Prezident İlham Əliyev və birinci xanım Mehriban Əliyeva mayın 25-də Şamaxı rayonuna ayrılan nəqliyyat vasitələri və xüsusi texnikalara baxıblar. Ölkənin başqa şəhərlərinin də belə texnika və nəqliyyat vasitələri ilə təchizatını təşkil etmək üçün təkliflər hazırlanması barədə tapşırıq verən Prezident İlham Əliyev bunları deyib:
“Avtobuslar gərək bu gündən xətlərə çıxsın. Ondan sonra təcili tibbi yardım maşınları. Şamaxı rayonunun təchizatı ilə bağlı görülən işlər indiki mərhələdə kifayətdir. Həm Prezidentin ehtiyat fonundan, həm də dövlət büdcəsindən vəsait ayrıldı. Gərək biz prinsipcə bütün şəhərlərimizdə texnika ilə təchizatı yüksək səviyyəyə qaldıraq. Bu baxımdan Şamaxı birinci şəhərdir. Mən demişəm, digər şəhərlərdə, bir çox yerlərdə şəhər nəqliyyatı bərbad vəziyyətdədir. Kommunal texnikanın çatışmazlığı problemlər yaradır, təkliflər hazırlayın, bizim bütün şəhərlərimizdə müasir texnika təchizatı təmin edilməlidir - həm sərnişin nəqliyyatı, kommunal texnika, həm də təcili tibbi yardım maşınları. Bakı şəhərində bu öz həllini tapıb. Baxmayaraq ki, Bakıda da hələ köhnədən qalan avtobuslar var, onlar da yavaş-yavaş yeniləri ilə əvəzlənir. Bir çox şəhərlərə təcili tibbi yardım maşınlarının göndərilməsi təmin edilmişdir. Ancaq vaxt keçir, onların da istismar müddəti başa çatır, sıradan çıxır, qəzaya uğrayır. İndi Şamaxı rayonunun timsalında biz prinsipcə görürük ki, əhalini nəzərə alaraq nə qədər texnika lazımdır. Ona görə, digər rayonlarda da nə qədər texnika lazımdır, biz bunları kompleks şəkildə, tədricən həll edək”.
Əslində Prezidentin qarşıya qoyduğu məsələ bütün rayon mərkəzləri və ölkənin digər iri şəhərləri üçün xarakterikdir. Məlumdur ki, ölkədə regionların sosial-iqtisadi inkişafı ilə bağlı bir neçə dövlət proqramı qəbul edilib. Ölkə başçısının bu çıxışı və verdiyi tapşırıqlar ölkənin şəhərləri ilə də bağlı ayrıca sosial-iqtisadi inkişaf proqramı qəbul etməyi şərtləndirə bilərmi?
“Ayrıca belə bir proqramın qəbulu şəhərlərimizin inkişafını daha da sürətləndirə bilər”
İqtisadçı Asif İbrahimov “Bakı-Xəbər”ə açıqlamasında bildirdi ki, indiyə qədər regionların sosial-iqtisadi inkişafı ilə bağlı dörd proqram qəbul edilib:“Sonuncu proqram 2019-2023-cü illəri əhatə edir və bu istiqamətdə müəyyən işlər görülür. Azərbaycan regionlarının dördüncü sosial-iqtisadi inkişafı Dövlət Proqramının icrasının birinci ilinin yekunları müzakirə edilib. Dördüncü proqram əvvəlki dövrlərdə qəbul edilmiş proqramların məntiqi davamıdır. Etiraf edək ki, üç proqram çərçivəsində böyük işlər görülüb. Ancaq hələ də görüləsi işlər çoxdur. Ötən əsrin 90-cı illərinin əvvəllərindən başlayaraq əyalətlərdə özünü göstərən sosial çətinliklər üzündən Azərbaycan regionlarının tədricən boşalması, əhalinin yalnız Bakıda və digər iri şəhərlərdə mərkəzləşməsi təkcə sosial-iqtisadi problem mahiyyəti daşımayıb, daxili miqrasiyanın mənəvi-psixoloji fəsadları daha təhlükəli məqamlarla yadda qalıb. Paytaxt və əyalətlər arasında tarazlaşdırılmış inkişafın konseptual əsaslarını irəli sürən Azərbaycan Respublikası regionlarının sosial-iqtisadi inkişafına dair Dövlət Proqramının təcrübədə özünü doğrultması isə bu problemi əhəmiyyətli dərəcədə aradan qaldırıb, regionların siması dəyişib, vətəndaşların tarixi məşğulluq ənənələri bərpa edilib, sosial rifahı yüksəldib. Bölgələrin təbii resurslarından, əmək ehtiyatlarından səmərəli istifadə, yeni iş yerlərinin açılması, sosial problemlərin həlli, sahibkarlığın inkişafı, mövcud infrastrukturun yenidən qurulması, enerji, istilik təminatı kimi problemlərin həlli yerlərdə istehsal potensialını gücləndirməklə yanaşı, əyalət sakinlərinin Bakıya, həmçinin digər regional mərkəzlərə doğru axınını da səngitdi. Ancaq biz görürük ki, rayon mərkəzləri və respublika tabeli iri şəhərlərin təchizatı ilə bağlı əlavə işlərin görülməsinə ehtiyac var. Ölkə başısı Şamaxıda bunun anonsunu da verdisə, bunun ayrıca proqram halına salınması yaxşı olar. Şəhərlərimizin sosial-iqtisadi inkişafı ilə bağlı qəbul ediləcək inkişaf proqramı həm də məsuliyyətliliyi artırır, hesabatlılıq tələb edir. Hesab edirəm ki, ayrıca belə bir proqramın qəbulu şəhərlərimizin inkişafını daha da sürətləndirə bilər”.
Məhəmmədəli QƏRİBLİ
