Səudiyyə Ərəbistanında keçirilən növbəti əməlyyat nəticəsində daha 11 şahadənin gözaltına alındığı bildirilir.
Baki-xeber.com-un CNN Türk-ə istinadən xəbərinə görə, buna səbəb hökumətin bundan sonra kral ailəsi mənsublarının su və elektrik məsrəflərinin artıq dövlət tərəfindən qarşılanmayacağı barədə qərar verməsi olub. Səudiyyənin sabq.org saytının xəbərinə görə, şahzadələr kral ailəsinə mənsub sarayda bir araya gələrək, su və elektrik məsrəflərinin artıq dövlət tərəfindən qarşılanmaması ilə bağlı qərarnamənin geri çəkilməsini tələb edib.
“Hürriyet” isə yazır ki, şahzadələr eyni zamanda bir qohumları barəsində kəsilən edam cəzası üçün təzminat tələb edib, sarayı tərk etməyi isə rədd edib. Bundan sonra mühafizlər müqavimət göstərən 11 prinsi gözaltına alıb.
Xatırladaq ki, daha öncə Səudiyyə Ərəbistanının Baş prokuroru Şeyx Suud el-Muceb dekabrın 5-də verdiyi yazılı açıqlamada ölkədəki Korrupsiya ilə mübarizə komissiyası tərəfindən ifadə verməyə çağırılanların sayının 320-yə çatdığını, tutulanların sayının isə 159 olduğunu bildirib. Eyni zamanda bank hesabı dondurulanların sayının 376 nəfərə çatdığı açıqlanıb.
Onu da qeyd edək ki, Korrupsiya ilə mübarizə komissiyası Səudiyyə Ərəbistanı kralı Salman bin Əbdüləziz tərəfindən ötən il noyabrın 4-də yaradılıb və komissiyaya rəhbərlik vəliəhd Məhəmməd bin Salmana tapşırılıb. Bundan dərhal sonra başladılan “korrupsiya sorğulamaları” nəticəsində, başda saray mühafizləri naziri Mutab bin Abdullah və milyarder iş adamı Əl-Velid bin Talal olmaqla çox sayıda prins, nazir ve iş adamı gözaltına alınıb.
