Məlum olduğu kimi, 2 gündür Bakı Beynəlxalq Multikulturalizm Mərkəzi (BBMM), Beynəlxalq Münasibətlərin Təhlili Mərkəzi (BMTM) və G20 Dinlərarası Dialoq Forumu İslamofobiya ilə Beynəlxalq Mübarizə Gününə həsr olunan “İslamofobiya irqçiliyin və ayrı-seçkiliyin spesifik forması kimi: Yeni qlobal və transmilli çağırışlar” mövzusunda beynəlxalq konfrans keçirir.
Konfransın əsas məqsədi beynəlxalq və milli səviyyədə müsəlmanları və əhalisi müsəlman olan ölkələri hədəf alan həyəcanverici tendensiyaları müzakirə etmək üçün akademik platforma yaratmaqdır.
Tədbir çərçivəsində G20 Dinlərarası Dialoq Forumunun prezidenti Kol Durham mətbuata açıqlamasında deyib ki, 30 illik işğal dövründə Ermənistanın Qarabağda məscidləri, dini məbədləri dağıtması çox təəssüfləndirici haldır. O qeyd edib ki, bu kimi hallar qəbuledilməzdir: “30 illik işğal dövründə Ermənistanın Qarabağda məscidləri, dini məbədləri dağıtması çox təəssüfləndirici haldır. Əlbəttə bunun arxasında bir sıra hallar, səbəblər dayanır. Bu dini, etnik ayrı-seçkilikdir. Ermənistanın bu cür davranışı qəbuledilməz haldır. Ümid edirik ki, bir daha bu hallar yaşanmaz və iki ölkə arasında sülh bərqərar olar”.
Görünən odur ki, ən mötəbər təşkilatların təmsilçiləri erməni vandalizmini ifşa edir və ortaya mövqe qoyurlar.
“Ermənilər nəinki evləri, müqəddəs məscidləri, dini ibadətgahları, hətta ağacları belə məhv ediblər”
Məsələyə münasibət bildirən media eksperti Yadigar Məmmədlinin fikrincə, bir sıra aparıcı beynəlxalq təşkilatların nümayəndələri timsalında erməni vandalizminin ifşa olunması mühüm əhəmiyyət kəsb edir: “Azərbaycanda baş verən hadisələrin ermənilər tərəfindən saxtalaşdırılması, informasiyanın dəyişdirilməsi cəhdlərinin həlli yollarından biri budur ki, uğurlu təbliğat işi aparmağı bacarasan. Biz bununla bağlı məlumatları yayırıq. Çalışırıq dünya daha obyektiv informasiya çatdıraq. Digər başqa önəmli məsələ ondan ibarətdir ki, Bakıda bir sıra beynəlxalq konfranslar keçiririk. Bu konfransların təşkilatçıları beynəlxalq təşkilatların özləri olur. Bunun önəmi ondan ibarətdir ki, belə tədbirlərdə bilavasitə mütəxəssislərin dili ilə həqiqəti əks etdirən məlumatlar dünyaya çatdırılır. Azərbaycana gələn qonaqlar yerindəcə faktları görür və buna öz münasibətini bildirir. Ərazilərimiz işğaldan azad olunandan sonra bir neçə dəfə Azərbaycana gələn xarici qonaqların həmin ərazilərə səfərləri təşkil olunub. Onlar öz gözləri ilə erməni barbarlığını görürlər. Məlum olur ki, ermənilər nəinki evləri, müqəddəs məscidləri, dini ibadətgahları, hətta ağacları belə məhv ediblər. Bütün bunları dünyaya car çəkən, özünü məzlum xalq kimi göstərən erməni toplumu törədib. G20 timsalında nüfuzlu şəxslərin buna münasibət bildirməsi ümumi işə töhfə verir. Belə tədbirlərdə onlar həqiqəti əks etdirən məlumatlar verirlər. Həqiqətlərin çatdırılması baxımından belə məlumatlar çox önəmlidir”.
Vidadi ORDAHALLI
