Azərbaycan-Türkiyə qardaşlığı özünü təkcə sözdə yox, həm də əməldə ifadə edir. Bir ananın iki övladı olan Azərbaycan və Türkiyə dar gündə də, xoş gündə də bir-birinin yanında olub, omuz-omuza dayanıb, ağrı-acını birgə adladıb, sevinc şərbətini birlikdə içiblər.
Türkiyədə baş verən meşə yanğınları zamanı da Azərbaycan qardaş ölkəyə gərəyi olan dəstəyi göstərdi. Türkiyədəki dəhşətli zəlzələ ilə əlaqədar olaraq Azərbaycan dövləti, eləcə də Heydər Əliyev Fondu misilsiz humanitar və mənəvi dəstəklə qardaş ölkənin yanında oldu. Heydər Əliyev Fondunun zəlzələ ilə bağlı həyata keçirdiyi humanitar kampaniya isə dünyada bənzəri olmayan bir nümunə oldu.
AZƏRTAC-ın yaydığı statistikaya diqqət yetirək:
Zəlzələ ilə əlaqədar Azərbaycan Respublikası tərəfindən qardaş Türkiyəyə fevralın 6-dan martın 15-dək göstərilmiş humanitar və maliyyə yardımının ümumi məbləği 76 milyon 344 min 930 manat (44 milyon 908 min 783 ABŞ dolları) təşkil edir. Belə ki, bu müddətdə Türkiyəyə 53 milyon 568 min 530 manat (31 milyon 510 min 900 dollar) dəyərində humanitar yardım göstərilib. Birbaşa göstərilmiş maliyyə yardımının ümumi məbləği isə 22 milyon 776 min 400 manatdır (13 milyon 397 min 883 dollar).
Qeyd edək ki, qardaş Türkiyədə baş verən təbii fəlakətin ağır nəticələrini aradan qaldırmaq məqsədilə Azərbaycanın dövlət qurumları səfərbər olaraq köməyə tələsdilər. Prezident İlham Əliyevin göstərişinə əsasən, fəlakət zonasına ilk olaraq Azərbaycanın xilasediciləri çataraq dağıntılar altında qalan insanları çıxarmağa başladılar. Azərbaycandan göndərilən 669 xilasedici Hatay, Antakya, Kahramanmaraş, Adıyaman və digər şəhərlərdə xilasetmə əməliyyatlarında fəal iştirak edib. Xilasedicilərimiz 53 nəfəri xilas edib, dağıntılar altından 780 cəsədi çıxararaq yaxınlarına təhvil veriblər. Fəlakət bölgəsinə 121 həkim və tibbi personal, 150 könüllü gedərək qardaş xalqın dərdinə şərik olub və səmərəli fəaliyyət göstərib. Azərbaycanın hərbi həkimləri 3123 nəfər tibbi xidmət göstərib, ağır yara alanları müalicə edərək sağaldıblar.
Dövlət qurumları tərəfindən Türkiyəyə 6665 çadır, 145 konteyner tipli mobil ev göndərilib, 2 səhra hospitalı və 4 səhra mətbəxi qurularaq zəlzələdən zərər çəkən insanlara xidmət edib. Havaların soyuq keçməsi evləri zəlzələ nəticəsində dağılan insanları daha ağır vəziyyətə saldığından bu problemləri aradan qaldırmaq məqsədilə dövlət qurumları tərəfindən zəlzələ bölgəsinə 786 elektrik generatoru, 11 min 299 ədəd qızdırıcı və texniki avadanlıq, 95 min 580 yataq və yataq ləvazimatı, 207 min 65 dəst isti paltar, 252 ton yanacaq göndərilib.
Vurğulanır ki, Heydər Əliyev Fondu Türkiyədə baş verən zəlzələyə ilk reaksiya verən təşkilatlardan biri kimi diqqəti cəlb etdi. Azərbaycanın Birinci vitse-prezidenti, Heydər Əliyev Fondunun prezidenti Mehriban Əliyevanın təşkilatçılığı ilə Türkiyədəki zəlzələ bölgəsinə 2518 çadır, 135 elektrik generatoru, 19 min 894 ədəd yataq və yataq ləvazimatı, 404 min 58 adda dərman və tibbi ləvazimat, 143 min 955 dəst isti geyim, 2653 qızdırıcı avadanlıq, 6603 qutu ərzaq və qida məhsulu və digər zəruri əşyalar alınaraq göndərilib. Ümumilikdə Heydər Əliyev Fondu tərəfindən Türkiyənin zəlzələ bölgəsinə 9 milyon 485 min 563 manat (5 milyon 579 min 743 dollar) məbləğində yardım göstərilib.
Ümumilikdə dövlət qurumları tərəfindən zəlzələ bölgəsində zərər çəkənlərə 44 milyon 82 min 967 manat (25 milyon 931 min 157 ABŞ dolları) məbləğində humanitar yardım göstərilib. Humanitar yardımların Türkiyəyə çatdırılması üçün 16 təyyarədən, 459 TIR, 25 vaqondan istifadə olunub.
Azərbaycan dövlətinin Türkiyədə baş verən zəlzələ fəlakətinin aradan qaldırılmasında oynadığı rol böyükdür.
Sözsüz ki, Heydər Əliyev Fondunun dəstəyi də qardaş ölkəyə böyük humanitar jest oldu.
Heydər Əliyev Fondu dar gündə qardaş harayına yetməklə dünya üçün çox vacib nümunələr ortaya qoydu. Bilirik ki, Heydər Əliyev Fondu dünyada ən çox yardım edən fond kimi diqqəti cəlb edir. Türkiyə zəlzələsinə yardımlar etməsi Fondun dünyada humanitar və mədəni bərpa fəaliyyətini daha da qloballaşdırdı. Və dünyanın yadına saldı ki, fəlakətlə üz-üzə qalan insanların dadına, imdadına yetmək bir insanlıq borcu və vəzifəsidir. Heydər Əliyev Fondu bur sıra müsəlman ölkələrində humanitar yardım fəaliyyəti göstərdi, müxtəlif dinlərin irsinin bərpasına çiyin verib, indi isə qardaş Türkiyəyə həm milli-dini qardaşlıq kontekstində yardım edir, həm də bunun Fondun özü üçün dəyişməz humanitar missiya olduğunu göstərir.
“Bu onu göstərdi ki, fond öz qlobal hümanitar missiyasına sadiqdir”
Müasir İnkişaf Birliyinin sədri, siyasi şərhçi Mübariz Göyüşlü “Bakı-Xəbər”ə bildirdi ki, Azərbaycan və Türkiyənin qarşılıqlı olaraq bir-birinə dəstəyi bütün dünya üçün nümunədir. Heydər Əliyev Fondunun Türkiyədə baş verən zəlzələ ilə əlaqədar göstərdiyi humanitar dəstək dünya üçün bir örnəkdir. “Azərbaycan və Türkiyənin həm dövlət, həm cəmiyyət, həm ictimai təşkilatlar qismində bir-birinə dəstək olması qardaşlığın bariz göstəricisidir. Bu müstəvidə Azərbaycanın ən aparıcı ictimai platformalarından sayılan, istər yerli, istərsə də beynəlxalq səviyyədə xeyriyyəçilik fəaliyyəti ilə tanınan Heydər Əliyev Fondu önəmli yer tutur. Heydər Əliyev Fondunun Türkiyədə baş verən zəlzələ ilə əlaqədar həyata keçirdiyi geniş humanitar dəstək hərəkatı mühüm əhəmiyyət daşıyır. Bu qurumun humanitar fəaliyyətinin qlobal mahiyyət daşıdığını önə çəkir. Qeyd edək ki, Fond indiyə qədər dünyanın ayrı-ayrı yerlərində böyük humanitar tədbirlər həyata keçirib, çox böyük işlər görüb. Harada köməyə, dəstəyə ehtiyac olursa Heydər Əliyev Fondu öz kömək əlini uzadır. Biz bunun çox şahidi olmuşuq. Son belə addımları isə qardaş Türkiyədə baş verən zəlzələ zamanı gördük. Bu prosesdə də Heydər Əliyev Fondunun çox ciddi şəkildə yardım kampaniyasında liderlik rolunu gördük”.
Müsahibimiz deyir ki, Fond tərəfindən yardım kampaniyası çox çevik şəkildə həyata keçirildi və hər şey vaxtlı-vaxtında ünvana çatdırıldı. Bütün bunların Heydər Əliyev Fondunun rəhbəri Mehriban Əliyevanın nəzarəti ilə dəqiqliklə gerçəkləşdirildiyini deyən müsahimiz qeyd etdi ki, fondun neçə illərdir formalaşan xeyriyyəçilk ənənələri son prosesdə özünü çox mükəmməl şəkildə ifadə etdi. “Bu onu göstərdi ki, fond öz qlobal hümanitar missiyasına sadiqdir”-deyə M.Göyüşlü vurğuladı.
Leyla QARAXANLI
