Erməni işğalına şərik olanlar Azərbaycana qarşı informasiya savaşında birləşib...

“Erməni havadarları, Ermənistanın işğalçılıq siyasətinə şərik olan ölkələr bizə qarşı informasiya müharibəsi elan ediblər”. Bunu Prezident İlham Əliyev Novruz bayramı münasibətilə Tərtər rayonunun Talış kəndində Azərbaycan xalqına müraciətində deyib.

Ölkə başçısının sözlərinə görə, Ermənistan rəhbərliyinin “Qarabağ Ermənistandır və nöqtə” sözlərinə Ermənistanın arxasında dayanan qüvvələr, o cümlədən ovaxtkı Minsk Qrupuna həmsədrlik edən ölkələr heç bir reaksiya vermədi: “İndi Azərbaycan öz doğma torpaqlarını azad edəndən sonra, görün bizə qarşı nə qədər ədalətsiz addımlar atılır, nə qədər çirkin əməllər törədilir. Erməni havadarları, Ermənistanın işğalçılıq siyasətinə şərik olan ölkələr bizə qarşı informasiya müharibəsi elan ediblər. Bəzi ölkələrdə Azərbaycanın daxili işləri ilə bağlı hansısa konfranslar, simpoziumlar təşkil edirlər. Bəzi ermənipərəst ölkələr dünya xəritəsində olmayan, Azərbaycanın ərazisində mövcud olmayan dırnaqarası “Dağlıq Qarabağın müstəqilliyini” tanıyırlar. Bu, nə deməkdir? O deməkdir ki, işğal dövründə bütün bu qüvvələrin yeganə amalı bu işğalı əbədiləşdirmək idi. Bu münaqişəni həll etmək yox, dondurmaq idi”.

• “Erməni separatçılarına qahmar çıxanlar digər separatçılara münasibətdə daha sərt və kəskin mövqe sərgiləyirlər”

Məsələyə münasibət bildirən media eksperti Yadigar Məmmədlinin fikrincə, həqiqətən də Ermənistanı himayə edən bəzi dövlətlər, müəyyən beynəlxalq dairələr Azərbaycana qarşı informasiya savaşı elan ediblər: “Düzdür, ümumən bizə qarşı hər zaman ədalətsiz mövqe olub. 30 il ərazilərimiz işğal altında qaldı, yaşayış məntəqələri məhv edildi, amma bu barədə Ermənistana dayaq olan ölkələrin informasiya resurslarında heç nə deyilmədi. Yüz minlərlə məcburi köçkün həyatı yaşayan soydaşımızın üzləşdiyi məhrumiyətlər, əzab-əziyyəti görməzdən gəldilər. Bununla bağlı geniş reportajlara, verilişlərə yer verilmədi. Hər vasitə ilə bunu unutdurmağa çalışırdılar. Sanki bir belə fəlakətlər yaşanmayıb. Azərbaycan 44 günlük Vətən müharibəsində əldə etdiyi zəfərdən sonra bizə qarşı informasiya müharibəsi elan etdilər. Qarabağda olmayan erməni mədəni irsinin müdafiəsinə qalxdılar. Guya biz onları məhv etmişik. Bizə qarşı informasiya savaşı elan edən dairələr nədənsə postsavet məkanındakı digər separatçı qurumlarla bağlı analoji mövqe sərgiləmədilər. Yəni, Qarabağdakı erməni separatçılarına qahmar çıxanlar, digər separatçılara münasibətdə daha sərt və kəskin mövqe sərgiləyirlər. Məsələn, Fransanın media resursları hər fürsətdə Qarabağ separatçılarına meydan verirlər. Ancaq bundan fərqli olaraq, Dnestryanı bölgədə, Abxaziyada, Cənubi Osetiyadakı separatçılara bu imkan tanınmır. Donbas separatçılarını ümumiyyətlə yaxın buraxmırlar. Aydın məsələdir ki, bütün bunlar rəsmi Parisin təlimatı əsasında həyata keçirilir. Bütün bunların fonunda bizə qarşı ona görə informasiya savaşı aparılır ki, müharibədə əldə etdiyimiz qələbəni heçə endirsinlər. Azərbaycan hansısa mərhələdə geri çəkilməyə məcbur olsun. Çünki müharibədən 2 ildən çox vaxt keçsə də, hələ də qələbəmizi həzm etmək istəməyən dövlətlər var. Onlar bütün vasitələrlə çalışırlar ki, separatçılar yenidən təşəbbüsü ələ alsınlar. Ancaq onların bütün planları fiaskoya uğrayacaq və ən azından ona görə ki, qarşılarındakı 30 il əvvəlki Azərbaycan deyil. Bizim güclü dövlətimiz var”.

Vidadi ORDAHALLI