Faiq Ələkbərli: “Cani Melkonyanı vaxtilə himayə edib Ermənistana gətirənlərin cinayətkar olduğu şübhəsizdir və onların da axırı yaxşı olmayacaq”
Ermənilərin terrorçuları, daşnakları ideallaşdırması, onları qəhrəman kimi təqdim etmələri adi hala çevirilib. Birinci Qarabağ müharibəsi zamanı azərbaycanlılara qarşı vuruşan Kaliforniya doğumlu terrorçu, cani, ASALA və digər erməni terror təşkilatlarının üzvü Monte Melkonyanın ideallaşdırılması prosesi çox geniş yayılıb.
Ermənilərə məxsus müxtəlif muzdlu dəstələrin tərkibində başqa ölkələrdə yerli xalqlara qarşı döyüşən terrorçunun Birinci Qarabağ müharibəsi dövründə Ermənistana hansı yolla gətirilməsi və Qarabağda azərbaycanlılara qarşı döyüşə cəlb edilməsi məsələsi indiyə qədər müzakirə olunurdu. Üzdəniraq “qəhrəman”ın Ermənistana gizli şəkildə gətirildiyini politoloq, Erməni Amerika Araşdırmaları Mərkəzinin direktoru Suren Sarkisyan atası, səfir, dövlət təhlükəsizliyi polkovniki Armen Sarkisyanın həyatından bəhs edən “Birdən artıq həyat” (“Bolğşe odnoy jizni”) kitabında açıqlayıb.
O, kitabda “mühüm əməliyyatlar”, xüsusən də gələcək “milli qəhrəman” Monte Melkonyanın məxfi şəraitdə İrəvana köçürülməsi əməliyyatı barədə məlumat verildiyini və bu “əməliyyat”ın onun atası tərəfindən həyata keçirildiyini yazır.
Onu da qeyd eidr ki, kitab üzərində işləyərkən Ermənistanın birinci prezidenti Levon Ter-Petrosyan da ona Monte Melkonyanın Ermənistana köçürülməsi əməliyyatı barədə məlumat verib. Bundan başqa, cani barədə Serj Sarkisyandan və David Şahnazaryandan da məlumat aldığını vurğulayıb.
M.Melkonyanı azərbaycanlılara qarşı döyüşmək və amansız qətllər törətmək üçün gizli yolla Ermənistana gətirənlərin hamısı insanlıq əleyhinə cinayət törətmiş adanlardır. Monte Melkonyanın gizli şəkildə Ermənistana gətirilməsində iştirak edənlərin hamısı cinayətkardır. İlk növbədə bu planı həyata keçirən səfir Armen Sarkisyan. S.Sarkisyanın yazdığı bu üzdəniraq kitabda onun gizli şəkildə Ermənistana gətirilməsində rol oynayan şəxslərdən söhbət gedir ki, onlar barədə də bizim geniş məlumatımız var.
- “Sarkisyanlar da, Ter-Petrosyan da, Şahnazaryan da, başqaları da bəşəriyyət, insanlıq qarşısında məsuliyyət daşıyır”
AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO sədrinin müavini, siyasi şərhçi Faiq Ələkbərli bildirdi ki, Monte Melkonyan kimi bir caninin qəhrəmanlaşdırılması yolverilməzdir: “Monte Melkonyan, eləcə də onun gizli yolla Ermənistana gətirilməsini təşkil edənlərin hamısı birmənalı olaraq cinayətkardır, terrorçudur. Şübhəsiz ki, ermənilər üçün bu dırnaqarası bir “qəhrəmanlıq” məsələsidir. Melkonyanın dinc azərbaycanlı əhaliyə qarşı etdiyi cinayətlər, sui-qəsdləri, onun bütün əməlləri ermənilər üçün qəhrəmanlqı olsa da, insanlıq üçün cinayətdir. Digər tərəfdən, Melkonyan kimi terrorçunu, canini Ermənistana gətirmək və bu hərəkətə də haqq qazandırmaq yolverilməzdir. Cani Melkonyana görə Sarkisyanlar da, Ter-Petrosyan da, Şahnazaryan da, başqaları da bəşəriyyət, insanlıq qarşısında məsuliyyət daşıyırlar. Bunu edənlərin hamısı öz cəzasını alacaqdır. Çünki insanlıqdan kənar cinayətlər, əməllər heç vaxt cəzasız qalmır. Dəfələrlə tarixdə sübut olunub ki, qeyri-insani hərəkətlər edənlərin aqibəti necə olub. Bunların da aqibəti öz mahiyyətlərinə uyğun olacaq”.
F.Ələkbərli hesab edir ki, erməni cəmiyyətə belə qatillərə və canilərə haqq qazandırırsa, demək erməni cəmiyyətinin mahiyyəti də cinayət üzərində qurulub. “Görünür, hələ də erməni xisləti özünü göstərir ki, cinayətkara haqq qazandırıb onun təbliğatını aparırlar. Bu kimi təbliğat təbii ki, Ermənistanı daha da bataqlığa sürükləyəcək, bu ölkənin gələcəyi olmayacaq”.
O hesab edir ki, cinayətkarlarla Ermənistanın gələcəyi ola bilməz və olmayacaq da. Bütün bunların onların özlərinə zərbə olduğunu deyən F.Ələkbərli bildirdi ki, onların arxasında dayananlar onlardan maşa kimi istifadə edirlər. “Cani Melkonyanı vaxtilə himayə edib Ermənistana gətirənlərin cinayətkar olduğu şübhəsizdir və onların da axırı yaxşı olmayacaq. Ermənistan cəmiyyəti özü bundan zərər çəkəcək və dünyada öz yerini tapa bilməyəcək”-deyə F.Ələkbərli qeyd etdi.
BAO sədri müavininin vurğuladığına görə, kitabda aşkar şəkildə onun Ermənistana gətirilməsi prosesində iştirak edənlərin kimlikləri bilinir və bu da beynəlxalq aləmə imkan verir ki, caniyə və cinayətə dəstək verənlərə qarşı təpki versin
İradə SARIYEVA
