“ATƏT-in Minsk Qrupunun həmsədrləri – Amerika, Fransa, Rusiya bəyan ediblər ki, seçkiləri tanımırlar. Avropa İttifaqı bəyan edib ki, seçkiləri tanımır. Avropa Parlamenti, həmçinin, İslam Əməkdaşlıq Təşkilatı, Qoşulmama Hərəkatı, digər təşkilatlar - bütün aparıcı beynəlxalq təşkilatlar bu seçkiləri qınadı, təkcə Avropa Şurasından başqa. Avropa Şurası susdu. O da nəyə görə? Bəllidir. Çünki Avropa Şurası Parlament Assambleyasının əsas hədəflərindən biri Azərbaycanı ləkələmək, ölkəmizi gözdən salmaq, ölkəmiz haqqında uydurmalar yaymaq, saxta məruzələr qəbul etdirmək, Azərbaycanda “beşinci kolonu”, satqınları və münaqişə ilə bağlı Ermənistan tərəfini dəstəkləməkdir. Ona görə Avropa Şurası bu saxta seçkilərlə bağlı səsini belə çıxarmadı. Bu halda hansı obyektivlikdən, hansı ədalətdən söhbət gedə bilər!
Mən deyəndə ki, Avropa Şurası tərəfindən Azərbaycan ilə əlaqədar qəbul edilmiş sənədlər mənim üçün bir kağız parçasından artıq deyil, bunu nəzərdə tuturdum. Bütün Azərbaycan ictimaiyyəti görüb ki, Avropa Şurası anti-Azərbaycan mövqedədir və bu təşkilatda anti-Azərbaycan meylləri, azərbaycanafobiya hökm sürür və bizə ünvanlanmış bütün ittihamların təməlində məhz azərbaycanafobiyadır. Biz bütün bu ittihamları artıqlaması ilə onların özlərinə qaytarırıq. Qoy, bir bəyanat versinlər ki, indi bu dünyada bəzi ölkələrdə nələr baş verir. Polis zorakılığı, nümayişçilərə qarşı tətbiq edilən güc, nümayişçilərin öldürülməsi, onların gözlərinin çıxarılması, kütləvi surətdə həbs edilməsi, jurnalistlərin döyülməsi, həbs edilməsi, bunlar harada baş verir? Qərb ölkələrində. Açsınlar gözlərini, baxsınlar və utansınlar ki, susublar. Nəyə görə? Çünki güclü dövlətlərdən qorxurlar. Hesab edirlər ki, bu məsələnin insan haqlarının qorunmasına aidiyyəti yoxdur. Ona görə bu qurumun riyakar mahiyyəti heç kim üçün sirr deyil və bizi də heç maraqlandırmır, onlar bu saxta seçkiləri tanıyıblar, yoxsa yox. Əsas odur ki, dünyanın sanballı və hörmətə layiq olan təşkilatları Dağlıq Qarabağda keçirilmiş saxta seçkiləri tanımayıb və qınayıblar”. Bu fikirləri Tərtər səfəri zamanı Tərtər Olimpiya Kompleksinin açılışındakı çıxışında Prezident İlham Əliyev bildirib.
Azərbaycanın AŞPA-nın heç bir qərəzli qətnaməsini qəbul etməyəcəyini bildirən ölkə başçısının fikirlərinə münasibət bildirən “Səs” qəzeti və eyniadlı informasiya agentliyinin rəhbəri Bəhruz Quliyev baki-xeber.com-a bildirdi ki, Prezident İlham Əliyevin bütün fikirləri həqiqətə söykənir və ölkə başçısı haqlıdır. “Cənab Prezidentin dedikləri, irad və tənqidləri həqiqəti əks etdirir. Çünki AŞPA bunu bir-iki gündə deyil, illərdir Azərbaycana qarşı tutduğu qərəzli mövqe ilə qazanıb. Prezident İlham Əliyev AŞPA-nın fəaliyyətini ilk dəfədir tənqid etmir və bu tənqidlərin hər birində əsaslar, sübutlar, həqiqətlər dayanır”.
Onun sözlərinə görə, həqiqətən də Avropa Şurasında deqradasiya prosesi gedir və bu təşkilat beynəlxalq müstəvidə öz əhəmiyyətini sürətlə itirməkdə davam edir: “Fakt isə budur ki, AŞPA dünyada gedən heç bir prosesə, hətta cüzi hadisələrə belə, təsir etmək gücündə deyil. Məhz bu baxımdan məsələnin kökünə varan cənab Prezident hər çıxışında sübutlarla vurğulayır ki, bunun səbəbləri qurumda hökm sürən riyakarlıq, ikili standartlar və ədalətsizliklərdir. Söz yox ki, Prezident İlham Əliyev tənqidini irəli sürərkən bilavasitə Azərbaycan xalqının da mövqeyini, baxışını əks etdirir”.
B.Quliyev hesab edir ki, AŞPA müxtəlif dövrlərdə siyasi sifarişləri icra edib və anti-Azərbaycan xarakterli qüvvələrin dırnaqarası məntiqlərinə uymaqla Azərbaycan hədəf seçilib: “Reallıqları əks etdirməyən yalanlar, böhtanlar, hətta şantaj xarakterli qərar və qətnamələr də məhz bu anlamı daşımaqdadır. Sual yaranır ki, nəyə görə Azərbaycan? Bu sualın cavabı isə bəsitdir: Azərbaycan istər demokratikləşmə prosesində, istər sosial-iqtisadi inkişaf gerçəkliyində, istərsə də digər müsbət proseslərdə hətta bir sıra aparıcı dövlətləri də geridə qoyur, müstəqil olduğunu nümayiş etdirir, eləcə də heç bir diktəni qəbul etmir. Budur anti-Azərbaycan meylli qrupların və həmin qruplara qucaq açan AŞPA-nın əsl sifəti, ya da simasızlığı!”. B.Quliyev vurğuladı ki, dövlət başçısı xüsusilə ölkəmizin və xalqımızın bir nömrəli problemi kimi qiymətləndirilən Dağlıq Qarabağ mövzusunda, daha dəqiq desək, Ermənistanın işğalçılıq siyasəti məsələsində kəskin, sərt və barışmaz mövqeyini ortaya qoyur, buna sübut kimi, qondarma “DQR”dəki saxta seçkilərin dünya birliyi tərəfindən qeyd-şərtsiz tanınmaması bəyanatlarını göstərmək olar: “Düşünürəm ki, əslində, bu faktın özü Azərbaycanın diplomatik qələbəsidir və xatırlayarsaq, 20 il əvvəl və daha öncəki illərdə ölkəmiz beynəlxalq aləm tərəfindən bu cür dəstək ala bilmirdi. Bu dövrləri yaşayan xalqımız baş verən olayları yəqin ki, yaxşı xatırlayır. Ancaq indi, mövcud zamanda və məqamda Azərbaycan istər beynəlxalq dairələrin mərkəzi rolunda çıxış edir, istərsə də dünyanın ali tribunalarında söz sahibinə çevrilir. Bu gün beynəlxalq çevrələrdə həyata keçirilən bir sıra mühüm, strateji layihələrin çoxunda Azərbaycan həm təşəbbüskar, həm də ideyaverici, tövsiyə edən ölkələr sırasında yer alır. Əlbəttə ki, bütün bu kimi önəmli hadisələrin hazırkı zamanda dəstək almağımızda böyük rolu var. Ona görə də bu gün “DQR”də keçirilən saxta seçkilərə dünya birliyi etirazlı mövqe sərgilədi, Azərbaycanın haqlı çağırışlarına dəstəyini əsirgəmədi. Bu, eyni zamanda, Prezident İlham Əliyevin nüfuzlu, xarizmatik liderliyinin bariz isbatıdır. Beləliklə, bir daha əyan oldu ki, bu “seçkiləri”, qanunsuz, silahlı və terror şəbəkəsi kimi də tanınan xunta rejimini heç kim tanımır”.
B.Quliyev, həmçinin, xatırlatdı ki, “seçkilər”dən sonra bütün aparıcı beynəlxalq təşkilatlar onun qondarma nəticələrini tanımadı və açıq-aydın bəyanatlar səsləndi: “ATƏT-in Minsk Qrupunun həmsədrləri - Amerika, Fransa, Rusiya kimi dövlətlər və sair ölkələr, ATƏT Parlament Assambleyası,Avropa İttifaqı, hətta ölkəmizə qarşı zaman-zaman qərəzli mövqedə dayanan Avropa Parlamenti də bəyanatlar yaydılar. Eyni zamanda, NATO, İslam Əməkdaşlıq Təşkilatı, Qoşulmama Hərəkatı, Türk Şurası kimi təşkilatlar, bir sıra digər ölkələrin siyasi xadimləri, parlamentləri, hökumətləri bu məsələdə Azərbaycanla həmrəy olduqlarını vurğuladılar. AŞPA isə susdu və susqunluğu ilə öz düşmənçilik mövqeyini ortaya qoymuş oldu. Bu xüsusda daha bir xatırlatmanı etmək istərdim. Cənab İlham Əliyev öncəki çıxışlarının birində də AŞPA-nı tənqid edərkən vurğulamışdı ki, bizə qarşı o təşkilatdan gələn bütün iradların heç bir əhəmiyyəti yoxdur. Bu gün də həmin sözlər öz yerində və gücündədir. Əlbəttə ki, belə olan halda, xəyanət, riya, yalan, şər-böhtan, şantaj olan yerdə təşkilatın Azərbaycanla bağlı olan fikri, ümumiyyətlə, nə Azərbaycan dövlətinin və dövlət rəhbərliyinin, nə də xalqın marağında deyil və olmayıb da. Cənab Prezident İlham Əliyevin də vurğuladığı və tezis olaraq irəli sürdüyü ifadələrində olduğu kimi - biz isə öz yolumuzla gedirik. Dağlıq Qarabağ münaqişəsinin həllinin bir yolu var, o da Azərbaycanın ərazi bütövlüyünün bərpasıdır. Bütün beynəlxalq aləmin bu “seçkilər”ə olan reaksiyası bizim mövqeyimizi daha da gücləndirir. Əlbəttə ki, biz də xalqın nümayəndəsi olaraq hər an dövlət başçımızın, Ali Baş Komandanımızın əmrindəyik”.
B.Quliyev vurğuladı ki, Azərbaycanda həyata keçirilən demokratik dəyişikliklərə AŞPA-nın qısqanc münasibət göstərməsi, illərdir özünə qarşı bu mifi formalaşdırması, Azərbaycana qarşı həmişə qərəzli mövqe sərgiləməsi göz önündədir. “Ona görə də cənab Prezident əsaslandırır ki, AŞPA-nın qəbul etdikləri ciddi sənədlər yox, adi bir kağız parçasıdır. AŞPA Azərbaycanda baş verən bütün məsələlərə mikroskopla baxır və onun mikroskopla böyüdülmüş formasına qərəzli fikirlər bildirir. “5-ci kolon”un, eləcə də Azərbaycanı istəməyən digər qüvvələrin saxta məlumatları əsasında AŞPA bizim əleyhimizə çıxardığı qərəzli qərar və qətnamələrlə öz anti-Azərbaycan mövqeyini açıq şəkildə ortaya qoyur. Sözsüz ki, buna da adekvat olaraq Azərbaycanın da özünü müdafiə etmək baxımından AŞPA-ya münasibəti belə də olmalıdır. Əgər Dağlıq Qarabağda keçirilən “seçkilər”ə Avrova Şurası heç bir münasibət bildirmirsə və hər hansı bir mövqe ortaya qoymursa, bu həmin təşkilatın bizə açıq qərəz bəsləməsinin göstəricisidir. Ona görə də Avropa Şurasının Azərbaycanla bağlı çıxardığı qərəzli qətnamə və qərarlar cənab Prezidentin təbirincə desək, əhəmiyyətsiz bir kağız parçasıdır. Bir dövlətin rəhbəri bu münasibəti ortaya qoyursa, hər şey göz qabağındadır. Avropa Şurası həmişə Azərbaycanın milli maraqları əleyhinə mövqe göstərib və buna daim qərəzli yanaşıb, Azərbaycanı haqsız, qeyri-obyektiv olaraq həmişə tənqid edib, ölkəmiz haqqında qərəzli qərarlar çıxarıb. AŞPA-nın Azərbaycana qarşı çıxardığı qərəzli qətnamələrin icrası heç bir zaman həyata keçirilməyəcək, bununla bağlı cənab Prezident ortaya dəqiq, birmənalı mövqe qoyub. AŞPA-nın qeyri-obyektiv mövqeyinə adekvat olaraq ölkə başçısının öz mövqeyini ortaya qoyması Azərbaycan Prezidentinin iradəsidir. Azərbaycan Prezidenti Azərbaycan xalqının, dövlətinin milli maraqları naminə bu cür bəyanatlar verir, fikirlər səsləndirir və diplomatik manevrlər edir” - deyə müsahibimiz bildirdi.
İradə SARIYEVA
