradılıb. Çox böyük yalan danışırlar və mən bunu dövlət qurumuna yaraşdırmıram. Onların dediklərində çox böyük məntiqsizlik var. Öz əməlləri ilə dediklərini təkzib edirlər. Dünən “Xəzər” televiziyasının jurnalistlərinə qarşı da analoji qadağanı tətbiq ediblər. Onda məntiq hardadır? Qeyd edirlər ki, Nizamnamələrində belə yazılıb. Məndə olan məlumata görə, Nizamnamələrində belə qadağa yoxdur. Hətta olsa belə, bu çox absurddur. Niyə belə olmalıdır? Bəyəm bulvar mühüm dövlət sirlərinin qorunduğu strateji obyektdir ki, belə mühafizə olunur? Mənim mühafizəyə iradım yoxdur, çəkilişi niyə qadağan edirlər? Mən hələ də onlardan üzürxahlıq zəngini gözləyirəm. Təəssüf ki, səsləri çıxmır. Bu addımı millət vəkilinə qarşı edilən ən böyük hörmətsizlik kimi qəbul edirəm. Mən məcbur oldum, müsahibəni bulvardan kənarda, uçuq bir tikilinin içində verdim. Şərait yaratsaydılar, bunu edərdim?”
Məhəmmədəli QƏRİBLİ
