Türkiyə Suriyanın Afrin rayonunda hərbi əməliyyatlara başlayıb. Baki-xeber.com xəbər verir ki, Türkiyə Silahlı Qüvvələrinə məxsus hərbi təyyarələr ABŞ-ın dəstəklədiyi PKK/PYD terrorçularının bölgədəki mövqelərini bombalamağa başlayıb.
Eyni vaxtda sərhəddəki türk hərbiçiləri də PKK/PYD terrorçularının mövqelərini artilleriya atəşinə tutub. F-16 qırıcıları və artilleriya ilə müəyyən hədəflər bombalandıqdan sonra, Türkiyənin təlim keçdiyi Azad Suriya Ordusunun (ASO) bir qismi zirehli maşınlarla müxtəlif istiqamətlərdən Afrində terrorçuların nəzarətində olan bölgəyə girməyə başlayıb. Hələlik heç bir müqavimətlə qarşılaşmayan ASO bölgəyə doğru irəloləməkdə davam edir.
Türkiyə prezidenti Rəcəb Tayyib Ərdoğan da Afrin əməliyyatının rəsmən başladığını deyib: “Gəldik, gəlirik. Afrin əməliyyatı başladı. Bunun ardınca Münbiçdə hərbi əməliyyata başlayacağıq”.
"Zeytun budağı hərəkatı"
Türkiyə Silahlı Qüvvələrinin (TSQ) Baş Qərargahı Suriyanın Afrin bölgəsindəki terrorçu qrupların mövqelərinin bombalanması ilə bağlı rəsmi açıqlama yayıb. Baki-xeber.com xəbər verir ki, açıqlamada 20 yanvar 2018-ci il saat 17:00-dan etibarən "Zeytun budağı hərəkatı"nın başladığı deyilir.
“Türk Silahlı Qüvvələri tərəfindən sərhədlərimizdə və bölgədə təhlükəsizlik və sabitliyi təmin etmək məqsədilə Suriyanın şimal-qərbindəki Afrin bölgəsində PKK-PYD-YPG və İŞİD-ə mənsub terrorçuların zərərsizləşdirilməsi, eləcə də dost və qardaş bölgə xalqını bunların zülmündən qurtarmaq üçün "Zeytun budağı” əməliyyatı başlayıb” – deyə bildirilir.
Son məlunatlara görə Afrindəki PKK silahlıları bölgədəki dinc əhalidən canlı qalxan kimi istifadə etməyə başlayıb.
İndiyə qədər TSQ-nın 113 hədəfdən 108-ni vurduğu bildirilir. Məlumata görə, əməliyyata 72 qırıcı təyyarə cəlb olunub.
Türkiyə hərbi təyyarələrinin əməliyyatlar çərçivəsində Suriya hava məkanına daxil olduğu bildirilir. Türkiyə xarici işlər naziri Mövlud Çavuşoğlu "Zeytun budağı hərəkatı" ilə bağlı Suriya rejiminin məlumatlandırıldığını bildirib.
Bundan başqa, ABŞ, Rusiya, İran İngiltərə, Fransa və Çinin Ankaradakı səfirləri Türkiyə Xarici İşlər Nazirliyinə çağırılaraq, əməliyyatlarla bağlı məlumatlandırılıb.
Əməliyyatdan öncə Afrindəki Rusiya əsgərləri də bölgədən çıxarılıb. Bu barədə Rusiya Müdafiə Nazirliyindən bildirilib.
Rusiya BMT-yə üz tutur
Rusiya Türkiyənin Afrində başlatdığı hərbi əməliyyatın dayandırılması tələbilə Birləşmiş Millətlər Təşkilatına (BMT) müraciət edəcək.
Baki-xeber.com xəbər verir ki, bu barədə Rusiya Federasiya Şurasının Müdafiə və Təhlükəsizlik Komitəsinin sədr müavini Frants Klinseviç açıqlama verib.
Rus senator bu çərçivədə, Rusiyanın Suriya ilə diplomatik əməkdaşlığı davam etdirəcəyini deyib.
Klintseviç, Türkiyənin başlatdığı əməliyyatın Suriya torpaqlarında yeni bir silahlı qarşıdurmaya səbəb olacağını istisna etməyib. O, Suriya ilə Türkiyə arasında silahlı qarşıdurma başlayacağı halda, Rusiyanın belə bir qarşıdurmaya qatılmayacağını deyib.
ABŞ-ın PKK-ya silah göndərmək üçün istifadə etdiyi hava limanı vuruldu
Türkiyə Silahlı Qüvvələri Suriyanın Afrin bölgəsində başlatdığı əməliyyat çərçivəsində Minniğ hava limanını vurub.
Baki-xeber.com xəbər verir ki, Türkiyə döyüş təyyarələri PKK/PYD terror təşkilatının əlində saxladığı Minniğ aerodromunu bombalayıb.
Qeyd edək ki, ABŞ, PKK/PYD terrorçularına silah göndərmək üçün məhz bu hava limanından istifadə edib.
Rusiya ABŞ-ın üstünə yeridi
Rusiya Türkiyənin Suriyanın Afrin bölgəsində başlatdığı əməliyyata görə, ABŞ-ı sərt tənqid edib. Baki-xeber.com xəbər verir ki, Rusiya Müdafiə Nazirliyi bəyanat yayaraq, Vaşinqtonun məsuliyyətsiz davranışlarının Suriyada həll prosesini təhdid etdiyini bildirib.
Açıqlamada, ABŞ-ın təxribatçı addımlarının Suriyanın şimal-qərbindəki böhranın dərinləşməsinə səbəb olduğu vurğulanır.
ABŞ-ın Suriyada kürdlərin çoxluq təşkil etdiyi bölgələr yaratdığı ifadə edilən açıqlamada daha sonra bildirilir: "Pentaqonun Suriyadakı ABŞ tərəfdarı silahlı qruplara müasir silahlar verməsinə görə, Türkiyə, Afrində əməliyyatlara başladı. ABŞ-ın Suriyadakı məsuliyyətsiz davranışı, ölkədəki həll prosesini və Cenevrə prosesini təhdid edir".
