Bir müddət əvvəl Kubadakı ABŞ diplomatlarına müəmmalı hücum Vaşinqtonda çaşqınlıq yaradıb. Baki-xeber.com xəbər verir ki, 2016-cı ilin sonlarından Kubadakı amerikalı diplomatlara hansısa “akustik hücum” nəticəsində səfirliyin 24 əməkdaşında səs və ya qulaq ağrısı yaranıb.
2017-ci ilin ortalarında isə Dövlət Departamenti sözügedən hücumlara görə, zərər çəkmiş bir neçə diplomat və onların ailələrini Kubadan geri çağırıb, Kuba səfirliyinin 15 əməkdaşını isə ölkədən qovub.
Kuba hücumlarla hər hansı əlaqəsinin olduğunu inkar edir və buna görə kimin məsuliyyət daşıdığını bilmədiyini deyir. Rəsmi Havana diplomatlara qarşı hansısa silah işlədilməsi ilə bağlı şübhələri də rədd edir. Bildirir ki, öz ərzisində diplomatlara hücum edilməsinə heç bir halda imkan verilə bilməz.
Ancaq Havanada 24 diplomat və işçiyə qarşı hücumlarla bağlı müəmma hələ də davam edir. “Amerikanınsəsi” yazır ki, ABŞ qanunvericilərindən gələn təzyiqlər nəticəsində dövlət katibi Reks Tillerson hücumlarla bağlı istintaq aparmaq üçün cavabdehlik şurası yaradacaq. Senatda aparılan dinləmə zamanı Dövlət Departamenti rəsmiləri müəmmalı hücumlara reaskiyalarını müdafiə edib, lakin bu hücumlara görə kimin məsuliyyət daşıdığını və ya ABŞ diplomatlarına zərər vermək üçün hansı üsullara əl atıldığını hələ ki, bilmədiklərini deyib. Qanunvericilər isə daha çox məlumat əldə etmək üçün gizli birifinqlərin keçirilməsinə çağırıb.
Dinləmə zamanı rəsmilər hücumların müxtəlif potensial səbəblərini araşdırdıqlarını deyib. “Məncə bu virusdur, ultrasəsdir. Ekspertlər çox sayda məsələləri araşdırır,” deyə Dövlət Departamentinin Diplomatik Təhlükəsizlik şöbəsindən Dr. Todd Braun bildirib.
Dövlət Departamenti rəsmiləri deyir ki, bu hücumun təsirinə məruz qalmış insanların simptomları beynin yüngül travmatik zədələnməsinin simptomları ilə uyğun gəlir. “Bu xəsarətlərin qeyri-təbii yollarla əldə olunan travma ilə əlaqəli olduğuna dair fikir birliyi mövcuddur” - Dövlət Departamentinin tibbi direktoru Çarls Rosenfarb söyləyib.
Senatorlar deyir ki, onlar bu qəribə hücumlara görə amerikalı müstəntiqlər qədər çaşqındır. “Bu insanların başlarına gələnlər hansısa çox inkişaf etmiş texnologiyanın nəticəsidir. Bu texnologiya o qədər mürəkkəbdir ki, biz onu anlamırıq” - respublikaçı senator Marko Rubio deyir.
Rubio buna görə Kuba hökumətindən bəzi hiyləgar şəxslərin və ya ABŞ-ın Kuba ilə daha yaxın əlaqələrinin olmasını istəməyən Rusiya kimi üçüncü bir ölkənin məsuliyyət daşıdığını ehtimal edir. O deyib ki, Kuba kimi sıx nəzarət olunan ölkədə hökumətin bundan xəbərdar olmamasına inanmaq çox çətindir.
Havana Qərb Yarımkürəsinin ən çox izlənən şəhəridir. Orada Kuba rəsmiləri amerikalı diplomatların hər bir addımına nəzarət edir.
Qeyd edək ki, Donald Tramp prezident Barak Obamanın 50 il sonra, 2015-ci ildə Kuba ilə əlaqələrin bərpasına dair imzaladığı qərarı qismən ləğv edib.
