Avropa Birliyi (AB), İngiltərə, Almaniya, Fransa və İran Tehranla 5+1 ölkələri arasında üç il əvvəl imzalanan nüvə razılaşmasını ləğv etmək istədiyini açıqlayan ABŞ prezidentinə qarşı bir araya gəlib. Baki-xeber.com xəbər verir ki, Avropada baş tutan zirvədə ABŞ-a qarşı razılaşma edilib.
Yığıncaqdan sonra açıqlama verən Fransa xarici işlər naziri Jan Yves Le Drian nüvə razılaşmasının alternativi olmadığını deyib.
ABŞ prezidenti Donald Trampın topa tutan Aİ-nin xarici işlər və təhlükəsizlik siyasəti üzrə ali nümayəndəsi Federika Mogerini isə, razılaşmanın uğurlu olduğunu deyib: “Çünki İranın nüvə proqramına nəzarət edə bilirik. Beynəlxalq ictimaiyyət də bu mövzuda birlik nümayiş etdirməlidir".
O bildirib ki, İranın nüvə proqramı üzrə Birgə hərtərəfli Fəaliyyət Planının icrası çərçivəsində rəsmi Tehrana qarşı sanksiyaların aradan qaldırılması beynəlxalq ticarətə və Aİ-nin İranla iqtisadi münasibətlərinə müsbət təsir göstərib.
F.Mogerini qeyd edib ki, Aİ sanksiyaların ləğvi prosesinin tamamilə başa çatdırılmasına təkid edir.
O əlavə edib ki, İranla nüvə razılaşması işləyir və Avropa İttifaqı onun bütün iştirakçıları tərəfindən icrasına nail olmağa çalışacaq: "Beynəlxalq Atom Enerjisi Agentliyi İranın nüvə proqramının dinc xarakterli olduğunu təsdiq edib. Bu saziş İranın nüvə proqramı üzərində nəzarəti təmin etməyə imkan verir".
Bununla belə, F.Mogerini İranın raket proqramından narahatlığını gizlətməyib: "Biz Tehranın raket proqramı və onun regionda fəaliyyəti ilə bağlı narahatlığımızı ifadə edirik. Lakin qeyd edirik ki, bu məsələlər nüvə sazişinin icrasından ayrılmalıdır".
Almaniya xarici işlər naziri Siqmar Qabriel da, İranın 2015-də əldə edilən razılaşmanın faydalarını görmək hüququ olduğunu deyib. Nüvə proqramından kənar mövzularla bağlı Tehranla yeni bir dialoq kanalı açacaqlarını deyən nazir bildirib ki, nüvə silahı mövzusunda Şimali Koreya ilə problemin yaşandığı bir vaxtda İranla razılaşmanın davam etdirilməsi həyati əhəmiyyət daşıyır.
Qeyd edək ki, İranla 5+1 ölkələri (ABŞ, İngiltərə, Çin, Fransa, Rusiya və Almaniya) tərəfindən 2015-ci ildə imzalanan nüvə razılaşması, seçki kampaniyası dövründən bəri Trampın ən çox etiraz etdiyi mövzulardan biridir.
