“Danışıqların mahiyyət və formatını məhv etməyə çalışan Ermənistanın Baş nazirinin dediyinin əksi olaraq, Dağlıq Qarabağ Ermənistan deyil”. Bunu Prezident İlham Əliyev “Şərq Tərəfdaşlığı” ölkələrinin videokonfrans formatında keçirilən Sammitində çıxışı zamanı deyib.
Ölkə başçısının fikrincə, Ermənistan və Azərbaycan arasında olan münaqişə eyni prinsiplər əsasında həll edilməlidir: “Ermənistan Azərbaycanın beynəlxalq səviyyədə tanınmış ərazisinin 20 faizinin işğalını davam etdirir. Dağlıq Qarabağ və Azərbaycanın daha 7 rayonu 30 ilə yaxındır Ermənistanın işğalı altındadır. Ermənistanın etnik təmizləmə siyasəti nəticəsində 1 milyondan artıq azərbaycanlı qaçqın və məcburi köçkünə çevrilib. BMT Təhlükəsizlik Şurasının 4 qətnaməsi Ermənistan qoşunlarının Azərbaycanın işğal edilmiş bütün ərazilərindən qeyd-şərtsiz və tam çıxarılmasını tələb edir. Ermənistan bu qətnamələrə, habelə ATƏT, Qoşulmama Hərəkatı, NATO, Avropa Parlamenti və digər beynəlxalq təşkilatlarda qəbul edilmiş müvafiq sənədlərə əməl etmək əvəzinə, işğal olunmuş ərazilərdə qeyri-qanuni məskunlaşma siyasəti həyata keçirir. Danışıqların mahiyyət və formatını məhv etməyə çalışan Ermənistanın Baş nazirinin dediyinin əksi olaraq, Dağlıq Qarabağ Ermənistan deyil, Dağlıq Qarabağ Azərbaycandır və bütün dünya bunu belə tanıyır. Azərbaycanın ərazi bütövlüyü bərpa olunmalıdır”.
Nikol Paşinyan Ermənistanın Baş naziri olandan sonra Dağlıq Qarabağ münaqişəsinin tənzimlənməsi ilə bağlı danışıqların formatını və mahiyyətini məhv etməyə çalışır. Ancaq onun bununla bağlı səyləri fiaskoya uğrayır. Maraqlıdır, ötən iki ildə bu istiqamətdə Paşinyanın uğursuzluqları hansılardır?
“…sərsəm siyasət yeridir və bu da onun əleyhinə işləyir”
Siyasi İnnovasiyalar və Texnologiyalar Mərkəzinin rəhbəri Mübariz Əhmədoğlu sözügedən məsələ ilə bağlı Paşinyanın bir sıra uğursuzluqlarını sadaladı: “Əvvəla Paşinyanın bütün siyasəti, o cümlədən, Dağlıq Qarabağ münaqişəsinin tənzimlənməsi məsələsində davranışı buz üstündə inəyin hərəkətlərinə bənzəyir. Təsəvvür edin ki, inək buz üstünə çıxıb xokkey oynamaq istəyir. Onun verdiyi bəyanatlar, açıqlamalar və bir-birinə zidd mövqelər bunun nəticəsidir. O, nə dediyinin mahiyyətini çox vaxt anlaya bilmir. Paşinyan Baş nazir olandan sonra çox çalışdı ki, Qarabağdakı separatçı qurum danışıqlarda tərəf olsun, amma bu alınmadı. Azərbaycan və ATƏT-in Minsk Qrupunun həmsədrləri onun bu təklifini qəbul etmədilər. Paşinyan bu xüsusda bir neçə dəfə dedi ki, o, danışıqlarda Qarabağ ermənilərini təmsil etmək səlahiyyətinə malik deyil. Guya ona belə bir səlahiyyət verilməyib. Bir dəfə bəyan etdi ki, münaqişə 3 xalqın – “Artsax”, Azərbaycan və Ermənistan xalqlarının iştirakı ilə həll edilməlidir. Bu təklif də uğursuzluğa düçar oldu. Onda bir müddət sonra bəyan etdi ki, “Artsax” yoxdur, oradakı ermənilər gəlib Ermənistanla birləşməlidirlər. Separatçı qurumun “prezidenti” Araik Arutunyan da dedi ki, “Artsax” xalqı yoxdur, biz eyni xalqın nümayəndələriyik və gedib Ermənistana birləşməliyik. Bu il yanvarın 16-da Paşinyan özü həmsədrlərə təqdim etdiyi variantı açıqladı. Bəlli oldu ki, ətraf 7 rayondan Ermənistan hərbi birləşmələri, ümumiyyətlə, çıxmalıdır. Daha sonra Paşinyan tamamilə başqa fikirlər səsləndirdi. Ona görə də Paşinyan Dağlıq Qarabağ münaqişəsinin tənzimlənməsi ilə bağlı sərsəm siyasət yeridir və bu da onun əleyhinə işləyir”.
Vidadi ORDAHALLI
