ABŞ prezidenti Donald Tramp deyir ki, çətin ki, onun xüsusi prokuror Robert Müller ilə görüşməsinə ehtiyac yaransın. Robert Müller Trampın prezident seçkiləri kampaniyasının Rusiya ilə əlaqələrinin olub-olmadığını araşdırır.
“Heç bir sözləşmə olmayıbsa və hər hansı bir sözləşmənin mövcudluğu ilə bağlı dəlil tapılmayıbsa, belə bir görüş keçiriləcəyi inandırıcı gəlmir. ”
Tramp bu şərhi çərşənbə günü Norveç baş naziri Erna Solberq ilə görüşdən sonra keçirilən mətbuat konfransı zamanı verib. O, bu təhqiqatı “demokratların uydurması” adlandırıb.
Federal Təhqiqatlar Bürosunun keçmiş direktoru Robert Müllerin bir neçə aydır apardığı təhqiqat artıq dörd adama qarşı ittihamnamənin verilməsi ilə nəticələnib. Trampın bir zamanlar seçki kampaniyasının meneceri olmuş Pol Manafort və prezident milli təhlükəsizlik məsələləri üzrə müşaviri Maykl Flinn də onlar arasındadır.
"The Independent" qəzeti isə yazır ki, Ağ Ev rəsmiləri Trampın Rusiya ilə mümkün sövdələşməyə girib-girmədiyini araşdıran təhqiqat prezidentin maliyyə məsələlərinin yaxınlığına gedən kimi onun prezidentliyinə son qoyulacağına inanmır.
Maykl Volfun Tramp barəsində yazdığı "Atəş və qəzəb" kitabında deyilir ki, Ağ Ev rəsmiləri Trampın seçkidə qələbə qazanmaq üçün Moskva ilə sövdələşməyə girmədiyini düşünür. Amma digər tərəfdən, bu rəsmilərin fikrincə, təhqiqat prezidentin maliyyə məsələlərini araşdırmağa başlasa, onun mövqeyi ölümcül şəkildə laxlayacaq: “...onlar düşünür ki, təhqiqat onun maliyyə işlərini araşdırsa, Tramp batacaq..."
Bundan əvvəl yayılan xəbərlərdə deyilirdi ki, hələ dekabr ayında Rusiya oliqarxları və Moskva ilə əlaqələrinə görə tanınan “Deutsche Bank” Trampın yaxın ətrafının bank məlumatlarını Rusiyanın seçkiyə müdaxiləsini araşdıran xüsusi prokuror Robert Muellerə təqdim edib. Bu xəbərlər onu göstərir ki, Mueller, heç şübhəsiz, Trampın yaxın çevrəsinin maliyyələrini araşdırmağa başlayıb.
Ötən il "The New York Times" qəzetinin "Mueller Rusiya ilə münasibətlərdən başqa həm də onun ailəsinin maliyyəsini araşdırarsa, bu, qırmızı xətt ola bilərmi" sualına Tramp "Mən deyərdim ki, bəli, bu məncə, qanunun pozulması olardı" cavabını vermişdi.
Tramp hələ indiyədək ailə biznesinin üzərindəki məxfiliyin üstünü açmayıb və vergi sənədlərini açmaq istəmir. Ancaq bütün başqa prezidentlər bunu edib.
Tramp 2016-cı il ABŞ seçkisi zamanı ruslarla hər hansı sövdələşməyə girdiyi barədə iddiaları dəfələrlə rədd edib və bunu "əcinnə ovu" adlandırıb. "Atəş və qəzəb" kitabının işıq üzü gördüyü gün isə Tramp onun müəllifini "tam bir əfəl" adlandırmış və kitabdakıların "tamamilə yalan" olduğunu demişdi.
