Rusiya prezidenti Vladimir Putin ABŞ Maliyyə Nazirliyinin "Kreml hesabatı" sənədinə münasibət bildirib.
APA-nın Moskva müxbirinin verdiyi məlumata görə, bu gün səlahiyyətli nümayəndələri ilə keçirilən görüşdə Vladimir Putin ABŞ tərəfinin bu addımını dostcasına olmayan hərəkət adlandırıb: "Mən bu sənədi, siyahını görməmişəm. Səhər həmkarlarım məlumat verdilər, lakin siyahıya baxmadım. Bu sənəd və siyahı barədə ümumilikdə demək istədiklərim var. Biz sizinlə birlikdə daha çox özümüz haqqında düşünməliyik. İqtisadiyyatımızı, kənd təsərrüfatımızı, səhiyyəmizi, müdafiə qabiliyyətimizi inkişaf etdirməliyik. Məhz onda hansısa siyahı formalaşdırmağın heç bir mənası olmayacaq. Hədələmək, qorxutmaq - bunların heç bir olmayacaq. Rusiya daxili məsələləri ilə məşğul olmalıdır. İt hürər, karvan keçər. O ki qaldı siyahıya, əslində, bizim hamımızı, yəni 146 milyonu hansısa siyahıya salıblar. Bunun niyə edildiyini anlamıram. Lakin sözsüz ki, bu, dostcasına olmayan aktdır.
Bu addım onsuz da mürəkkəb vəziyyətdə olan Rusiya-ABŞ münasibətlərini daha da çətinləşdirir, ümumilikdə, beynəlxalq münasibətlərə böyük zərər vurur. Baxın, görün, nə axmaqlıq baş verir. Rusiyanı Şimali Koreya və İranla bir sıraya qoyurlar, eyni zamanda bizdən xahiş edirlər ki, Şimali Koreyanın nüvə probleminin həllində iştirak edək. Bu, bəyəm axmaqlıq deyil?"
Rusiya prezidenti bu siyahını gözlədiklərini də vurğulayıb: "Gizlətməyəcəm, biz bu siyahını gözləyirdik. Cavab tədbirləri görməyə də hazır idik. Bunlar münasibətlərimizi sıfıra endirə biləcək tədbirlərdi. Lakin biz əks addımlar atmaqdan hələlik özümüzü saxlayırıq".
V. Putin adının sanksiya tətbiq olunması üçün hazırlanan siyahıya düşməməsinə də münasibət bildirib.
"Bu mənə ağır gəlir", - deyə Rusiya lideri bu barədə suala zarafatla cavab verib.
"Hesab edirəm ki, "Kreml hesabatı"na düşməmək istefa vermək üçün bir bəhanədir". Bunu Rusiya baş naziri Dmitri Medvedev belçikalı həmkarı ilə danışıqların yekunlarına dair keçirdiyi birgə mətbuat konfransında ABŞ Maliyyə Nazirliyinin "Kreml hesabatı" sənədinə münasibət bildirərkən deyib.
"Lakin, əlbəttə ki, biz belə etməyəcəyik. Bir siyahı çərçivəsində demək olar ki, bütün hakimiyyət orqanlarının komandası keçir. Bu komanda müəyyən dövrdə prezident Putin tərəfindən yığılıb. Bu siyahının mənası sıfırdır. Niyə? Ona görə ki, əgər biz belə bir siyahı hazırlasaydıq, bütün Tramp administrasiyasını, Nümayəndələr Palatasını, Senatın, Ali məhkəmənin, Baş prokurorun ofisinin nümayəndələrini ora daxil etsəydik, ABŞ-da nə baş verərdi? Heç nə baş verməzdi. Eləcə də bizdə heç nə baş verməyəcək. Həmin siyahının dövlət adamlarına aid olan hissəsinin mənası sıfıra bərabərdir. Belə siyahılar Rusiya-ABŞ münasibətlərini zəhərləyir", - deyə Medvedev qeyd edib.
