Azərbaycanın unikal əməliyyatı - Xankəndiyə aparan gizli torpaq yollar itkisiz nəzarətə götürüldü...

Xəbər verildiyi kimi, Ordumuz Laçın yolunun şimalındakı torpaq yollardan qanunsuz fəaliyyətlər üçün istifadənin, eləcə də Ermənistan tərəfindən silah-sursat daşımaqla vəziyyətin gərginləşməsinin və potensial təxribatların törədilməsinin qarşısının alınması məqsədilə lokal zəruri nəzarət tədbirləri həyata keçirib.

Bildirilir ki, Ordumuz Şuşadan enərək şimalda Kosalar, şərqdə Turşsuya qədər bütün alternativ yolları azad edərək, nəzarətə götürüb.

Əməliyyatlarda itki olmayıb. Torpaq yollar Ordumuz tərəfindən tam nəzarətə götürülüb. Heç bir qan tökülməyib. Proses azsaylı qüvvə tərəfindən həyata keçirilib. Düşmən qazdığı səngərləri və açdığı yolları bir güllə də atmağa cəsarət etmədən tərk edib.

Ordumuzun həyata keçirdiyi bu əməliyyat hərbi-texniki aspektdən necə dəyərləndirilə bilər?

Hərbi-siyasi ekspert Emin Həsənli “Bakı-Xəbər”ə açıqlamasında bildirdi ki, Azərbaycan Ordusu ard-arda çox gözəl əməliyyatlar keçirir: “Bilirsiz ki, 2018-ci ildə yüksəklikləri alma əməliyyatı Naxçıvanda keçirildi. Çox uğurlu əməliyyat oldu, hakim yüksəkliklər nəzarətə alındı. Bunun ardınca bir neçə vacib əməliyyat keçirildi ki, bunlar 2020-ci ilin Vətən müharibəsinə qədər davam etdi və torpaqlarımız işğaldan azad olundu. Keçən il Fərrux yüksəkliyinin azad edilməsini də sizə xatırlada bilərəm ki, bu da çox önəmli idi. Bu əməliyyat imkan verirdi ki, Qarabağda Xankəndi və  Əsgəran istiqaməti, Ağdərə yolu tam nəzarətə keçsin. İndi də belə əməliyyatlar davam edir. Sonuncu əməliyyatın əhəmiyyəti ondan ibarətdir ki, Ermənistan və onun havadarları bölgədə Azərbaycan hərbi qüvvələrinin tam nəzarəti ələ keçirdiyini aydın görür. İtki vermədən belə strateji yüksəkliklər azad edilir. İkincisi, Azərbaycan Ordusu müasir texnikadan istifadə edərək, həm bölgəni bütünlükdə nəzarətdə saxlayır, həm də lazım olan strateji yüksəklikləri azad edir və Ermənistanın həmin yollardan istifadə edərək Qarabağa qanunsuz silah daşımasının qarşısını alır. Bu, Ermənistana bir mesajdır. 2020-ci ilin noyabrına qədər olan əməliyyatların əhəmiyyəti onda idi ki, Azərbaycan torpaqları azad edilmişdi. Ermənistan dünya güclərinə arxalanaraq elə bilirdi ki, Azərbaycan bu əməliyyatları keçirməyəcək. 2020-ci il noyabrın 10-dan sonra isə, Rusiya sülhməramlılarına arxayın olaraq, orda cinayət əməllərini davam etdirmiş, Qarabağa silah-sürsat daşımış, separatçıların Qarabağda dırnaqarası fəaliyyətlərini genişləndirməyə çalışmışlar”.

Ekspert deyir ki, onlar Azərbaycanın  daha  əvvəlki reaksiyanı verməyəcəyəyini zənn edirdilər: “İndi isə bu son olanlar onu sübut edir ki, Azərbaycan dövləti öz milli maraqlarından geri çəkilməyəcək, qısa müddətdə bütün bölgəni nəzarətə götürəcək və bu istiqamətdə zəruri tədbirləri yerinə yetirəcək. Ermənistanın bir yolu var: sülh müqaviləsini imzalayıb, öhdəliklərini yerinə yetirib, Zəngəzur dəhlizini açmalı  və Qarabağdan qoşunlarını çıxarmalıdır. Əks halda Azərbaycan bunu özü həyata keçirəcək. Necə ki, BMT - nin qətnamələrini Azərbaycan dövləti, Ordusu yerinə yetirdi, 10 noyabr bəyanatının şərtlərini də yerinə yetirmək gücündədir”.

Məhəmmədəli QƏRİBLİ