Ermənistan tərəfi Avropa İttifaqının mülki monitorinq missiyasının ərazisində yerləşməsindən bölgədə gərginliyi artırmaq və hərbi təxribatlarını ört-basdır etmək məqsədilə sui-istifadəyə son qoymalıdır.
Bu barədə Xarici İşlər Nazirliyindən verilən məlumatda deyilir.
"Ermənistan tərəfinin bu növbəti hərbi təxribatını qətiyyətlə pisləyir və Ermənistan tərəfindən son zamanlar daha da artan təcavüzkar ritorikasından əl çəkməyi və bölgədə gərginliyi artıran bu kimi addımlara son qoymağı tələb edirik. Ermənistan tərəfi Avropa İttifaqının mülki monitorinq missiyasının ərazisində yerləşməsindən bölgədə gərginliyi artırmaq və hərbi təxribatlarını ört-basdır etmək məqsədilə sui-istifadəyə son qoymalıdır.
Ermənistanda sözügedən missiyanın mövcudluğunun Ermənistanın üzərinə götürdüyü öhdəlikləri yerinə yetirməkdən boyun qaçırması üçün bəhanəyə çevrilməməsi zəruridir.
Bölgədə Azərbaycanın apardığı sülh quruculuğu tədbirlərinə qarşı təxribatlara görə bütün məsuliyyət Ermənistanın siyasi-hərbi rəhbərliyinin üzərinə düşür" – məlumatda bildirilir.
Göründüyü kimi, Ermənistan öz təxribatlarını Avropanın çətiri altında gizlətmıyə çalışır.
Təhlükəsizlik məsələləri üzrə ekspert Elşən Həsənov “Bakı-Xəbər”ə bildirdi ki, Avropa İttifaqının missiyasının Ermənistana gəlişindən sonra rəsmi İrəvanın üzərinə götürdüyü öhdəlikləri yerinə yetirməmək, danışıqlar prosesini mümkün qədər uzatmaq üçün davamlı təxribatlara əl atacağı gözlənilən idi.
“Azərbaycanın Aİ missiyasının sülh prosesinə maneə yaradacağı ilə bağlı xəbərdarlıqlarının əsasında da məhz bu gözləntilər dayanırdı. Nikol Paşinyan hakimiyyətə gəldiyi ilk gündən bölgəyə xarici qüvvələrin cəlb edilməsinə çalışıb. Azərbaycan Ordusunun qələbəsindən sonra Paşinyanın bu istiqamətdəki fəaliyyəti daha aktiv mərhələyə keçdi. Hazırda “Avropa İttifaqının mülki missiyası” adlanan, reallıqda isə ayrı-ayrı ölkələrin hərbi qulluqçularının və xüsusi xidmət orqanlarının yer aldığı missionerlər qrupu Ermənistan üçün diqqəti yayındırmaq rolunu oynayır.
Avropa İttifaqının ayrı-ayrı təsisatlarının Ermənistanın davamlı təxribatlarına heç bir reaksiya verməməsi bunu təsdiqləyir.
44 günlük savaşdan sonra bir qayda olaraq ehtiyatlı davranan Ermənistan missiya bölgədə fəaliyyətə başladığı gündən daha çox təcavüzkar ritorika nümayiş etdirməyə, mövqelərimizi daha intensiv formada atəşə tutaraq silahlı qarşıdurma yaratmağa başladı. Hətta bəzi günlərdə sutka ərzində eyni bölgədə mövqelərimiz dəfələrlə atəşə tutulsa da, ərazidə fəaliyyət göstərən Aİ missiyası məsələləri görməzdən gəlməyə üstünlük verməkdədir. Ən azı bu fakt deməyə əsas verir ki, Aİ missiyasından müsbət və ədalətli davranış gözləməyə dəyməz. Bu çirkin sövdələşmə artıq Ermənistanın əl-qolunu açıb. Demokratik dəyərlərdən, insan haqlarından danışan Avropanın Ermənistandakı nümayəndələri susur. Deməli belə çıxır ki, bunlar üçün hər insan haqqı anlayışı selektiv şəkildə yalnız ermənilərə münasibətdə işə düşür”.
Ekspertin sözlərinə görə, bütün bunlara baxmayaraq, Azərbaycanın öz suverenliyini qorumaq üçün kifayət qədər gücü var: “Ermənistanın bu təxribatı cavabsız qalmayacaq.
Ermənilərə elə gəlir ki, onlar missiya dəvət ediblərsə, arxalıdırlar. Öz istədiklərini edə, Azərbaycan daxilinə diversiya qrupları göndərməyə və eyni zamanda hər hansı bir silahlı insident yaratmağa cəhd edə bilərlər. Avropa missiyası isə gələndən bir dəfə də olsun Ermənistanın hərəkətinə qiymət verməyib. Bu onu göstərir ki, missiyanın vəzifəsi Azərbaycan haqqında kompromat toplamaqdır. Ermənistanın etdiklərini Azərbaycanın adına yazmaqdır. Ermənistan bilməlidir ki, layiqli cəzalarını tez-gec alıblar və alacaqlar”.
Məhəmmədəli QƏRİBLİ
