ABŞ Türkiyənin gözlənilən Afrin əməliyyatına mane olmayacaq. Baki-xeber.com xəbər verir ki, bu barədə ABŞ liderliyindəki anti-İŞİD koalisiyasının sözçüsü polkovnik Ryan Dillon açıqlama verib.
Dillon bildirib ki, Afrin, koalisiyanın hərbi əməliyyat sahəsinə aid deyil.
Ancaq buna baxmayaraq, ABŞ-ın kürd yaraqlılarına yeni silahlan göndərdiyinə dair xəbərlər yayılır. “Al-Masdar” agentliyi özünün mənbələrinə istinadən bildirir ki, ABŞ Suriyadakı kürdlərə daşınan zenit-raket kompleksləri verib. Sözügedən raketlərin ilk partiyasının artıq göndərildiyini deyən mənbə bildirib ki, amerika hərbçiləri PZRK-ları ötən həftə Afrin yaxınlığında olan PYD yaraqlılarına çatdırıb. Qeyd olunur ki, bu sövdələşmə ABŞ-ın başçılıq etdiyi beynəlxalq koalisiyaya heç bir məlumat verilmədən ABŞ-la kürdlər arasında gizli şəkildə əldə olunub.
Agentliyin xəbərinə görə, sözügedən silahdan kürdlər Türkiyənin dəstəklədiyi qrupların gözlənilən Afrin əməliyyatı zamanı havadan müdafiəni təmin etmək məqsədilə istifadə edəcək.
Gərginliyin artmasına səbəb əvvəldən PKK-nın Suriya qanadı YPG ilə əməkdaşlığa gedən Vaşinqtonun onlarla birlikdə Türkiyə və İraq sərhədlərində 30 min nəfərlik terror ordusu yaratmağa hazırlaşdığını elan etməsi olub. Bu isə gözlənildiyi kimi, Türkiyənin sərt reaksiyasına səbəb olub. PKK-nın silahlandırılmasına görə Vaşınqtona sərt mesajlar verən Türkiyə prezidenti Rəcəb Tayyib Ərdoğan ABŞ-ın dəstəklədiyi Suriyanın kürd yarı-hərbi dəstələrinə qarşı hücum edəcəyi barədə xəbərdarlıq edib.
Ərdoğan Türkiyə hərbi qüvvələrinin hər an hərəkətə keçməyə hazır olduqlarını deyib: “Qatil sürüsü ilə aramızda durmayın. Əks təqdirdə baş verən istənməyən hadisələrə görə, biz məsuliyyət daşımayacağıq. Terror təşkilatlarının bazalarında qaldırılan bayraqlarınızı özünüz endirin ki, biz endirib, sizə verməli olmayaq. Terrorçuların üzərlərində olan işarələri sökün ki, terrorçularla birlikdə olan hərbçilərinizi biz torpağa gömmək məcburiyyətində qalmayaq”.
Prezident deyib ki, Türkiyə qüvvələri Türkiyə ilə sərhəddə yerləşən və YPG-nin nəzarət etdiyi Suriyanın İdlib anklavını mühasirəyə alıb.
Artıq Türkiyə Silahlı Qüvvələri Amerikanın Suriyada dəstəklədiyi PYD terrorçularına qarşı hərbi əməliyyat planı da hazırlayıb. "Hürriyet" qəzeti yazır ki, plana əsasən, PYD-nin nəzarətində olan Afrin bölgəsinə "Fərat Qalxanı" əməliyyatında olduğu kimi, əvvəlcə Azad Suriya Ordusunun (ASO) döyüşçüləri girəcək. Həmin ərəfədə Türkiyə ordusu da Afrinə top atışları ilə ASO-ya geniş sahələr yaradacaq.
Əməliyyatın ikinci mərhələsində Türkiyə Silahlı Qüvvələri həm havadan, həm də qurudan PYD terrorçularının nəzarətindəki bölgələrə daxil olacaq. Ən əsas hədəf isə terrorçuların havadan dəstək aldığı Minnak Hava Limanını ələ keçirməkdir.
Türkiyə Suriya ilə sərhəddə yerləşdirildiyi ağır zirehli texnika və canlı qüvvələrin sayını artırır. Hərbi əməliyyatın hər an başlaya biləcəyi bildirilir.
TAHİR
