Böyük ədib və maarifçi Həsən bəy Zərdabinin min-bir zəhməti ilə 1875-ci il iyulun 22-də işıq üzü görən "Əkinçi" qəzeti Azərbaycan milli mətbuatının təməl daşını qoydu. Əsasən maarifçilik missiyasını üzərinə götürmüş qəzet az müddətdə məşhurlaşaraq bütün Qafqazda əks-səda doğurdu. Dövrünün görkəmli ziyalıları və qələm sahibləri bu qəzetdə çıxış etdikləri məqalələrlə cəmiyyətdə ictimai, siyasi və bədii fikrin inkişafına böyük təsir göstərdilər.
Milli, demokratik mətbuatın "Əkinçi" qəzeti tərəfindən bəyan edilmiş başlıca prinsipləri - maarifləndirmə, müasirləşmə, məfkurə saflığı, ümummilli məqsədlərin təbliği, bəşəri dəyərlərin milli ənənələrlə üzvi vəhdəti, ədəbi dilin danışıq dilinə yaxınlaşdırılması, hadisələrin obyektiv işıqlandırılması milli mətbuatın gələcək inkişafına zəmin yaratdı.
Çar Rusiyası qəzetin insanların maariflənməsində, ictimai-siyasi proseslərə daha yaxından bələd olmasındakı rolundan çəkinərək qəzetin nəşrini dayandırdı.
1877-ci ilin sentyabrınadək cəmi 56 sayı işıq üzü görsə də, "Əkinçi"nin Azərbaycan milli mətbuatının təşəkkül tapmasında, inkişafında əvəzsiz rolu oldu. Həm də ayağı sayalı oldu "Əkinçi"nin. Sonralar dünyanı bizə, bizi dünyaya tanıdan, milli varlığımızda, birliyimizdə əvəzsiz rol oynayan neçə-neçə qəzet və jurnal ərsəyə gəldi.
O vaxtdan ötən 142 ildə müxtəlif tənəzzül və intibah dövrləri keçən Azərbaycan mətbuatı daim cəmiyyətin proseslərə baxışını əks etdirən güzgü rolunu oynayıb. 1998-ci ilin avqustunda senzuranın ləğvi isə Azərbaycanda mətbuatın inkişafına ciddi təkan verdi.
Mətbuat bolluğunda öz yerini, mövqeyini saxlayanlar arasında daxili işlər orqanlarının nəşrləri də var.
İlk sayı 1933-cü il martın 9-da çapdan çıxmış "Mübariz keşikdə" həmişə daxili işlər orqanları ilə ictimaiyyət arasında informasiya körpüsü vəzifəsini yerinə yetirib. Daxili işlər orqanlarında keçirilən islahatlar, baş verən yeniliklər, xidməti borcunu layiqincə yerinə yetirən DİN əməkdaşlarının çətin və şərəfli fəaliyyəti, mühüm hadisələr, törədilmiş dəhşətli cinayətlər və onların açılması barədə yazılarla çıxış edən bu qəzet oxuçularının rəğbətini qazanıb. Qəzetin hər sayı ümumilli lider Heydər Əliyevin bu sözləri ilə açılır: "Polis, daxili işlər orqanları Azərbaycan dövlətinin əsas sütunlarından, dayaqlarından biridir. Polis Azərbaycan dövlətinə, dövlətçiliyinə xidmət edir. Azərbaycanın dövlət müstəqilliyinə xidmət edir. Hər bir Azərbaycan vətəndaşına xidmət edir".
1992-ci ilin 16 dekabrında Daxili Qoşunların "Əsgər" qəzeti nəşrə başladı. Müxbirlərinin birbaşa səngərlərdən hazırladıqları yazılarla çıxan bu qəzet ön cəbhə ilə əlaqənin ən etibarlı vasitələrindən biri idi. Həmişə əqidəsinə sadiq qalan, Azərbaycan əsgərinin silah tutan əllərinə qüvvət verən bu qəzet Daxili Qoşunların yaranması, formalaşması istiqamətində öz töhfələrini verib.
Paytaxtın polis qarnizonunun yaxın dostu olan "Polis" qəzetinin ilk sayı 1993-cü il sentyabrın 30-da çapdan çıxıb. Qəzetin əsas vəzifəsi dünyanın ən sabit, əminamanlığın hökm sürdüyü şəhərlərindən olan paytaxtımızda polis əməkdaşlarının çətin və şərəfli işini dolğun və operativ şəkildə ictimaiyyətə təqdim etməkdir.
Polis Akademiyasında dünyaya gələn eyni adlı qəzet və jurnalı da, gələcək üçün nəzərdə tutulan nəşrləri, ayrı-ayrı qurumlarımızdakı mətbuat xidmətlərini də nəzərə çatdırsaq, Daxili İşlər Nazirliyində informasiya fəaliyyətinin getdikcə daha da şaxələndiyinin, ən başlıcası, peşəkarlıq səviyyəsinin artdığının şahidi oluruq.
DİN mətbuatı həm də daxili işlər orqanlarının tarixini yazır, yaşadır və inanın ki, bu cild-cild yazılar, qorunan nəşrlər yüz illər sonra da bu günlərimizin aynası olaraq qalacaq. Necə ki, "Əkinçi", "Molla Nəsrəddin,"Fiyuzat" qalıb...
DİN-in Mətbuat xidməti
