Prezident İlham Əliyevin müvafiq sərəncamı ilə Əbülfəs Qarayev Mədəniyyət naziri vəzifəsindən azad edildikdən sonra sosial şəbəkələrdə, xüsusən də “Facebook”da “yeni Mədəniyyət naziri”nin seçiminə başlanıb. Artıq bir həftədir sosial şəbəkə istifadəçiləri ölkənin Mədəniyyət nazirini “seçib təyin etməklə” məşğuldurlar. Sosial şəbəkə istifadəçiləri bu vəzifəyə bir sıra tanınmış şəxslərin potensial namizəd olduqlarını vurğulayırlar. Amma bir şeyi unudurlar ki, Mədəniyyət nazirini sosial şəbəkə istifadəçiləri yox, Prezident təyin edir.
Qeyd etdiyimiz kimi, müxtəlif şəxslər, o cümlədən də tanınmış xalq artistləri, sənət adamları bir-birinin bəhsinə müxtəlif şəxsləri Mədəniyyət naziri postunda gördüklərini bəyan edirlər. Sosial şəbəkələr yeni namizədlərin adları ilə dolub daşır. “Facebook”da yeni adlar, yeni simalar peyda olub.
Tanınmış mədəniyyətşünas Fəridə Mirişova baki-xeber.com-a bildirdi ki, bu gün sosial şəbəkələrdə təkcə Mədəniyyət Nazirliyinə deyil, başqa nazirliklərə və dövlət qurumlarına da “rəhbər təyin edənlər” kifayət qədərdir. “Sosial şəbəkələrdə insanlar bütün sahələr haqqında fikir bildirməyə, kimlərisə “vəzifəyə qoymağa”, kimlərisə “vəzifədən çıxarmağa” çalışırlar. Bəli, bu kimi məsələlərə sosial şəbəkə istifadəçilərinin müdaxiləsi düzgün deyil. Kiminsə vəzifəyə təyin edilməsi, kiminsə vəzifədən azad edilməsi cənab Prezidentin səlahiyyətlərinə aiddir. Mədəniyyət nazirini Prezident İlham Əliyev təyin edəcək, sosial şəbəkə istifadəçilərinin canfəşanlığı yersiz və gərəksizdir”.
F.Mirişova qeyd etdi ki, nazir postu seçkili vəzifə deyil və bu, birbaşa cənab Prezidentin təyinatı ilə reallaşan məsələdir. “Bilirsiniz ki, nazir postu seçkili orqan deyil. Bu, birbaşa ölkə başçısının seçimi ilə bağlı məsələdir. Sosial şəbəkələrə gəlincə, hazırda bu istiqamətdə mənfi və müsbət mənada piarlar gedir. Bu posta həqiqətən də layiq olan namizədlər var, onların arasında sənət adamları, incəsənət xadimləri də az deyil. Burda sırf kimisə reklam etməklə bağlı fikirlərə də, mövqelərə də rast gəlirik. Çoxları sosial şəbəkələrdə bu vəzifəyə layiq olmayanların piarını aparır. Əlbəttə, mən də çox arzu edərdim ki, Prezident layiqli bir mədəniyyət xadimini Mədəniyyət naziri postuna təyin etsin. Biz həqiqətən də mədəniyyətimizin inkişafına, maddi-mənəvi dəyərlərimizin, incəsənətimizin, bütövlükdə bu sahənin tərəqqisinə təkan verə biləcək şəxsin Prezident tərəfindən Mədəniyyət naziri vəzifəsinə təyin edilməsini arzulayırıq. Təsadüfi adamların Mədəniyyət naziri vəzifəsinə təyin edilməyəcəyinə əminik” - deyə F.Mirişova vurğuladı.
İradə SARIYEVA
