Türkiyə prezidenti Rəcəb Tayyib Ərdoğanla ABŞ prezidenti Donald Tramp arasında telefon danışığı olub. Baki-xeber.com Türkiyə mediasına istinadən xəbər verir ki, telefon danışığı Trampın tələbilə baş tutub.
Görüş, ABŞ-ın Suriyada Türkiyə sərhədində 30 min nəfərlik terror ordusu qurmaq qərarı və Türkiyənin Afrində başlatdığı “Zeytin budağı” əməliyyatından sonra iki ölkə arasında yaranmış gərginlik fonunda prezidentlər səviyyəsində baş tutan ilk təmasdır.
Görüşdə Suriyadakı son vəziyyət və Türkiyənin Afrində terror təşkilatlarına qarşı başlatdığı "Zeytun budağı" əməliyyatı ilə bağlı fikir mübadiləsi aparılması ilə yanaşı ikitərəfli mövzulara da toxunulub.
Ərdoğan Türkiyənin "Zeytun budağı" əməliyyatını beynəlxalq hüquq əsasında və Birləşmiş Millətlər Təşkilatının Nizamnaməsinin 51-ci maddəsinə əsaslanan qanuni müdafiə haqqı ilə BMT Təhlükəsizlik Şurasının terrorizmlə mübarizə mövzusundakı qərarları çərçivəsində həyata keçirdiyini vurğulayıb.
Ərdoğan Trampa terrorla mübarizə çərçivəsində PYD/YPG-yə ABŞ-ın silah dəstəyinə son qoymasının vacibliyinə də bir daha diqqət çəkib. O, Türkiyənin öz milli təhlükəsizliyi üçün Afrini terror ünsürlərindən təmizləməyi hədəflədiyini ifadə edəb.
Görüşdən sonra, Ağ Evin yaydığı açılamada isə, ABŞ prezidenti Trampın "Suriyadakı Türkiyə və ABŞ hərbi qüvvələrinin qarşıdurma risqinin qarşısı alınmalıdır" dediyi bildirilir. Ayrıca Tramp, Türkiyənin təhlükəsizliklə bağlı narahatlıqlarını aradan qaldırmaq üçün Ərdoğana əməkdaşlıq təklif edib.
Qeyd edək ki, ABŞ-la Türkiyənin toqquşma təhlükəsi yaranıb. Xüsusilə, Türkiyənin Afrindən sonra Münbicdə əməliyyatlara başlama ehtimalı qarşıdurma təhlükəsini daha da artırır.
ABŞ-ın Türkiyənin hədəfində olan Afrin bölgəsində hərbi qüvvəsi yoxdur, ancaq şərqdəki Münbicdə var. Bu vəziyyət isə iki ölkənin qarşı-qarşıya gəlməsi ehtimalını artırır.
