Rusiya Müdafiə Nazirliyi şənbə günü Suriyanın İdlib bölgəsində vurulan Su-25 tipli rus qırıcısının hissələrinin tapılması üçün Türkiyədən yardım istəyib. Baki-xeber.com xəbər verir ki, bu barədə Rusiya Müdafiə Nazirliyi məlumat yayıb
"İdlibin hava məkanında fevralın 3-də portativ zenit raketi ilə terrorçular tərəfindən vurulan Su-25 təyyarəsinin bütün hissələrinin tapılması ilə bağlı yardım etməsi üçün Türkiyə tərəfinə müraciət edildi" – deyə nazirliyin açıqlamasında deyilir.
Qeyd edilir ki, Rusiyanın hərbi ekspertləri terrorçuların təyyarə vurmaq üçün istifadə etdiyi portativ zenit raketinin tipinin, istehsal yerinin və Suriyaya hansı yollarla gəltirildiyinin müəyyənləşdirilməsi üçün təyyarənin mühərriklərinin hissələrinin tapılmasında xüsusi maraqlıdır.
Qeyd edək ki, Rusiya, Türkiyə və İran tərəfindən İdlibdə yaradılmasına qərar verilən deskalasiya zonasının təhlükəsizliyinin təmin olunmasını Türkiyə üzərinə götürmüşdü.
Onu da xatırladaq ki, fevralın 3-də Suriya səmasında terrorçular tərəfindən vurulan Rusiya Hərbi Hava Qüvvələrinə aid Su-25 təyyarəsinin pilotu Roman Filipova Rusiya qəhrəmanı fəxri adı verilib.
Rusiyanın Müdafiə Nazirliyi bildirir ki, zabit son ana qədər təyyarəni havada saxlamağa cəhd edib və komandanlığa raket hücumu barədə raport verə bilib: "Terrorçuların nəzarətində olan Tell-Debes yaşayış məskəni rayonunda katapult edərək yerə enən mayor Roman Filippov həyatının son anına qədər xidmətindəki silahla yaraqlılara qarşı qeyri-bərabər döyüşdə mübarizə aparıb".
Terrorçular Filippovu mühasirəyə alanda ağır yaralı olan zabit özünü əl qumbarası ilə partladıb.
Bu arada, Rusiya təyyarəsinin pilotu ilə terrorçular arasında döyüşə aid olduğu iddia edilen bir video yayımlanıb. Videoda terrorçuların silahları ilə birlikdə katapult edən pilota doğru qaçaraq onu mühasirəyə aldığı görünür. Silah səslərindən sonra partlayış səsi gəlir və duman yüksəlir. Pilot atəş açdığı terrorçulara əsir düşməmək üçün həmin vaxt özünü partladıb.
Ilkin məlumatlara görə, Su-25 rus təyyarəsi İdlib əyalətində “Əl-Nustra”ya bağlı “Heyet Tahrir el-Şam” qruplaşması tərəfindən MANPAD adı ilə məşhur olan daşına bilən havadan müdafiə sistemi ilə vurulub. Ehtimallara görə sözügedən sistem PKK vasitəsilə sözügedən qruplaşmaya ötürülüb.
Digər tərəfdən, Filipovun pilotu olduğu Su-25 qırıcısı, Rusiyanın Suriyadakı hərbi əməliyyatlara başladığı 2015-ci ilin sentyabrından indiyə kimi terrorçular tərəfindən vurulan ilk döyüş təyyarəsidir.
