İran İslam Respublikasının Keşikçilər Korpusunun (SEPAH) baş komandanı general-leytenant Məhəmmədəli Cəfəri, ölkəsində son günlərdə yaşanan rejim əleyhinə etirazların sona çatdığını iddia edib. Baki-xeber.com xəbər verir ki, İran rəsmiləri nümayişlərdə agent olduğunu iddia etdikləri bir Avropa ölkəsi vətəndaşının da tutulduğunu bildiriblər.
Sosial problemlərdən qaynaqlanan aksiyaların, sonrakı günlərdə rejim əleyhinə çevrildiyini deyən Cəfəri, "Cümə günü və sonrası nümayişlər fitnə mərkəzli olmağa başladı. Bunlara qatılan inqilab əleyhdarları həbs edildi" deyə bildirib.
"Bu gün fitnənin sona çatdığı gündür" deyən M. Cəfəri hadisələrə görə, ABŞ, İsrail və Səudiyyə Ərəbistanının məsuliyyət daşıdığını bildirib.
SEPAH komandanı bildirib ki, ABŞ, İsrail və "əl-Səud" İŞİD-ə İrana girmək barədə göstəriş verib: "İŞİD-in bəzi qrupları ölkədə iğtişaşlar və partlayışlar törətmək məqsədilə ölkəyə girib. Bəziləri hesab edir ki, Amerika ilə dostluq etsələr güclü olacaqlar. Həmin şəxslərə məsləhət görürük ki, hər şeyini ABŞ-la dostluğa qurban vermiş Misirin durumuna bir baxsınlar".
M. Cəfəri hadisələr zamanı Qəhdrican, İzə və Nəcəfabadda insanların öldürülməsi üçün planlar qurulduğunu müşahidə etdiklərini deyib: "Kütlə arasında cinayətlər törədildi. Son fitnə zamanı SEPAH yalnız üç əyalətdə - İsfahan, Lorestan və Həmədanda aksiyalara məhdud şəkildə müdaxilə etdi. Fitnə zamanı toplananların sayı böyük şəhərlərdə 1500 nəfər idi. Ökə üzrə ümumlikdə iğtişaşlarda 15 min nəfər iştirak edib. Cümə günündən bu tərəfə fitnənin mərkəzində olan şəxslərin əksəriyyəti İnqilaba zidd qruplaşmalar və münafiqlər (Xalq Mücahidləri Təşkilatı) tərəfindən təlim görmüş şəxslər idi. Onların hamısı həbs olunub və çox sərt cəzalandırılacaqlar".
İran rəsmiləri bildiri ki, bu gün bir Avropa ölkəsi vətəndaşı ölkənin qərbindəki Burucerddə rejim əleyhinə nümayişlərdə həbs edilib. Ancaq saxlanan şəxsin konkret hansı ölkənin vətəndaşı olduğu açıqlanmır. Yerli məhkəmə rəsmilərindən Hamidreza Abolhassani onun agent olduğunu iddia edib: "Bu adam Avropadakı kəşfiyyat xidmətləri tərəfindən öyrədilib və üsyançılara rəhbərlik edirdi".
Qeyd edək ki, ABŞ prezidenti Donald Tramp bu gün Twitter hesabından "İran xalqı doğru zamanda ABŞ-dan böyük dəstək görəcək" mesajını paylaşıb.
Onu xatırladaq ki, İranda bu gün minlərlə hökumət tərəfdarı da küçələrə çıxıb. İran dövlət televiziyası səhər müxtəlif şəhərlərdə on minlərlə hakimiyyət tərəfdarının yürüş üçün küçələrə axışdığını bildirib.
Rejim lehinə nümayişlər dini lider Ayətullah Əli Xamneyinin hadisələrlə əlaqədar “İranın düşmənlərinin” müharibə yaratmağa cəhd göstərdiyi barədə açıqlamasından dərhal sonra başlayıb.
Ölkədə son günlərdə keçirilən rejim əleyhinə aksiyalar və küçələrdəki nümayişlərə etiraz etmək üçün İran hakimiyyətinin xalqa çağırışlarından sonra rejim tərəfdarları Ahvaz, Abadan, Gorqan, İylam, Ərak, Hurrəm Abad, Kirmanşah, Buşehr şəhərlərində “rejimə dəstək” mitinqi keçirib.
Nümayişçilər “Liderimiz biz hazırıq!”, “Lənət olsun ABŞ-a”, “Lənət olsun Səudiyyə Ərəbistanına” və “Lənət olsun fitnəçi və riyakar” şüarları səsləndiriblər.
Məşhəd şəhərində cümə axşamı günü ölkədəki iqtisadi vəziyyətə etiraz məqsədilə nümayiş keçirilib. Sonradan rejim əleyhinə etirazlara çevrilən nümayişlər ölkənin müxtəlif şəhərlərinə yayılıb.
Hadisələrdə 24 nəfərin öldüyü, minlərlə etirazçının saxlandığı bildirilir.
