ABŞ-ın Fələstinə 300 milyon dollarlıq yardımını kəsməklə hədələyən ABŞ prezidenti Donald Trampa Fələstindən sərt cavab gəlib.
Baki-xeber.com xəbər verir ki, Fələstin Milli Hakimiyyətinin prezident aparatı bəyanat yayaraq "Qüds satılmır" deyə bildirib.
Mahmud Abbasın sözçüsü Nabil Ebu Rudeyna da deyib ki, "Qüds Fələstinin əbədi paytaxtıdır və o dollarlara və ya qızıla satılmır".
Fələstinli siyasətçi Hanan Asrivi də ABŞ prezidentini tənqid edib: “Onlar bizi şantaj edə bilməyəcəklər. Prezident Tramp sülh, azadlıq və ədalət çağırışımızı sabotaj etdi...
"İndi də Tramp öz məsuliyyətsiz hərəkətlərinin nəticəsi olaraq Fələstini günahlandırır".
Qeyd edək ki, Donald Tramp paylaşdığı tvitlərdə ABŞ-ın Fələstinə ödədiyi yardımın əvəzinə heç bir "təşəkkür" almadığını və İsraillə danışıqlar aparmadığı təqdirdə bu ödənişlərin davam edilməsinin məntiqi sual altına qoyub.
ABŞ prezidenti dekabr ayında verdiyi qərarla Qüdsü İsrailin paytaxtı olaraq tanıdığını və ABŞ-ın Təl Əviv şəhərində yerləşən səfirliyinin Qüdsə köçürüləcəyini bildirmişdi. Tənqidlərlə baxmayaraq, Tramp bu qərarın Yaxın Şərqdəki sabitliyə zidd olmadığını və əksinə sülh danışıqlarına yolu açacağını iddia etmişdi.
Ancaq ABŞ-ın regional müttəfiqləri daxil olmaqla, bir çox ölkə və Birləşmiş Millətlər Təşkilatı (BMT) da Trampın qərarını qınadı. ABŞ-ın Qüds barədə mövqeyindən dönməsinə çağırış edən qətnamə BMT-də böyük səs çoxluğu ilə qəbul edildi.
Nəticədə ABŞ-ın BMT-yə səfiri Nikki Haley bildirmişdi ki, ABŞ qətnamə üzrə ona qarşı səs verən ölkələrə verilən maddi yardımını kəsə bilər. Türkiyə prezidenti Rəcəb Tayyib Ərdoğan buna cavab olaraq "demokratiya iradəsini dollarlarınızla ala bilməzsiniz" deyib.
Tramp Qüds barədə qərarını bəyan etdikdən sonra, vitse-prezident Mike Pence Yaxın Şərqə planlaşdırdığı səfərini təxirə salıb. Ağ Ev bu səfərin nə vaxt baş tutacağı sualına hələ ki, cavab verməyib.
