ABŞ prezidenti Donald Tramp Latın Amerikası və Afrika ölkələrindən gələn miqrantlarla bağlı işlətdiyi rüsvayçı ifadələr elə ABŞ-ın özündə sərt etirazla qarşılanıb. Baxmayaraq ki, Tramp qalmaqala səbəb olan sözləri işlətmədiyini deyir.
Baki-xeber.com xəbər verir ki, yanvarın 11-də konqresmenlərlə immiqrasiyaya həsr olunmuş görüşdə təklif olunan sazişi rədd edən Tramp bəzi Latın Amerikası və Afrika ölkələrindən gələn miqrantları sərt tənqid edərək “Niyə bu iyrənc ölkələrdən insanların buraya gəlməsini istəyək? Norveçdən daha çox miqrant qəbul etməliyik” ifadələrini işlədib.
Tramp deyib ki, Birləşmiş Ştatlar Norveç kimi ölkələrdən daha çox mühacir qəbul etməlidir.
Ağ evin sözçüsü Raj Şah Trampın həmin sözü işlətdiyini təkzib etməyib: “Vaşinqtondakı bəzi siyasətçilər xarici ölkələr üçün vuruşmağı seçirlər, prezident Tramp isə həmişə Amerika xalqından ötrü mübarizə aparacaq”.
Ancaq Tramp bu ifadələri işlətmədiyini deyir. “Görüşdə sərt danışmışam... amma belə dildə də yox”, – Tramp “Twitter”də yazıb.
Buna baxmayaraq ABŞ prezidentinin səsləndirdiyi bildirilən vulqar sözlər qalmaqal yaradıb. Prezidentin dedikləri Konqresin demokrat və respublikaçı üzvlərinin tənqidinə səbəb olub.
Nümayəndələr Palatasının aparıcı demokrat üzvü Steni Hoyer Trampın sözlərini “irqçi və biabırçı” adlandırıb. Palatanın respublikaçı üzvü, haitili miqrant ailədən olan Mia Lov isə prezidentin dediklərini “nəzakətsiz, bölücü, xudpəsənd” adlandırıb. O, Trampın davranışının “ölkə başçısı üçün qəbuledilməz” olduğunu deyib, onu üzr istəməyə çağırıb.
Cənubi Afrikanın hakim Afrika Milli Konqresi də Trampın dediklərini "təhqiramiz" adlandırıb. Haiti isə ABŞ nümayəndəsini çağıraraq, prezidentin dediklərinə izahat tələb edib.
BMT-nin insan haqları ofisi ABŞ prezidentinin Afrika və Haitidən mühacirlərlə bağlı dediklərini “irqçilik” adlandırıb. Sözçü Rupert Kolvill deyib ki, bu sözlərə yalnız “irqçilik” demək olar: "Doğrudursa bunlar, ABŞ prezidenti tərəfindən şok edici və utanc verici açıqlamalardır. Üzr istəyirəm, amma bu sözlərlə bağlı irqçi kəlməsindən başqa söz tapmaq olmur".
"Bu,… bir çox insanın həyatını məhv edə biləcək irqçilik və xarici düşmənçiliyi təşviq etməkdir" - deyən Kolvill bildirib ki, bütöv ölkələri və qitələri “çirkli dəliklər”, onların sakinlərini isə ağdərili olmadıqlarına görə arzuolunmaz adlandıra bilməzsiniz.
ABŞ Nümayəndələr Məclisinin sədri Paul Ryan da Trampı tənqid edərək, onun sözlərini "faydasız" adlandırıb. O, irlandiyalı əcdadların da keçmişdə ABŞ-da ayrıseçkiliyə məruz qaldığını deyib.
Ryan miqrasiyanı “böyük bir hekayə” kimi təsvir edib və məmləkəti Janesville şəhərində yaşayan haitililərin "gözəl vətəndaşlar" olduğunu söyləyib.
Bu arada, ABŞ-ın Panamadakı səfiri Con Fili Trampın miqrantlarla bağlı işlətdiyi xoşagəlməz ifadələrə etiraz olaraq vəzifəsindən istefa verib. Səfir, ABŞ Dövlət Departamentinə təqdim etdiyi istefa ərizəsində, bundan belə Tramp administrasiyasına bir daha xidmət etməyəcəyini bildirib.
