Prezident İlham Əliyev “Şərq Tərəfdaşlığı” ölkələrinin videokonfrans formatında keçirilən Sammitində çıxışı zamanı bildirdi ki, “Cənub Qaz Dəhlizi” enerji əməkdaşlığı, enerji təhlükəsizliyi və enerjinin şaxələndirilməsi layihəsidir: “İşğala və humanitar fəlakətə baxmayaraq, Azərbaycan sosial-iqtisadi inkişafda böyük nəticələr əldə edib.
Son 16 ildə ümumdaxili məhsulumuz 3 dəfə artıb, yoxsulluq səviyyəsi 49 faizdən 5 faizə enib. Avropa İttifaqı bizim əsas ticarət tərəfdaşımızdır. Ticarətimizin təqribən 50 faizi üzv dövlətlərin payına düşür. On beş ilə yaxındır ki, Azərbaycan Avropa bazarlarına xam neft nəql edən etibarlı təchizatçıdır. Yaxın zamanda biz Avropa İttifaqının üzv dövlətlərini təbii qazla təchiz etməyə başlayacağıq. Ölkəmiz Azərbaycanı Avropa İttifaqı bazarlarına bağlayacaq 3500 kilometrlik inteqrasiya edilmiş boru kəməri sistemi olan “Cənub Qaz Dəhlizi”nin tikintisinin təşəbbüskarı olmuş və onu maliyyələşdirmişdir. “Cənub Qaz Dəhlizi” enerji əməkdaşlığı, enerji təhlükəsizliyi və enerjinin şaxələndirilməsi layihəsidir”.
Prezident İlham Əliyev bununla Azərbaycanıın Avropa ilə əməkdaşlığa konkret töhfə verdiyini sübut etdi. Halbuki, Paşinyan sözügedən tədbirdə etdiyi çıxışında Ermənistanın Avropa ilə əməkdaşlığına töhfə sayıla biləcək heç nə deyə bilmədi.Yalandan atmaca atdı ki, biz “Şərq Tərəfdaşlığı”nda əməkdaşlığı təşviq etməliyik. Ancaq bunun üçün əməli olaraq nə etdiyini deyə bilmədi. Çünki sözügedən məsələ ilə bağlı nəsə etməyib axı. O baxımdan bunu ekspertlər necə dəyərləndirirlər?
“Prezidentin çıxışında Azərbaycanın Avropa üçün yeni alternativ enerji mənbəyi olduğu fikri bir daha təsdiqini tapdı”
Sözügedən məsələ ilə bağlı fikirlərini “Bakı-Xəbər”lə bölüşən millət vəkili, politoloq Elman Nəsirov bir sıra məqamlara toxundu: “Prezident İlham Əliyevin çıxışında Azərbaycanın Avropa üçün yeni alternativ enerji mənbəyi olduğu fikri bir daha təsdiqini tapdı. Cənab Prezident qeyd etdi ki, “Cənub Qaz Dəhlizi”, ilk növbədə, enerji təhlükəsizliyi, azad rəqabət layihəsidir. Azərbaycan bu layihə ilə Avropa İttifaqının enerji təhlükəsizliyinə doğrudan da çox böyük töhfə verir. Nəzərə alsaq ki, Aİ ölkələrinin ildə 500 milyard kubmetr qaza ehtiyacı var, onun təxminən 150 milyard kubmetri Rusiya hesabına təmin edilir. Digər hissəsi başqa ölkələrdən idxal olunur. Azərbaycan bu sahədə yeni ölkədir və biz gələn ildən başlayaraq Türkiyəyə 10 milyard, Aİ ölkələrinə isə 6 milyard kubmetr qaz ixrac edəcəyik. Bu da həmin ölkələr üçün olduqca əhəmiyyətlidir. Gələcəkdə qaz ixracının 37 milyard kubmetrə çatacağı proqnozlaşdırılır. Həqiqətən də cənab Prezidentin çıxışı göstərdi ki, Azərbaycan-Avropa İttifaqı münasibətləri strateji xarakterlidir. Azərbaycan bu qurumun “Şərq Tərəfdaşlığı” Proqramının üzvü olaraq, Aİ-nin enerji təhlükəsizliyinə ciddi töhfələr verir. Gələcəkdə bu töhfələr daha da genişlənəcək. Ancaq Nikol Paşinyan isə Aİ ilə əlaqələrdən danışarkən məlum oldu ki, onlar bu məsələdə sadəcə parazitdilər. Yəni Ermənistan ancaq alır və sorur. Necə ki, parazit qanı soran kimi. Ermənistanın Aİ-yə töhfə verəcək heç nəyi yoxdur. Aİ Ermənistanın timsalında ancaq parazit dövləti görür. Son tədbir bunu bir daha sübut etdi. Azərbaycan isə Aİ üçün ən etibarlı tərəfdaşdır və çox böyük iqtisadi potensiala malikdir. Bu nöqteyi-nəzərdən Azərbaycan Aİ üçün çox mühüm tərəfdaş hesab olunur. Ancaq Ermənistan haqqında bunu demək mümkün deyil. Paşinyanın fikirləri bunu bir daha ortaya qoydu”.
Vidadi ORDAHALLI
